NAM PARA WENE 19 - Nanduk Ngget Tul Pidnak Wene

¹ Iri luk, an kuliginggal-e, ap kwarat aid arem-nen enne-ge o nggu nggal yogolar-e: ”Mbal Pem Nagawan erembel wanuwog-o! Nit Nenmbal Pem Nagawan iri-ge ninmiri yoso kek tak amawi worak-nen yusu-o!

² At-nen enpem wene mbaroso-ge mot mot lud tak nak irit mbaroso me, terak yebugwi kwe nggulok iri-ge at-nen mbabi kwaroso iri na bem nggweyak ma yu me nari wari rak poso kwe iri-ge Mbal Pem Nagawan-nen-e ebem angin worak mberak pij-o. Kwe iri-nen at ndegel ubugwi nap ondoso me, Mbal Pem Nagawan-nen ebem wene mbarij-o!” luk yiga-o.

³ Iri luk, ap kwarat na-nen tuguruk enne ngguloksa yogolar-e: ”Mbal Pem Nagawan erembel wanuwog-o! O siri nggulok iri kan nasolat kule-ge kundugu lasolat nak irit wolma-o!” luk yiga-o.

⁴ Nde, enne kulugwi nap dua pulu empat (24) min untugup worak mende empat ereya na min-e mbud luk, nagawan-nen koreyak woraso ondoro bem koreyak worasu Mbal Pem Nagawan erembel wanogolat-nen yogolar-e: ”Amin! Mbal Pem Nagawan erembel wanuwog-o” luk yiga-o.

Lomba Wam Marik-nen kwe wanosolat saguwa wene 19:5-10

⁵ Yogolikma-ge, nagawan–nen koreyak woraso ondoro iri na me-nen ene misik-nen yosolar-e: ”Mbal Pem Nagawan ndegel ubugwi nap oboksa min Mbal Pem Nagawan erembel wanugwi nap marik min nggulok min wa-e. Kit oboksa-nen Nenmbal Pem Nagawan nak erembel waner-o!” luk yij-o.

⁶ Iri yosola, an kuliginggal-e, ap kwarat kamarak enne-ge yi ebe wasolat enne lu nggal, o nggu lunggu mborosolat nggal irit kuligi-o. It-nen yogolar-e: ”Nit-nen idnak Mondok Amawi worak Mbal Pem Nagawan, Nagawan Indo iri-ge nit Nenagawan kwat yid me, Mbal Pem Nagawan nak erembel wanuwog-o!

⁷ Lomba Wam Marik-nen kwe wanurak tarem wok yarik, at wok uburuk kwe na at wok ubuwakluk lid lud tak puruk worasu me, nir-e nenalin nenalen kagolat, kijik kijak worogolat, at nak kek tak pogolat yuwog-o!

⁸ Nde, sum loro kopkap lak, abinal worak sum na-ge at wok uburak kwe na yuruwakluk wok tij-o” luk yiga-o. (Nde, sum loro konak iri-ge, Mbal Pem Nagawan ilirak-nen lud tak nak kwarugwi irir-o.)

⁹ Iri luk, aid nap iri-nen an yak norosolar-e: ”Wene yu mbari-o: ’Lomba Wam Marik-nen kwe wanosola saguwa sa lobok yuwakluk yonggo unpuwa nab-e inmbiringgat-nen yili-o’ ”. Nde, aid nap iri-nen tuguruk yak norosolar-e: ”Wene yu-ge Mbal Pem Nagawan-nen yidnak ndemeret wene-net yusu-o” luk yij-o.

¹⁰ Iri yosola, an-e aid nap na eralu mbud luk, at erembel waneyekluk yigi-t nde, at-nen yak norosolar-e: ”Lag-o. An nerembel wanurag-e lag-o! An na at ndegel oboso nap Mbal Pem Nagawan-nen yidnak wene Yesus-nen yak kindidnak wene tena woragwi nap kat kanggamirak inmin iri nggal-net yusu-o. Mbal Pem Nagawan nak erembel wani-o!” luk yak nirij-o. Nde, Yesus-nen nam tak pid ndemeret wene iri-nen-e Mbal Pem Nagawan ene lomboksa yugwi nap mirik onposo-o.

Ap mbi kuda wam loro ombolwak pem koreyak lobok yosola kagaid wene 19:11-21

¹¹ Iri luk, an yik kaginggal-e, aid arem tu kuwak yosolar-e, kuda wam loro misik kagi-o. Nde, kuda wam iri ombolwak pem koreyak iri unu-ge Yidnak Yidnag-et Kwaroso, Lud tak Nak Kwaroso irir-o. At iri-nen ap enpem wene mbarosolat na, wim posolat na, mot mor-et kwaroso irir-o.

¹² At erengen-e kan mare nggal, nde, at anggul pem-e nagawan-nen yurugwi topi kwarat pago. At ebem-e at unu mbarag-o. Nde, unu iri-ge at ariget nak-nen aru-o.

¹³ At usum yirik woragaid iri-ge yabi-nen yugurik yirig-o. Nde, at unu yarogolar-e: ”Mbal Pem Nagawan Ene-o”.

¹⁴ Aid arem woragwi san winde-ge at imin unsum-e sum loro konak kopkap lak yutluk, kuda wam loro ereba na ombolwak pem yere kore at imin mbiriga-o.

¹⁵ At emendam-e yalawi anggat worak mbi kenanggo. Nde, yalawi iri bem-nen ap enlem oboksa urugwe nggwe rak unpuruk, at-nen-e posid wangun pem it tena unpuruk wolma-o. Nde, at-nen-e anggut engen amburu mbutlugwi ondoro Mbal Pem Nagawan Amawi Worak iri na isilepma kwiye worak iri na me-nen anggut engen amburu mbutluwa-o.

¹⁶ Nde, at usum pem min at awak pem min-e at unu-ge ”Nggweyak ma nagawan oboksa onmbol pem Nagawan-o. Ap nggok oboksa onmbol pem Nagawan Indo-nen yusu-o” luk mbarag-o.

¹⁷ Iri luk, an yik kaginggal-e, aid nap misig-e molengen pem mendak worala kagi-o. At ene ngguloksa-nen teram nggwe yebaluk waring kasu towe ereba na yak yosolar-e: ”Yu me lobok yugupndik, Mbal Pem Nagawan-nen nggulok sagaidnak iri nokluk yu me ndok werer-o!

¹⁸ Nagawan nagawan min san winde enanggul pem nagawan nagawan min wim wari oboksa min inino min kuda wam min ombolwak pem koreyak woragwi nap min inino min ap oboksa ndegel unpugwi nap na, wisirik woragwi nap na irit, marik na nggulok na irit, it oboksa inino nabok-nen lobok yer-o!” luk yak tij-o.

¹⁹ Iri luk, an yik kaginggal-e, ndakngge isilepma worak na min nggweyak ma tena woragwi nagawan nagawan min it-nen idnak san winde kwarat ereba na min ndok wutluk, kuda wam loro na ombolwak pem kore yid nap min at-nen idnak san winde kwarat ereba na inmin wim puwokluk ndok worogola eneyagi-o.

²⁰ Ndakngge isilepma worak iri na tenakolar-e, at imbiri bem kwiye worak mende kwarid nap, enesiget Mbal Pem Nagawan ene lomboksa yoso nap iri na min tenaiga-o. (Nde, kwiye worak mende kwaridnak iri bem-nen ar-e ndakngge isilepma worak-nen idnak yenggerak purak mende enpem worak nap min ndakngge isilepma worak abage nggal ndak worak erembel waniga nap min onmbol pem lagaij-o.) Iri luk, ndakngge isilepma worak iri na min enesiget Mbal Pem Nagawan ene lomboksa yoso nap iri na min unluk nggengge emben worak kule (belerang) laso kan mare arem inpil nggwij-o.

²¹ Nde, ndakngge isilepma worak na min enesiget Mbal Pem Nagawan ene lomboksa yoso nap na min-nen idnak san winde kwarat ereba na-ge kuda wam loro na ombol pem koreyak emendam yalawi kenanggo na bem indij-o. Endamu, inino-ge yi towe ndi towe lobok yosolar-e, leraben waga ninggij-o.