NAM PARA WENE 17 - Nanduk Ngget Tul Pidnak Wene

Terak yebugwi kwe nggulok 17:1-18

¹ Iri luk, yimbe tuju tena woraiga aid nap tuju ereya na ennggendumu misik-nen-e an neram lobok yarik-nen yosolar-e: ”Lobok yi-o. Terak yebugwi kwe nggulok iri na ebem mbaruwa wene mirik kibimin-o. Nde, iri-ge yi kwarat korok korok wiridnak o siri nggulok irir-o.

² Nggweyak ma nagawan nagawan-nen kwe iri na imin mbabi yogolar-e, nggweyak ma woragwi nab-e at imin mbabi yugwi anggut engen amburu inmbitsa nonggolar-e, inndi wawa yugwi-o” luk yij-o.

³ Iri luk, Konak Indi an nebem mbosola-ge, aid nap iri-nen an wok nuburuk, karu me nibil mbirij-o. Nde, iri me-nen yik kaginggal-e, kwe misig-e ndakngge isilepma worak mimi iri ombolwak pem koreyak worala kagi-o. Nde, ndakngge isilepma worak iri na ebem-e Mbal Pem Nagawan imbiri lamut tak pidnak unnu ereba na-ge ebem mbarep parep kagi-o. Nde, ndakngge isilepma worak iri-ge anggul-e tuju, nde, anggul ambo-ge sepulu kagi-o.

⁴ Nde, kwe iri na-ge sum mongga sum mimi irit yirik, nde, imirik umurug-e emas-nen idnak min kerep abinal worak onggo nggok pugwi min mutiara kerep min pago kagi-o. Nde, at inggem-e meya mbilaro ngin mende at-nen mbabi kwaroso iri na kobong tak emas-nen konidnak yimbe iri tena kagi-o.

⁵ Nde, kwe na imbiriwak pem-e unu kura misik mbarak woragaij-o. Nde, unu kura iri-ge: ”Mbabel nggulok, terak ye unpugwi kwami oboksa min nggweyak ma yu me-nen mbilaro ngin mende kwarugwi min iniya-o” luk mbarag-o.

⁶ Nde, an yik kaginggal-e, kwe iri na-ge Mbal Pem Nagawan ilirak min Yesus-ne yidnak yidnak kwarugwi bem-nen indidnak nap min eneyabi ndonggosa ninggidnak pem indi wawa yosola kagi-o. Nde, kwe iri na karug-e wir-o luk yigi-o.

⁷ Wi yosola-ge, aid nap iri na-nen an yak norosolar-e: ”Kar-e noluk-nen wi yusu-o? Kwe iri-nen idnak kura wene min ebem koreyak worasu ndakngge isilepma worak iri-ge anggul-e tuju, anggul ambo-ge sepulu iri-nen idnak wene min yak kirimin-o.

⁸ Ndakngge isilepma worak kaigen iri-ge, nandug-e uruk woragaij-et nde, yawo-ge uruk worasu bug-o. At iri-ge yanem were mbun arem-nen lumarig-e, at lak tak uburak sa mburuwa-o. Nde, nggweyak ma worali nap, o nggweyak yu ndak worak pigit lak ma-net unluk wolmomtak engga arem unnu mbarigit lak nap oboksa-nen-e ndakngge isilepma worak iri karug-e, wi yuwa iri-ge ndakngge isilepma worak iri-ge nanduk uruk woragaij-et nde, yawo-ge uruk worasu bug-o. Nde, tuguruk nam ma iri bem-nen wi yuwa-o.

⁹ Nde, wene yu yenggerak purak pem-e inndi nggat nggat elem irit parugu wolmomtag-o. Anggul tuju iri-ge ndobo tuju kwe iri na koreyak worasu ndobo irir-o. Nde, anggul tuju iri na nagawan tuju-net yili-o.

¹⁰ Nde, it tuju na ennggendumu-nen-e nagawan lima-ge unnu lak yiga-o. Nde, misig-e nagawan-et worasu-o. Nde, misig-e awo men yigit lak worasu-o. At iri na men yuwarig-e, marig-et nak nagawan wolma-o.

¹¹ Nde, ndakngge isilepma worak iri-ge nanduk uruk woragaij-et nde, yawo-ge uruk worasu buk iri-ge delapan tak posolat nagawan iri-net yusu-o. At iri-ge it tuju na ennggendumu woraso-nen at lak tak uburak sa mburusu-o.

¹² Anggul ambo sepulu kaigen iri-ge nagawan sepulu awo o tena bigit lak worali irir-o. Alat nde, it iri na nagawan nggal wolmomtak amawi wok ondosola-ge, ndakngge isilepma worak iri na imin totno satu jam nak nagawan wolma-o.

¹³ Nde, it ap nagawan sepulu iri oboksa inndi misiget nak me, it enmawi min it-nen o tena woragwi min ndakngge isilepma worak iri na inggem puwa-o.

¹⁴ It iri-nen-e Lomba Wam Marik iri na min wim puwa-o. Alat nde, Lomba Wam Marik min at-nen wene mbo unpuruk, len enpaga at imin nugwi nap at-nen yidnak yidnak kwarugwi nap inmin-nen-e nagawan nagawan ereba na-ge urugwe nggwe rak unpuwa-o. Nde, iri yuwa iri-ge Lomba Wam Marik iri-ge ap yok nggok onmbol pem Nagawan Indo, nggweyak ma nagawan oboksa onmbol pem Nagawan me, urugwe nggwe rak unpuwa-o” luk yij-o.

¹⁵ Iri luk, aid nap iri-net an yak norosolar-e: ”Terak yebugwi kwe iri na ebem koreyak worasola kaigen yi iri-ge ap enlem ndomok min ap pik paksa min unuwi nggweyak lombok woragwi min ap enne ndomok min iri-net yusu-o.

¹⁶ Nde, anggul ambo sepulu kaigen iri min ndakngge isilepma worak iri min-nen-e terak yebugwi kwe iri na insili rak puruk, at aringgi arengge oboksa mengga wanuruk, ebe nak ngenwa keya buwa-o. It-nen at ino nonggoluk, kanduk pem lak tak ubuwa-o.

¹⁷ Iri kwaruwa iri-ge Mbal Pem Nagawan-nen at indi-n pidnak na ndak tak puwakluk, it inndi arem yabu wanosola, it inndi mondok misiget luk it-nen o tena woragwi amawi na-ge ndakngge isilepma worak na inggem piga iri-ge Mbal Pem Nagawan-nen yid na oboksa ndak tak puwakluk-nen kwariga-o.

¹⁸ Kwe kaigen iri-ge nggweyak ma worali nagawan nagawan oboksa tena unpuruk woraso o siri nggulok iri-net yusu-o” luk yij-o.