NAM PARA WENE 15 - Nanduk Ngget Tul Pidnak Wene

Aid nap-nen worok tak posolat andi bandi mende waruk lobok yiga wene 15:1-8

¹ Iri luk, an yik kaginggal-e, aid arem-nen kwiye worak mende nggok ija lombok misik kagi-o. Nde, iri-ge, aid nap tuju andi bandi mende woroksiyem tuju min irit kagi-o. Nde, yu-ge Mbal Pem Nagawan-nen at isilepma i worok worok mberak pil mbuma-o.

² Iri luk, yik kaginggal-e, yi koma papalo erare nggal, kanduk min nat karuk irit kagi-o. Nde, tuguruk yik kaginggal-e, ndakngge isilepma worak iri na min at abage nggal ndak worak iri na min at unu-ge yenggerak purak pem nomor pidnak nap iri na min urugwe nggwe rak unpuruk ombol nggwe yidnak nap eneyaigi-o. Nde, ombol nggwe yidnak nap iri na-ge yi koma erare papalo nggal iri na eyak pem mendak-nen Mbal Pem Nagawan-nen wok indidnak kecapi poba tena woragola, eneyaigi-o.

³ It-nen ndawi yogolar-e, Mbal Pem Nagawan ndegel oboso nap Musa min Lomba Wam Marik na min endawi yogolar-e, yu nggal yiga-o: ”Amawi Mondok Kwarat worak Nagawan Indo Mbal Pem Nagawan wa-e. Kat-nen kwaroso-ge nggulok, kwiye worak-net yusu-o. Ap enlem oboksa ennggendumu Nagawan wa-e. Kat-nen kwaroso-ge ndemeret mot mot nak kwaroso-o.

⁴ Nagawan Indo wa-e. Kat kaye kaso buk nab-e ta-o? Kat kunu kek tak purak isili yusu nab-e ta-o? Kat karig-et nak lenak kek tak woraso-nen yusu-o. Kat-nen lud tak nak kwaroso iri-ge ap oboksa-nen nam-et nak kali me, ap enlem oboksa kat keram lobok yuwarik, kat kerembel wanuwa-o” luk yiga-o.

⁵ Iri yogola, yik kaginggal-e, Mbal Pem Nagawan wi aid arem woraso iri na kuwara nam yosolar-e, Mbal Pem Nagawan woraso wam aboro-nen wiridnak wi na-ge arem kagi-o.

⁶ Iri luk, Mbal Pem Nagawan ama-nen-e aid nap tuju iri-ge andi bandi mende tuju min waiga-o. Nde, it unsum-e konak abinal yerek nggorek tak iri yirik, nde, inmigwag-e emas-nen konidnak kere logoksa yirik irit waiga-o.

⁷ Iri luk, untugup worak mende empat ereya na ennggendumu misik-nen-e aid nap tuju iri wok ondosolar-e, urug-et pem-et woralik nalik woraso Mbal Pem Nagawan isilepma kobong tak emas-nen konidnak yimbe tuju irit wok indij-o.

⁸ Nde, Mbal Pem Nagawan abinal min at amawi min-nen idnak kule iri-nen-e Mbal Pem Nagawan wi iri me yebet yij-o. Nde, aid nap tuju-nen waruk lobok yidnak andi bandi mende iri na awo lak yigit lak worala-ge, ap misiger-o luk tet Mbal Pem Nagawan ama ngguwa bug-o.