NAM PARA WENE 13 - Nanduk Ngget Tul Pidnak Wene

Ndakngge isilepma worak mberen 13:1-18

¹ Iri luk, an yik kaginggal-e, yi koma arem-nen ndakngge isilepma worak misik nam yosola kagi-o. At iri anggul ambo-ge sepulu, nde, anggul-e tuju woragaij-o. Nde, anggul ambo ereya na bem iritsa nagawan-nen yurugwi topi pago, nde, anggulwak ereya na bem iritsa unnu-ge Mbal Pem Nagawan obok pugwi na mbarag-o.

² Ndakngge isilepma worak kagi iri abage-ge macan tutul (singa wembebenggek) abage nggal, at ijog-e beruang ndakngge ijok nggal, isileb-e singa ndakngge isilep nggal irit kagi-o. Nde, waro nggulok iri-nen ndakngge isilepma worak iri wok tosolar-e, at ambik arong min at-nen idnak nagawan koreyak woraso ondoro min at-nen o tena woraso amawi min irit wok tij-o.

³ Ndakngge isilepma worak anggul ereya na enggendumu misig-e wat momtak ud nggal woragaij-et nde, ud na ambut yidnag-o. Iri ala karuk, nggweyak ma nap oboksa-nen-e wir-o luk, ndakngge isilepma worak iri na langga luk mbiriga-o.

⁴ Waro iri-nen at tena woraso amawi-ge ndakngge isilepma worak iri wok tidnak pem, ap oboksa-nen waro na erembel wanogolat, ndakngge isilepma worak iri na erembel wanogolat-nen yosolar-e: ”Ndakngge isilepma worak yu imin ndak ndag-e ta-o? Ta nggal-nen at imin wim puwa-o?” luk yiga-o.

⁵ Ndakngge isilepma worak iri emendam nggwe-nen-e at ambik kek yosolat, Mbal Pem Nagawan ebem imbiri lamut wene yuwakluk keya bosolat, at-nen o tena worasolat waneya empat pulu dua (42) nak wolmakluk Mbal Pem Nagawan-nen keya nak ibij-o.

⁶ Keya bamu-ge, at iri na emende nggwe-nen imbiri lamut wene yosolar-e, Mbal Pem Nagawan na imbiri lamut tak obosolat, Mbal Pem Nagawan unu min at woraso wi min aid arem woragwi nap oboksa min inmbiri lamut tak inpij-o.

⁷ At iri-ge Mbal Pem Nagawan winde nap inmin wim mbatluk, it urugwe nggwe rak onposolat, ap enlem tak oboksa min ap unuwi nggweyak lombok woragwi min ap enne lombok min ap enlem oboksa min tena unpuruk wolmomtak amawi-ge at wok tij-o.

⁸ Nde, nggweyak ma worali nap oboksa-nen at erembel wanuwa-t nde, nggweyak yu awo ndak wirigit lak ma-net wiridnak Lomba Wam Marik-nen idnak engga unluk nak wolmomtak iri na bem unnu mbaridnak nap-nen-e at erembel wanuwa bug-o.

⁹ Iri bem-e ta-nen nde eyanggo worak ala-ge, wene yu kuluwag-o!

¹⁰ Ap-nen mondok yemen unpuwag-o yidnak nab-e yemen-et unpuwa-o. Nde, yalawi bem unduwag-o yidnak nab-e ndemeret yalawi bem unduwar-o. Iri bem-nen Mbal Pem Nagawan ilirag-e mondok inndi luruk puruk, inndi angin tubu luk wolmomtag-o.

¹¹ Iri luk, an yik kaginggal-e, ndakngge isilepma worak misig-e nggweyak arem-nen nam yosola kagi-o. At iri anggul ambo-ge lomba wam marik anggul ambo nggal mberen kagi-o. Nde, at ene perak waro iri na ene nggal-o.

¹² At iri-ge ndakngge isilepma worak nanduk iri-nen tena woraso amawi iri bem-et kwarosolar-e, nggweyak min nggweyak ma woragwi nap oboksa-ge ndakngge isilepma worak nanduk wat momtak uj-et ambut yidnak ndakngge iri na erembel waner-o luk watsa yak indij-o.

¹³ Nde, ndakngge isilepma worak misik (yang kedua) iri na-nen kwiye worak mende nggulok kwarosolat, ap oboksa enlengen pem at-nen mbal nggwe-nen nggweyak ma kanduk pil mbuwagaij-o.

¹⁴ At iri na-ge ndakngge isilepma worak nanduk na-nen wok tid amawi bem-et at imbiri bem-et kwiye worak mende kwarat kwarosolar-e, nggweyak ma woragwi nap oboksa onmbol pem lagaij-o. Nde, at ene amawi bem watsa nggweyak ma woragwi nap oboksa yak ondosolar-e: ”Yalawi bem wiridnag-et nde, urug-et worasu ndakngge isilepma worak iri na erembel wanuwoklug-e, at nggal ndak worak puruk, erembel waner-o” luk yak indij-o.

¹⁵ Nde, at yu na amawi wok tosola-ge, ndakngge isilepma worak nanduk iri na abage ndak worak arem at-nen indisep pil nggosola, uruk tak posola, ene worak yij-o. Ene worak lug-e, at erembel wanigit lak nap oboksa-ge indij-o.

¹⁶ Ndakngge isilepma worak iri na ene amawi bem-nen ap oboksa, ap nggulok nde marik nde insilobulo worak nde insilobulo lak nde ndegel unpugwi nap nde wisirik woragwi nap nde it oboksa enpem-e yenggerak purak mende pogolar-e, ininggi kigit nggwe, are, inmbiriwak pem irit mbarak pij-o.

¹⁷ Nde, ndakngge isilepma worak iri unu ala na, at unu nggal at wonat ibidnak nomor yenggerak purak mende iri enpem worak nap iri nak-nen onggo pogolat, onggo wanogolat ma-o.

¹⁸ Yu yenggerak purak pem-e inndi nggat nggat worak irit wolmomtag-o. Nde, nomor iri-ge ap misik unu-t me, inndi nggat nggat worak nap-nen-e nomor enam ratus enam pulu enam (666) iri-ge no yosolat-nen yij-o luk kwara wonaruwa-o.