NAM PARA WENE 11 - Nanduk Ngget Tul Pidnak Wene

Ap mberen Mbal Pem Nagawan-nen yidnak wene yak ondogola, indidnak wene 11:1-14

¹ Yak nutlug-e, e misik ndak wurugwi wangun nggal wok nutluk-nen an yak norosolar-e: ”Kar-e mburugundik, Mbal Pem Nagawan wi min Mbal Pem Nagawan amanggim wam wosa pugwi ondoro min ndak wutluk, o iri me-nen Mbal Pem Nagawan erembel wanugwi nap na wonat inpi-o.

² Alat nde, Mbal Pem Nagawan wi mborom mbepme nggwe iri-ge ndak wururak pug-o. Nde, iri me-ge Mbal Pem Nagawan enaru buk nap wok indidnak-nen yusu-o. Nde, iri me it-nen-e waneya empat pulu dua (42) woragolat-nen Konak O Siri iri me-ge unuwok-nen alabara keya bogolat wolma-o.

³ Nde, an nene yugwi nap mberen unsum-e tabun puruk woragolat-nen yurugwi sum yutluk, Mbal Pem Nagawan-nen yidnak wene ap yak ondogolar-e, seribu dua ratus enam pulu (1,260) tarem wolma-o” luk yak nirij-o.

⁴ Mbal Pem Nagawan-nen yidnak wene yugwi nap mberen ereya-ge o nggweyak yu ndak wirid Nagawan Indo urugwe nggwe mendak worasu e saitun mberen min tal ondogwal mberen min-nen yili-o.

⁵ Nde, ap-nen nde it andi bandi rak unpuwokluk sil eneyagola-ge, it enmendam nggwe-nen kanduk yirip wirip wasolar-e, it inmin wim nap iri-ge nok unpuwa-o. Nde, it andi bandi rak unpuwokluk yuwa nab-e iri nggal kwasa wat ma-o.

⁶ Ir-e Mbal Pem Nagawan-nen yidnak wene yogolat woragola, talme mbuma naru, mbal tu imig worak puruk amawi-ge it ininggem wolma-o. Nde, yi ulusu oboksa eyabi worak tak purak amawi na it ininggem wolma-o. Nde, o nggweyak yu lak tak purak mende oboksa amawi-ge it inndi-nen ”Iri mende-t kwat mag-o” luk peragola-ge, kwar-et ma-o.

⁷ Nde, it-nen Mbal Pem Nagawan-nen yidnak wene abu tumbutluk, ndak ala-ge, were mbun arem-nen luwaidnak ndakngge isilepma worak iri-nen it inmin wim mbatluk, urugwe nggwe rak unpuruk, unduwa-o.

⁸ It ontogwag-e o siri nggulok it Nagawan Indo na e lang pang tak pem wiridnak sa tulabiyem mbud tak wolma-o. Nde, o iri unu-ge nden karuk wene bem-e Sorom ala na, Mesira ala na irir-o.

⁹ Nde, ap enlem oboksa-nen na, ap enlem tak oboksa-nen na, ap enne oboksa-nen na ap unuwi nggweyak lombok woragwi oboksa-nen na it ontogwak kagolar-e, kenan nene luk, misik pem lengge-ge (3 ½ hari) yapma unpuwokluk yukmu, ”Yapma unpurag-e lag-o” luk yiga-o.

¹⁰ Nggweyak ma woragwi nap-nen-e Mbal Pem Nagawan-nen yidnak wene yugwi nap mberen iri wat yidnak pem enalin enalen kujwa-o. Mbal Pem Nagawan ene lomboksa yugwi nap mberen iri-nen-e nggweyak ma woragwi nap oboksa enpem andi bandi mende pidnak me, ir-e kijik kijak worogolar-e, it insilobulo-ge we wok kerak mbuwa-o.

¹¹ Nde, kenan nene luk, empat tak purak pem-e (3 ½ hari) Mbal Pem Nagawan-nen-e unluk tak purak indisep mbi pil lobok yosola-ge, Mbal Pem Nagawan-nen yidnak wene yugwi nap mberen na enarem nggosola, it na men yogola-ge, it eneyaiga nap oboksa-ge kwiye kwarat kaiga-o.

¹² Nde, mberen nap iri-nen kuliganggal-e, aid arem-nen ene ngguloksa it wene mbo onposolar-e: ”Yu me lumer-o!” luk yak ondosoloma-ge, it unuwim nap na enlengen pem nggan nggan-nen muruksa keya unpuruk, aid arem laiga-o.

¹³ Ereya na-net o mid kwiye worak yosolar-e, o siri iri me erep minggirik (sepersepulu) tud yil lobok yosolar-e, ab-e tuju ribu (7,000) o mid iri-nen worak inpij-o. Nde, ap erep ereba na-ge kwiye kwarat luk, aid arem woraso Mbal Pem Nagawan erembel waniga-o.

¹⁴ Mberen pem tak posolat andi bandi rak inpid mende-ge lak yij-et nde, ker-o! Kenan pem tak posolat andi bandi rak unpurak mende-ge imbirik yanem wok ma-o.

Tuju bem tak posolat posid poba ene yid wene 11:15-19

¹⁵ Iri luk, tuju bem tak posolat aid nap iri-nen oboba ene yij-o. Yosoloma-ge, aid arem-nen enne ngguloksa yogolar-e: ”Nggweyak ma wi yu tena wolmomtak amawi-ge nit Nenagawan Indo min at-nen lena mendak ibidnak Kerisut min ininggem worasu-o. Nde, at-nen tena buruk worasolar-e, pem-et woralik nalik irit wolma-o!” luk yiga-o.

¹⁶ Nde, Mbal Pem Nagawan urugwe nggwe nagawan koreyak woragwi bem koreyak woragwi enne kulugwi nap dua pulu empat (24) ereya na-ge entare nggwe yud tud mburuk, Mbal Pem Nagawan erembel wanogolat-nen

¹⁷ yogolar-e: ”Amawi Mondok Kwarat worak Nagawan Indo Mbal Pem Nagawan wa-e. Kar-e nanduk na woraigen, yawo na worasur-o! Kat kamawi nggulok iri na bem o nggweyak tena bigen pem-e wiwa-o yak kitli-o!

¹⁸ Kat kisilepma nggilara mberak purak tarem wok yosolat, wat yidnak nap enpem wene mbarurak tarem wok yosola karuk, it Mbal Pem Nagawan enaru buk nab-e insilepma yili-o. Nde, kat ndegel kubugwi nap, Mbal Pem Nagawan ene lomboksa yugwi nap min kat kilirak, kat kaye kagwi nap oboksa nggok-nen marik-nen it onggo wok undurak tarem-e wok yij-o. It nggweyak ma yu lak tak pugwi nap lak tak unpurak tarem-e wok yij-o!” luk yiga-o.

¹⁹ Iri luk, Mbal Pem Nagawan ama aid arem na nam yaga labuk yosolar-e, arem urul pidnak wene labu mberak woraso na-ge nam yij-o. Nam yosola-ge, obinel yebek yosolat, o nggu lu nggu mborosolat, o lele yosolat, talme engen ndamosolat yij-o.