NAM PARA WENE 10 - Nanduk Ngget Tul Pidnak Wene

Aid nap min engga marik linggisa yunggurik min 10:1-11

¹ Iri luk, yik kaginggal-e, amawi worak nap misig-e aid arem-nen mbuwasola kagi-o. At iri na-ge nggan nggan-nen mbeyok tak, yelepma misig-e at anggul pem waringgik, erare-ge molengen yaya nggal, owag-e kan amare nggal-o.

² Nde, inggem-e engga marik linggisa yunggurik wisirik misik tena. Nde, ijok kigit nggwe yi koma bem mendak, ijok kware nggwe-ge nggweyak pem mendak woralat-nen

³ ene ngguloksa yid iri-ge singa ndakngge ene ngoro yoso nggal irit yij-o. Nde, aid nap iri-nen ene nggoksa yosoloma-ge, o nggu tuju-nen ene nggu bem wene na erep nggarij-o.

⁴ Nde, o nggu tuju iri-nen wene yosola, ereya na-net wene iri na engga bem peyekluk yigi-t nde, an kuliginggal-e, aid arem-nen ene misik-nen yosolar-e: ”O nggu tuju-nen yidnak wene iri-ge kura pi-o. Engga bem purak pug-o!” luk yij-o.

⁵ Iri luk, yi koma bem na, nggweyak pem na mendak worala kagi aid nap iri-nen-e inggi kigir-e mbal nggwe nuk karuk,

⁶ owak mbarosolar-e, urug-et woralik nalik woraso Mbal Pem Nagawan, mbal min mbal ebem woraso mende min nggweyak min nggweyak ebem woraso mende min yi koma min yi koma arem woraso mende min ndak worak pid Mbal Pem Nagawan na unu bem owak mbarosolar-e: ”Kwarurak tarem-e mondok mborok tak puwa bug-o.

⁷ Alat nde, aid nap imbirik (yang ketuju) iri-nen oboba ene pu yuwa tarem-nen-e Mbal Pem Nagawan indi-n pidnak kura woraso na-ge at ndegel ubugwi nap, at ene lomboksa yugwi nap na urul yak indid na-ge iri tarem-et ndak tak puwa-o” luk yij-o.

⁸ Iri luk, mondog-et aid arem-nen yosola kuligi ene iri-nen tuguruk yak norosolar-e: ”Kar-e mburugundik, owak misik yi koma bem owak misik nggweyak pem mendak worasu aid nap iri na inggem worasu engga mbarak marik wisirik iri wani-o” luk yak nirij-o.

⁹ Yak norosola-ge, an-e aid nap iri na eram mbirigirik, engga mbarak marik iri nggi yigi-o. Nggi yosolakmu-ge, at-nen yak norosolar-e: ”Wanugundik min-o. Kat kurum arem-nen-e ngari ma-t nde, kemendam-nen-e undu konak tamuk amburu undu nggal ma-o” luk yak nirij-o.

¹⁰ Nde, an-e at inggem-nen engga mbara marik iri na waga ninggi-o. Nasoma-ge, undu konak tamuk amburu undu nggal nama bem ndop nok yij-et nde, lungguk mberabiginggal-e, nurum arem-nen-e ngari yij-o.

¹¹ Nasola-ge, an yak norosolar-e: ”Kar-e Mbal Pem Nagawan-nen-e ab-e ap oboksa min ap enlem oboksa min ap enne ndomok oboksa min it nagawan nagawan pidsa min kwat unpurak kirimbi tuguruk yak indil mbiri-o” luk yak nirij-o.