MIKA 6 - Nanduk Ngget Tul Pidnak Wene

Nagawan Indo-nen: ”Kit Isarael nab-e meya iri nggal kwatli-o” luk yak indid wene 6:1-5

¹ Nagawan Indo-nen: ”Kit Isarael nab-e meya nggal kwatli-o” luk yak undusu iri kwara koler-o. Nagawan Indo wa-e. Menluk, it-nen kwarugwi iri-ge inmbiri wiri-o! Kat-nen yugun wene iri-ge ndobo-nen na irit, ndobo amun-nen na irit, mondok kuluwag-o.

² Ndobo min nggweyak mabin min wa-e. ”It iri-ge meya iri nggal kwatli-o” luk Nagawan Indo-nen yuwa wene iri-ge kwara koler-o! At iri-ge at ilirak Isarael nap inmin wene worala, ”Ndak ngge kwarugub-o?” luk enpem kere yusu-o.

³ Nagawan Indo-nen yosolar-e: ”Nilirak wa-e. An-nen-e kir-e no kwat kinpigi-o? An-nen kit anggun panggun tak kinpigi wene ebe-ge ngge-o? Ndak wene onggo yak nerer-o.

⁴ Kir-e Mesira iri me-nen lel mberel konpogolat worakmu, an-nen lesa wok kunpuruk lobok yigi-o. Nde, kit lit kunpuruk lobok yuwaklug-e, an-nen-e Musa min Arun min kwe Miriam min lenak inpigi-o.

⁵ Nilirak wa-e. Moap nagawan Mbalak-nen kit kwat kunpurak yemnak puruk worala, Mbeyot ambara Mbileyam-nen-e wene onggo yak tid iri na kinndi yebet ker-o. Kit lobok yogolat tu ndumu kit woraigen sa o Sitim wok, Nggilnggal wok, ereya lobok yogolat kwat yidnak ereba na mbi kinndi yebet ker-o. Kit-nen nde ereba kwat kinpigi ereba na oboksa yebet kagolat nggal-nen-e an-nen kinmiri yosolat kwat kinpigi ereba-ge ’O! Iri nggal kwat ninpigen-o!’ luk yebet kudtag-et nde yili-o” luk yak indij-o.

Nagawan Indo indingen mende at amanggim pugwi wene 6:6-16

⁶ Nit nde Nagawan Indo erembel wanuwokluk lobok yogolar-e, Nagawan Indo Mbal Pem Nagawan aid arem woraso iri na amanggim-e no mende pul-o? At amanggim wosa kan pogolar-e, sapi wam mondok usul omok worag-et at amanggim kan pul, lak?

⁷ Nit-nen-e lomba wam kwarat (beribu ribu) ala na, e saitun engen amburu kwarat kuruk kuruk mborosola ala na waruk mburulndik, Nagawan Indo amanggim pogola-ge, Nagawan Indo-ge indingen kujwa, lak? Are, nit meya yidnak onggo nit nenla manggiya wosa pul, lak?

⁸ Iri nggal-e lag-o. Nagawan Indo-nen-e konak kwarurak irit mirik ninpij-o. Nde, iri-ge nit-nen kwarurak nenpem pusu-ge yu-o: Nit-nen mot mot kwarogolat, pempa enabuwa kagwi nggok tak pogolat, ninndi tebe luk, Nenmbal Pem Nagawan iri na imin kundik woragolat kwarurak irit nenpem pusu-o.

⁹ Nde, Nagawan Indo indi aye worak woragwi iri perak inndi nggat nggat tak poso-nen yusu-o. Nagawan Indo-nen o siri iri me woragwi nap yak ondosolar-e: ”Kit o silmu ndok witli nap wa-e. Kwara koler-o!

¹⁰ Nde, meya yugwi nap enma-ge ap enmberam lagolat-nen wanidnak silobulo worasu-o. Iri kwarogolar-e, ndak wosa onggo wanugwi iri na lugudsa ndak wurugwi iri-ge an-e nisili kaso-o. Nde, iri kwarugwi nab-e an-nen angin worak enpem pimin-o.

¹¹ Enesiget lugudsa angin ndak wurugwi nab-e an-nen it-nen meya kwarugwi ereba na namberam tak purag-e ndag-a?

¹² Kit o silmu woragwi nap kinsilobulo worak-nen-e insilobulo lak nap lel inpili-o. Kit oboksa-net kennesiget yugwi nap nak-nen yili-o.

¹³ Nde, yawo-ge kit-nen meya kwat tenak woragwi bem an-nen kondosolat, yigisa keya konposolat kwaroso tel kurusu-o.

¹⁴ Kir-e nunggwi mende-ge nunggub-et nde, kinmbir-e ma bug-o. Pem irit nere nak woragub-o. Kir-e silobulo-ge mburunuruk mburugub-et nde, imiri mbara ndok wosa-ge pugup pug-o. Kit-nen ndok wosa pugup mende ereba na-ge an-nen wim pem yigisa keya bimin-o.

¹⁵ Kir-e nggandum mbato uwi pil kagub-et nde, ebe-ge mbarugup pug-o. Kir-e saitun engen amburu mbetla kenanggugub-et nde, amburu ereba na bem-nen mbi kwarugup pug-o. Kir-e anggut engen amburu mbulugub-et nde, engen amburu-ge kit-nen-e nunggup pug-o.

¹⁶ Nde, iri kwat kunpuwa iri-ge Nagawan Omiri min at ambara Nagawan Agap min-nen meya kwarugwi ereba na langgal luk mburugwi iri na-nen ndowaga iri nggal kwat kunpuwa-o. Kir-e it-nen kwarugwi ereba na kwatli iri bem-e mondok yigisa lak tak kinpimin-o. Kir-e ap enlem oboksa-nen-e konpok pogolat, pesel konpogolat kwat kunpuwa-o” luk yij-o.