MBIRIGA WENE 7 - Nanduk Ngget Tul Pidnak Wene

¹ Yosoloma, Nagawan Indo-nen Musa yak tosolar-e: ”Nagawan iri imin-e kar-e Mbal Pem Nagawan an nggal kwat kibimin-o. Nde, kowe Arun iri-ge kat kene lomboksa yoso nap ma-o.

² Kat-nen kwarurak an-nen yak kirigi wene ereba na-ge oboksa Arun yak ti-o. At-nen nagawan iri yak tosolar-e: ’Isarael nab-e Mesira keya buruk mburuwak-nen lerak inpi-o’ luk yak tuwag-o.

³ Alat nde, an nen nagawan iri-ge indi amawi rak posola, lak tak unpurak mende kwarat Mesira iri me enpem pimin-et nde, at-nen-e kat kene-ge ’No wene yusu?’ nggal tak puruk indi amawi irit ma-o.

⁴ Iri bem-e an-nen Mesira enpem wene mbarosolar-e, angin worak irit mberak pimin-o. Iri rak purug-e an nelem nap Isarael nap oboksa Mesira-nen wok unpuruk mborosola-ge,

⁵ an-nen Mesira nab-e angin worak enpem puruk, Isarael nab-e Mesira-nen wok unpuruk mborosola-ge, it Mesira nap-nen neberagolar-e: ’Ndemeret Nagawan Indo-nen yusu-o’ luk enaru ma-o” yij-o.

⁶ Nde, Musa min Arun min-e Nagawan Indo-nen kwarurag-o luk enpem pid ereba na-t kwariga-o.

⁷ Musa-ge olengen-e delapan pulu (80) bem, nde, Arun-e olengen delapan pulu tiga (83) bem-nen woragolar-e, iri bem-e it enmbereg-e Mesira nagawan iri na eram wok luk wene yak tiga-o.

Arun owangun wene 7:8-13

⁸ Nagawan Indo-nen Musa min Arun min yak ondosolar-e:

⁹ ”Mesira nagawan iri-nen nde: ’Kir-e ndemeret yili-o luk yenggerak peyek-nen kwiye worak mende mbi kwarer-o’ yosola-ge, Arun iri yak turag-o. Owangun iri-ge inggem-nen nagawan eram-et nggweyak ma mbud tak purag-o. Iri yosola-ge, wangun irit nde, waro kwat ma-o” yak indij-o.

¹⁰ Yak ondosoloma, Musa min Arun min na-ge mbirigarik, Mesira nagawan iri na eram wok yogolar-e, Nagawan Indo-nen kwarurak yak indid iri na nggal-et kwarogblar-e, Arun-nen-e nagawan min at ndegel ubugwi nap min inmbiri bem wangun iri na nggweyak ma mbud tak pidnggal-e, wangun na-ge waro nde kwat yij-o.

¹¹ Iri na karug-e, Mesira nagawan iri na-nen na at nap yi iminep ndi iminep enaru nap min kagwi buk mende kwarugwi nap min wene mbo enpamu, it-nen na iri na nggal-et kwarogolar-e,

¹² it onowangun nggweyak ma mbud tak piganggal, waro irit kwat yij-et nde, Arun owangun iri na-nen it onowangun yeba na-ge ninggij-o.

¹³ Iri nggal-et karug-et nde, Mesira nagawan iri-ge mondok indi amawi luk, Musa min Arun min-nen yidnak wene-ge no mende nggal tak posolat woragid iri-ge, Nagawan Indo-nen yid iri na ndak ndag-et kwarij-o.

Lak tak unpurak mende Mesira enpem mbidnak wene 7:14–11:10 Yi eyabi worak yidnak wene 7:14-25

¹⁴ Iri luk Nagawan Indo-nen Musa yak tosolar-e: ”Nagawan iri-ge mondok indi amawi yosolat Isarael nab-e ’Mberer-o’ luk lerak unpusu buk me,

¹⁵ kar-e nagawan iri-ge yi Nil arem mbuwasoma, kar-e imin lid pid yekluk, kubu kabu eram mbiri-o. Mborosolar-e, wangun waro kwat yoso iri waruk mburugundik, yik karok yi Nil eyak pem wolmin-o.

¹⁶ Worasoma, lobok yosola-ge, kat-nen nagawan iri yak tosolar-e: Iberani nap Enmbal Pem Nagawan, Nagawan Indo-nen kat keram nibil lobok yid iri-ge, kat-nen at elirak lerak onposola, at erembel wanuwakluk nembaga ereba mbururak wene kat yak kururak nibil lobok yij-et nde, yawo na kar-e an nene kulusu buk me,

¹⁷ Nagawan Indo-nen yu nggal yij-o: ’An-nen kwarimin iri bem-nen an nimin-e ar-e Nagawan Indo-nen yusu-o luk karu ma-o.’ Wangun ninggem yu bem-nen yi lel kamu, yi eyabi worak ma-o.

¹⁸ Iri yosolar-e, keyane oboksa wat yosolat, yi min emben to yosola, Mesira nap-nen-e yi norag-e insili ma-o yak ti-o” yij-o.

¹⁹ Iri luk, Nagawan Indo-nen Musa yak tosolar-e: ”Arun iri yak ti-o. Wangun iri wanuruk inggi-ge Mesira iri me yi oboksa ambigit min inid mborop ndimiril lobok yidnak ereba min inid ugup ereba min ambigit nuk kujwag-o. Iri yosola-ge, yi oboksa min Mesira nggweyak oboksa min ereba me-ge e-nen konidnak yimbe min nggweyak-nen konidnak yimbe min arem na oboksa eyabi worak ma-o” yij-o.

²⁰ Yosoloma-ge, Musa min Arun min na-ge Pirayon min at ndegel ubugwi nap min inmbiri bem-et Nagawan Indo-nen yak indidnak wene ereba na kwarogolar-e, Arun-nen owangun na wanosolar-e, yi Nil ombol pem lel kagaij-o. Iri yosola-ge, yi ereba na eyabi worak yij-o.

²¹ Iri yosola-ge, yi yeba na arem woraso keyane oboksa wat yosolat, yi na emben to yosolar-e, Mesira nap-nen yi ereba norag-e meya kwat yij-o. O Mesira uwi oboksa eyabi worak irit agaij-o.

²² Alat nde, Mesira woragwi nap kagwi buk mende kwarugwi nap-nen na enaru yidnak pem kagwi buk mende iri na nggal-et kwarogola-ge, nagawan iri na-ge indi amawi irit woragij-o. Iri kwarid iri-ge Nagawan Indo-nen yosolar-e: ”Musa min Arun min kenne-ge kuluwa bug-o” yid iri na ndak ndag-et kwarosolat kwarij-o.

²³ Nde, kwiye worak kwat yid iri na-ge mondok te rak puruk, at na-ge at ama mbirij-o.

²⁴ Nde, Mesira nap oboksa-ge yi Nil norag-e meya me, yi norak kore yogolat yi eyak eyak nggweyak yalil mbiriga-o.

²⁵ Nagawan Indo-nen yi Nil eyabi worak tak puruk keya bamu, ombol nggwe-ge tuju tarem woraiga-o.