MBIRIGA WENE 6 - Nanduk Ngget Tul Pidnak Wene

¹ Yak tosola-ge, Nagawan Indo-nen Musa yak tosolar-e: ”Yawo-ge an-nen nagawan iri kwat ibimin-e kagun-o. An-nen angin worak ebem posola-ge, an nelem nap iri-ge wisirik unpuwa-o. Nde, an-nen angin worak ebem posola-ge, at-nen-e it iri-ge o yu me-nen mburuwakluk langgara wirik unpuwa-o” yak tij-o.

Mbal Pem Nagawan-nen Musa wene mbo bid wene 6:2-13

² Mbal Pem Nagawan-nen Musa yak tosolat-nen yosolar-e: ”An-e Nagawan Indo-nen yusu-o.

³ An-e Abarakam min Isak mid Yakup min inmbiri bem an nondomok-net nam yaga mirik onposolar-e, Mbal Pem Nagawan Namawi worak irit mirik inpigi-t nde, an nunu Nagawan Indo perak nde nam para mirik inpigit lak yigi-o.

⁴ An-e it inmin-e urul pi-net yak undukmu-o. An-nen urul yak ondosolar-e: ’Kit nanduk ap sal nggal woraigep sa o Kanaan iri-ge kir-e wok kindimin-o’ luk urul yak undukmu-o.

⁵ It Isarael nap iri-ge Mesira nap-nen mumnggup manggim tak onpogola, enarem-nen yane witli iri kolosolar-e, an-nen urul yak indigi iri na nindi yebet kasu-o.

⁶ Iri ala, an-nen yak undusu wene yu Isarael nap yak ender-o: ’An-e Nagawan Indo-nen yusu-o. Mesira nap-nen mumnggup manggim tak kunpuruk anggun panggun tak kinpili iri ge ininggiyapma-nen wisirik kinpimin-o. An namawi ija lombok nam tak posolar-e, kir-e kinmiri yosolat, nde, Mesira nab-e angin worak mende nggok lombok enpem pimin-o.

⁷ Iri yosolar-e, kir-e an nilirak tak konposolat, nde, an-e kit Kenmbal Pem Nagawan kwat yimin-o. Nde, kit Mesira iri me-nen mumnggup manggi rak kinpili nap iri ininggem-nen wisirik konposola-ge, an nimin-e ”Ar-e nit-nen idnak Nagawan Indo Mbal Pem Nagawan-nen yusu-o” luk kenaru ma-o.

⁸ An-nen Abarakam min Isak min Yakup min nggweyak yu wok kindimin-o luk owak mbara urul yak indigi nggweyak iri-ge kit wok kundumu pem mondok kit kunuwi nggweyak irit wolma-o. An-e Nagawan Indo-nen yusu-o’ yak ender-o” yij-o.

⁹ Yosoloma, Musa-nen e Nagawan Indo-nen Isarael nap yak indidnak wene ereba-ge oboksa Isarael nap yak indij-et nde, it kwarat anggun panggun tak inpili iri na-n ndowaga inndi kabak yogolar-e, Musa-nen yak indidnak wene-ge no mende nggal tak piga-o.

¹⁰ Iri yogola, Nagawan Indo-nen Musa yak tosolar-e:

¹¹ ”Kar-e Mesira nagawan iri eram mburugundik yak tosolar-e: ’Isarael nap iri-ge o yu keya buruk mburuwag-o’ luk yak ti-o” yij-et nde,

¹² Musa-nen onggo yosolar-e: ”It Isarael nap-nen perak nde an nene-ge kulili buk yu-ge, nggesa-nen Mesira nagawan-iri-nen-e wene yoso buk an nggal yu nene-ge kuluwa-o?” luk yosola-ge,

¹³ Nagawan Indo-nen-e Musa min Arun min yak ondosolar-e: ”Isarael nap lit unpuruk Mesira-nen mbururak yabu kit kenpem pigi wene na-ge Isarael nap min Mesira nagawan iri na min yak indil mberer-o” yak indij-o. 6:14-27 Ayat ya arem-e Lewi-nen wigarak Musa min Arun min onowene min Arun-nen wigarak erep unnu min mbarak worasu-o.

Nagawan Indo-nen Musa min Arun min ”Iri nggal kwarurag-o” luk yak indidnak wene 6:28–7:7

²⁸ Mesira-nen Nagawan Indo-nen Musa yak tosolar-e:

²⁹ ”An-e Nagawan Indo-nen yusu-o. Nde, an-nen yak koroso wene ereba oboksa-ge Mesira nagawan iri yak ti-o” luk yak tij-et nde,

³⁰ Musa-nen erep nggarosolar-e: ”An wene yoso buk iri-ge Nagawan Indo kar-e karu-o. Nggesa-nen nagawan iri an nggal nene-ge kuluwa-o?” luk yij-o.