MBIRIGA WENE 5 - Nanduk Ngget Tul Pidnak Wene

Musa min Arun min Mesira nagawan iri na eram mbiridnak wene 5:1-21

¹ Nde, Musa min Arun min mbirigarik, Pirayon eram wok yogolat-nen togolar-e: ”Isarael nap Enmbal Pem Nagawan, Nagawan Indo-nen yu nggal yak kurusu-o: ’An nelem nap iri-ge nembaga ereba an nerembel wil mburuwak-nen lerak inpi-o’ luk yak kurusu-o” luk yak togolikma-ge,

² Pirayon-nen yak ondosolar-e: ”Nagawan Indo iri-ge ta-o? An-e at ene kuluruk, Isarael nab-e lerak keya unpumu, mburuwa? An-e Nagawan Indo iri-ge naru bug-o. Isarael nab-e ’Mberer-o’ luk mondok lerak inpimin pug-o” yak indij-o.

³ Iri yosoloma, Musa min Arun min-nen yogolar-e: ”Iberani nap Enmbal Pem Nagawan-e nit ninmbiri bem nam yidnak me, ’Mberer-o’ yak nundugunmu, nir-e nit Nenagawan Indo amanggim wam wosa kan puwokluk mborogolat nembaga ereba me tundumu mberen nene yuwok-nen lerak ninpi-o. Nde, nit-nen nde iri kwarigit lak ala-ge, Nagawan Indo-nen-e kugwi bem-nen ala na, wim pem-nen ala na mondok nunduwa-o” yak togolikma,

⁴ Pirayon-nen Musa min Arun min yak ondosolar-e: ”Kir-e noluk-nen ap ereba-ge eneyabu wanukmu onmbol wonok tak pili-o? Ap mumnggup manggim ereba-ge ’Yabu waner-o’ yak ender-o.

⁵ Yik ker-o. Kit kenlem nab-e lambuksa-ge kwarat yili-o. Nde, yawo kir-e it yabu wanigit lak we wolmakluk yili keneyagi-o!” luk yak indij-o.

⁶ Yak unduruk, iri tarem-net Pirayon-nen yak ondosolar-e, Isarael nap yabu enpem pugwi Mesira nap na min Isarael nap ennggendumu it yik eneyarok wolmakluk lenak inpidnak nap min Pirayon iri na-nen wene ene amawi min watsa enpem posolar-e:

⁷ ”Nde, mondok yawo kuri-nen-e it nggweyak kerep woraguwakluk tuguruk nggandum mbato ariwak it Isarael nap yu-ge wok undurak pug-o. It ondomok-net kore yil mburuwakluk keya unpurag-o.

⁸ Nde, it iri-ge nggweyak kerep worakolat, woraiga ereba na ndak ndag-et yawo na konuwakluk enpem purag-o. Nde, it iri-ge perari lembe iri-nen ndowaga ’Nir-e Nenmbal Pem Nagawan amanggim wam wosa kan puwokluk mburuwok-nen lerak ninpi-o’ luk nemengen mbatli me,

⁹ it ap iri-ge yabu bem nak kiri keresa nggogolat, ebe lak kasa kasa wene ereba kulurak tarem ondoro lak makluk, yabu-ge angin worag-et watsa enpem pugupmu wanuwag-o” luk yij-o.

¹⁰ Yosoloma, Isarael nap yabu enpem pugwi Mesira nap min Isarael nap ennggendumu it yik eneyarok wolmakluk lenak inpidnak ereba na min-nen mbirigarik, Isarael nap na yak ondogolar-e: ”Nagawan nen wene wirik posolar-e: ’Nggweyak kerep konurak mbato ariwak wok undurak pug-o’ yamu me, wok kindili na wok kundul pug-o.

¹¹ Nde, mbato ariwag-e kit kondomok-net kore yil nuruk, nggweyak kerep konurag-o. Alat nde, konogolar-e, mariger-e konurak pug-o. ’Nanduk konigep ereba na ndak ndag-et konurag-o’ luk nagawan-nen yak kindij-o” luk yak indiga-o.

¹² Yak ondogolikma-ge, it Isarael nab-e mbato ariwak ndok wuruwokluk kore-ge o Mesira nggweyak kambuk tak pogolat woraiga-o.

¹³ Nde, Isarael nap yabu enpem pugwi Mesira nap ereba na-nen Isarael nap yak ondogolar-e: ”Kir-e kup nggal keyam nggal nggweyak kerep konogolar-e, nanduk mbato ariwak wok kondogola-n kwarigep ereba na ndak ndag-et konogolat wolmer-o” luk watsa enpem pogolat woraiga-o.

¹⁴ Nde, Isarael nap yabu enpem pugwi Mesira nap ereba na-nen Isarael nap ennggendumu it yik eneyarok wolmakluk lenak inpidnak nap ereba na ondogolat-nen kin wok onpogolar-e: ”Noluk-nen kit kenlem nab-e yawo-ge nggweyak kerep konogolar-e, nanduk-nen konugwi nggal konili bug-o?” yak indiga-o.

¹⁵ Yak ondogola, it Isarael nap ennggendumu yabu wanogola yik eneyarok wolmak lenak inpidnak nap ereba na nagawan eram mbirigarik, nagawan iri na yak togolar-e: ”Nagawan wa-e. Kar-e noluk yu nggal kwat nunpusu-o?

¹⁶ Mbato ariwag-e wok nindigit lak yogolat-net nde, ’Nggweyak kerep koner-o’ luk watsa nenpem pili-o! Yawo-ge nit nindili-t nde, kat ndegel kubugwi nap-net lugud tag-et kwatli-o” yak tiga-o.

¹⁷ Yak togola, nagawan na-nen yosolar-e: ”Kir-e yabu wanurag-e mondok perari yogolat kinsili yusu-o. Iri yogolar-e, kit-nen yidnak Nagawan Indo amanggim wam wosa kan pil mbururak pem nak an-nen lerak kunpuwakluk nemengen mbatli-o.

¹⁸ Nde, yawo-ge tuguruk yabu wil mberer-o. Nde, mbato ariwag-e wok kindimin pug-et nde, kir-e mondok nggweyak kereb-e nanduk-nen konugwi ereba na ndak ndag-et konurag-o. Mariger-e mondok konurak pug-o” yak indij-o.

¹⁹ Nde, it yabu wanogola yik eneyarok woragwi Isarael nap ereba na yak ondosolar-e: ”Mondok nggweyak kerep konogolar-e, mondok mariger-e konurak pug-o. Are, nanduk konili ereba na nggal-et konurag-o” luk lembesa yak ondosola-n perak nde, ”E! Nir-e anggun panggun tak nonpogolat worali kagi” luk yenggerak piga-o.

²⁰ Nde, it na nagawan woraso sa-nen mbiriganggal-e, Musa min Arun min-e it ontowarak yik eneyarok worakmu inmin lambuk yiga-o.

²¹ Lambuk lug-e, yabu wanogola yik eneyarok woragwi nap ereba-nen it mberen yak ondogolar-e: ”Kit-nen kwatli-ge Nagawan Indo aru-o. At-nen kenpem-et wene mbaruwa-o! Kit-nen ndowaga nagawan min at eyabu wanugwi nap min-nen-e insilepma nenpem pogolat, nunduwokluk yili-o” luk yak indiga-o.

Indi kabak yosolat Musa-nen Mbal Pem Nagawan eram tepan yidnak wene 5:22–6:1

²² Iri yogola-ge, Musa na tuguruk Nagawan Indo eram tepan yosolat-nen yosolar-e: ”Nagawan Indo wa-e. Kar-e noluk-nen Isarael nab-e mondok meya yu nggal kwat unpusu-o? Kar-e noluk-nen yu me nibil lobok yigen-o?

²³ Nde, an-e mondog-et nagawan eram mbirigirik, kat nen yidnak pem-et wene yosola-t nde, ar-e ap enlem yu nde lel mberel onposo tel kwirij-o. Iri yosola-ge, kar-e Isarael nap yongga endeyekluk yi kwatlik ndi kwatlik mbi kwarusu bug-o” luk Nagawan Indo yak tij-o.