MBIRIGA WENE 40 - Nanduk Ngget Tul Pidnak Wene

Nagawan Indo uwi na at amanggim lenak pidnak wene 40:16-33

¹⁶ Musa-nen-e Nagawan Indo-nen yak tidnak wene ereba na ndag-et kwarij-o.

¹⁷ Isarael nap Mesira keya buruk mbirigarig-e olengen misik woraruk, mberen pem tak pogolat waneya anggul-et iri bem tanggal na satu bem-e Nagawan Indo uwi iri-ge abu minep mbarak piga-o.

¹⁸ Nde, worogolar-e, Musa-nen-e o ugwi puruk, owak-nen pobol-nen abu worak purug-e, owak na mendak pij-o.

¹⁹ Iri rak purug-e, Nagawan Indo-nen yak tid iri na ndak ndag-et o ngguwa-ge sum abak pem wosarosolat, kebet na sum pem-net tambungsa mbeyoksa keya bij-o.

²⁰ Iri rak purug-e, urul pidnak wene labu mbarak iri na arem-e kerep imiri mbarak pidnak wene mbarak ya na yarak puruk, usurup puruk, labu mbarak iri na bem manggo yaga uru bela pidnak iri na arem tenaburuk kud turak e pil nggwij-o.

²¹ Iri rak puruk, Nagawan Indo-nen yak tid iri na ndak ndag-et urul pidnak wene labu mbarak iri na-ge Nagawan Indo uwi iri na me puruk, sum mambu abak misik-nen lumusa tiong tak puruk, kuri worak pij-o.

²² Iri rak puruk, Musa-nen-e meja misik abare abam nggwe (utara) ambigit sum kuri worak iri na ombol nggwe buruk,

²³ meja iri na bem-e Nagawan Indo-nen yak tid iri na ndak ndag-et Nagawan Indo amanggim pidnak oroti mbigina pij-o.

²⁴ Nde, tal owak ondogwal worak na-ge meja iri na parosa abare ena nggwe (selatan) ambigit Nagawan Indo ama iri me pij-o.

²⁵ Iri rak purug-e, tal ondogwal worak iri na-ge Nagawan Indo-nen at yak tid iri na ndak ndag-et Nagawan Indo eram iri me-nen pago pil lobok yij-o.

²⁶ Nde, emas nen konidnak sum kuri worak pid iri na eram Nagawan Indo ama iri me pij-o.

²⁷ Iri rak purug-e, Nagawan Indo-nen at yak tid iri na ndak ndag-et Nagawan Indo emben wok tosolat ondoro iri na bem emben worak mende kan pij-o.

²⁸ Musa-nen-e sum mambu misik Nagawan Indo uwi iri na tumende na nggela tiong tak pij-o.

²⁹ Nde, o iri na tumende eralu mbepme nggwe Mbal Pem Nagawan amanggim wam wosa kan purak ondoro buruk, iri na bem-e Nagawan Indo-nen at yak tid iri na ndak ndag-et wam wosa kan posolat, Mbal Pem Nagawan amanggim pugwi mende erep min-et kan pij-o.

³⁰ Nde, ininggi unuwok marurak yi ondoro posolar-e, Nagawan Indo uwi iri na wok, wam wosa kan purak ondoro konid iri na wok iri me buruk, yi kenangga pil nggwij-o.

³¹ Nde, Musa min Arun ilirak inmin-e iri me ininggi unuwok matlug-e,

³² pempa Nagawan Indo ama nggogolat na, Mbal Pem Nagawan amanggim wam wosa kan pugwi ondoro eram panggosa lorak pem-nen na, Nagawan Indo-nen Musa yak tid iri na ndak ndag-et ininggi unuwok marogolat woraiga-o.

³³ Nde, Musa-nen-e Nagawan Indo uwi min wam wosa kan pugwi ondoro min ereya na-ge inggi inggi pak wosa buruk, tumende mbepme iri na-ge sum mambu iri-nen lerak pij-o. Iri kwasa Musa-nen-e yabu na abu ndegera keya bij-o.

Mbal Pem Nagawan uwi nggan nggan-nen muruk tak pidnak wene 40:34-38

³⁴ Iri rak posoloma-ge, nggan nggan mbuwasolat, Mbal Pem Nagawan uwi na-ge muruk tak posolat, Mbal Pem Nagawan-e o iri na me woralat at abinal-e o iri na me eyaya-nen kobong yij-o.

³⁵ Iri ala karuk, Musa na-ge o iri na me nggurag-e mondok meya yij-o.

³⁶ Nde, nggan nggan nde pempa Mbal Pem Nagawan uwi iri na bem-nen posokluk lasola-ge, Isarael nab-e unuwi lije-ge nin me wiril mburuwokluk, mijarugwi-o.

³⁷ Alat nde, nggan nggan iri na nde iri na me-t indiyabu worala-ge, it na mbirigit lak, indiyabu woragwi-o.

³⁸ Isarael nap nembaga ereba me waring tenak woragola-ge, Nagawan Indo-ge at uwi lije iri na me lengge ala, nggan nggan nggal, nde, kubu ala kanduk nggal woragij-o.