MBIRIGA WENE 22 - Nanduk Ngget Tul Pidnak Wene

Uwi yakolat-nen kwarurak wene 22:1-15

¹ Nagawan Indo-nen yosolar-e: ”Ta-nen nde sapi misik ala na, lomba misik ala na, yariya nasolat ala na, onggo wanosolat ala na kwaruwarig-e, sapi misik iri na uwi yaga-ge sapi lima purag-o. Nde, lomba misik iri na uwi yaga-ge lomba empat purag-o.

^2-4 Yariya wanurug-e, mondok uwi yagurag-o. Uwi yagurak nde, arengge lak-nen-e at ondomog-et namat uwi yagosolat, ap iri na ndegel oboso nap kwat luk ndegel obosolat wolmomtag-o. Nde, sapi nggal kelerai nggal lomba nggal yariya wanidnag-et nde, uruk parugu worasola karug-e, uwi yagosolar-e, wam misik onggo-ge mberen lombok mberen lombok purag-o. Nde, ap misik-nen o misik kubu ngguwarik yariya wanosoma, wuruwama-ge, ap at wuruwa nap iri na meya-ge lag-o. Alat nde, lengge-nen wanosoma wiridnak ala perak nde, ap wiridnak nap iri na meya-o.

⁵ Ta-nen nde owam tusuangge bem eyapmu ala na, eyabu anggut yapmu ala na, puwama-nen nde mborosolat ap eneyapmu ngguruk, yapmu woraso mende nujwama-ge, wam ombo nen-e at eyapmu woraso mende min anggut yapmu woraso mende min arengge konak iri na-t uwi yaga arengge owam-nen ninggidnak iri na-t uwi yaga wok turag-o.

⁶ Ta-nen nde eyapmu kan yumuruwarik pem-nen nde tinggiringgi mbara mburuwarik, ap enmbato nggeret yagidnak tup yil lobok yosoma ala na, ap enmbato nggeret mbara ut kamasa pidnak ala na, kan nde nujwama-ge, ap kan yumuruwa nap iri na-net kan ninggidnak ereba na uwi yaga-t purag-o.

⁷ Ap misik arengge anggam iri na ama purak pem wene mbarak puruk, ndok worak worasoma, ap-nen yariya wanidnak ala-ge, yariya wanidnak nap iri na nde enaru lug-e, at-nen wanidnak silobulo ereba na misik onggo-ge mberen lombok uwi yagurag-o.

⁸ Alat nde, wanidnak nap nde enlengen kagit lak-nen-e at ama silobulo pidnak o ombo iri na-ge Mbal Pem Nagawan ama imin mbutluk, at-nen: ’An-e yariya wanigit lag-o’ luk mondok owak mbarurag-o.

⁹ Sapi ala na, kelerai ala na, lomba ala na, yurugwi sum ala na, are, no mende nggal kabak yidnak ala na, yuk puk mbogola-ge, ap mberen ereya na-ge Mbal Pem Nagawan ama inmin mbururag-o. Mbutluk, Mbal Pem Nagawan-nen nde: ’Lugud tak kwarusu-ge at yur-o’ luk nam tak posola-ge, lugud tak kwarusu nap iri na-nen uwi yagosolar-e, misik onggo-t nde, mberen lombok uwi yaga arengge ombo iri na wok turag-o.

¹⁰ Ap misik-nen anggam mbi owam kelerai ala, sapi ala, lomba ala, erep min-et parugu worasoma nde, enlengen-e kagit lag-et nde, owam na wat lik, e lom witlik, wim nap-nen mengga wanilik yuwama-ge,

¹¹ ap wam parugu woraso na-ge Mbal Pem Nagawan ama mbutluk-nen Nagawan Indo unu bem owak mbarosolar-e: ’An parugu wolmakluk neram pidnak wam-e an-e yariya wanigit lag-o’ luk owak mbarurag-o. Iri nde, ndemeret wanigit lak-nen-e at-nen wam ereba uwi yagurag-e lag-o.

¹² Alat nde, wam ereba na nde ap nin-nen yariya wanidnak nde ala-ge, ap wam parugu woraso iri na-nen ap wam ombo iri na uwi yaga wok turag-o.

¹³ Wam ereba na nde ndakngge isilepma worak-nen nde nujwama-ge, ’Ndemeret nenggamu-o’ luk uwi yakit lak yuwakluk, wam parugu worasu nap iri na-nen-e eyak engen-e wam ombo iri na anggarem nuk kil mbururag-o.

¹⁴ Ap misik-nen wam mbi luru tena worasoma nde wam ombo iri na iri me lak worasoma, abalma-nen nde wam iri na owak kalok lik, wat lik yuwama-ge, wam luru wanidnak nap iri na-nen mondok wam iri uwi yagurag-o.

¹⁵ Nde, wam ombo iri na nde iri me worasoma, imbiri bem wat mama-ge, wam iri uwi, yagurag-e lag-o. Nde, wam iri nde we luru-t tena worasolat onggo perenak woraso ala-ge, onggo nggal-e poso irit me, uwi yagurak pug-o” yij-o.

Kwami kwat onposoma-nen kwarurak wene min Mbal Pem Nagawan erembel wanurak wene min 22:16-31

¹⁶ Nagawan Indo-nen yosolar-e: ”Kwe ndugum terak woraso nde ap-nen wene yak turuk, imin nene yuwama-ge, onggo mondok puruk, kwe na-ge wanurag-o.

¹⁷ Alat nde, kwe iri na eid-nen nde ap iri-nen at ara wanurak isili nde ala-ge, ap iri na-nen-e tol-e kwe ndugum misik onggo pugwi ndak ndag-et kwe eid iri na wok turag-o.

¹⁸ Kwe-nen nde kugwi ombol pem nggoso nde ala-ge, mondok wururag-o.

¹⁹ Ap wam yeboso ala-ge, mondok wururag-o.

²⁰ Nagawan Indo an namanggim nak wam wosa kan purag-et nde, ta-nen nde Mbal Pem Nagawan nin amanggim wam wosa kan posola-ge, mondok wururag-o.

²¹ Kir-e ap sal-e kenlengen ma nggal tak unpuruk, lel unpurak pug-o. Kit na nanduk ap sal Mesira wirigep ereba na kinndi yebet ker-o.

²² Kir-e kweyap togwe min li mul ineid lak iniya lag-e lel unpurak pug-o.

²³ Kit-nen nde it lel onpogola-ge, it-nen-e Nagawan Indo an neram ’Yonggo nindi-o’ luk wene mbo bil luwagola-ge, kulimin-o. Kulurug-e,

²⁴ nisilepma kenpem puruk kondosolar-e, san abi bem kunpumu kunduwama, konkwerag-e togwe yogolat, kinlirag-e mul yogolat ma-o.

²⁵ Kit-nen nde an nelem nap yu ennggendumu isilobulo lak nap mbi kunuwang uwi yagurak luru wok undugupndig-e, ’Uang iri na mondok wok niri-o’ luk eralu min nambena nggi yurak pug-o.

²⁶ Kit-nen namat iri na bem enpare sum nde wanugupndig-e, enpare sum iri-ge mondok mo wusa mbigit lak ma-net tuguruk wok til mbururag-o.

²⁷ Nde, usum iri-ge aboro embem tak poso misik mesag-et nak me, wok til mbirigit lak-nen-e nene yosolar-e, embem sum-e no bem tambera nene yuwa-o? At-nen nde ’Yongga niri-o’ luk ene nggoksa neram wene pil luwasola-ge, an-e enabuwa kaso me, ene-ge kulimin-er-o.

²⁸ Kir-e Mbal Pem Nagawan obok pogolat, kit kennggendumu enne kulugwi nap iri na imbiri lamut tak purak pug-o.

²⁹ Kit-nen an namanggim pogolar-e, an namanggim purag-o luk wat tak pidnak tarem-et kit keneyapmu-nen ebe yidnak mbato min anggut engen amburu min saitun engen amburu min an namanggim purag-o. Nde, kinlirak li ap manggiya na an wok nururag-o.

³⁰ Iri-nen sapi min lomba min amarik kusi nandug-et ndaguwa ereba-ge nderak ija kamo bem tuju nene luk, delapan pem tak pogolar-e, an namanggim purag-o.

³¹ Kir-e an nilirak me, yi mende ndi mende ndakngge isilepma worak-nen wiridnak eyak engen-e mondok norak pug-o. Mondok yengge nak wok turag-o” yij-o.