MBIRIGA WENE 19 - Nanduk Ngget Tul Pidnak Wene

Isarael nap Ndobo Sinai indipma woraiga wene 19:1-25

^1-2 Iri lug-e, Isarael nap na-ge o Arapirim na keya biga-o. Mesira keya buruk lobok yigarik, waneya mberen woraruk, kenan tak pogolat tanggal satu iri bem-e Sinai lidmu wok yiga-o. Wok lug-e, Ndobo Sinai ayo bem o lije wiril lobok yiga-o.

³ Nde, iri me-nen-e Musa na-ge Mbal Pem Nagawan imin lid pid yekluk Sinai Ndobo nggwe lagaij-o. Lasola-ge, ndobo iri na bem-nen Nagawan Indo-nen Musa wene yak tosolar-e: ”Isarael nap Yakup-nen wigarak ereba yak ondosolar-e, wene yu yak indi-o:

⁴ ’Towe ud-nen amarig-e isiyamu bem puruk waruk mboroso nggal, an-e namawi kwarat pem-nen an neram yu me wok kunpuruk lobok yosolat, an-nen Mesira nap kwat inpigi-ge kir-e kaigep iri nar-o.

⁵ Yawo kit-nen nde pempa an-nen yidnak nak kwarogolat, an-nen urul yak kindidnak iri na-t puksa tena woragola-ge, kir-e an nondomok nilirak tak kinpimin-o. O yu-ge oboksa an narengge-t nde, kir-e narengge nindi kundik kwat yugub-o.

⁶ An nondomok namanggim nak lenak woragolat, tepan ombo nggal an ndegel nobogolat woragub-o’ luk yak indi-o” luk yij-o.

⁷ Yak ondosoloma, Musa na ndobo bem-nen mbuwasolar-e, ap it ennggendumu-nen enne kulugwi nap ereba na wene mbo unpuruk, Nagawan Indo-nen: ”It yak indi-o” luk ebem pid wene ereba na ndindera yak indij-o.

^8-9 Yak ondosoloma, it pidsa-nen: ”Nagawan Indo-nen yak nindid iri-ge kwarul-er-o” luk it oboksa-nen enne leksa nak yogola, onggo yiga iri na-ge Musa-nen Nagawan Indo yak tij-o. Yosoloma, Nagawan Indo-nen Musa yak tosolar-e: ”An-e nggan nggan kwarat-nen muruksa kendam lobok yimindik, kimin wene yosola-ge, ap-nen kologolat iri-net inndi-ge kat kebem wat tak puruk wolma-o.

¹⁰ Yawo-ge kar-e it iri endam mbiri-o. Nde, it iri-ge yawo min kup min-e Nagawan Indo erembel wanurak pem it ondomok lid lud tak pogolat, unsum mondok maruwag-o.

¹¹ Kup woraruk, kup iri-ge ir-e mondok lid lud tak puruk wolmomtag-o. An-e ap oboksa-nen niyudtak sa Sinai Ndobo bem mbuwamin-o.

¹² Nde, ndobo iri eralu ponok ponog-e ap it iri-nen ndobo iri bem mburuwa naru mondok kuri wiril mbururag-o. It-nen ndobo iri bem lagolat, ’Eram na mondok wok yurak pug-o’ luk mondok imiri mbarurag-o. Ta-nen nde kuri worak iri na nde kwid togola-ge, mondok undurag-o.

¹³ Ondogolar-e, enpem kininggi marig-et tet yigit lak, kerep pem min san pem min nak undurag-o. Ap-nen na irit, wam-nen na irit kuri worak irit nde kwid togola-ge, mondok undurag-o. Nde, mbapu nde motsa-t ene pu kundugu worala kulurug-e, it ap ereba-ge mondok ndobo bem lujwag-o” luk yak tij-o.

^14-15 Iri luk, Musa na ndobo bem-nen mbuwasolar-e, it ap iri na Nagawan Indo erembel wanurak pem lid lud tak puwakluk-nen yak ondosolar-e: ”Kup nene lug-e, kup iri-ge kir-e mondok lid lud tak puruk woragolar-e, kwami inmin-e nene yurak pug-o” yak ondosoloma, ir-e lid lud tak pogolar-e, unsum mariga-o.

¹⁶ Mberen nene luk, kenan tak posolat, kuplilasa-ge ndobo iri na bem-e mondok nggan nggan-e kiso puruso yosolar-e, obinel, o nggu yij-o. Iri yosolar-e, mondok mbapu ene kwiye worak iri kulurug-e, it o lije ma worali nap yeba na-ge kwiye kwarat yogolat, ye le mbiga-o.

¹⁷ Musa-nen-e it ereba na-ge o ma-nen inmin mberarik, Mbal Pem Nagawan imin lid pid yuwakluk ndobo iri na ayo bem inmin mberamu, ndobo ayo bem mendak woraiga-o.

¹⁸ Nagawan Indo-ge kanduk arem ndobo iri na bem mbuwaidnak me, Sinai Ndobo iri na-ge kule-nen nak muruk tak pij-o. Nde, kule-ge tirik kule nggal ndugunuruk lasolat, ndobo na-ge lele yosolat kwiye worak irit kwarij-o.

¹⁹ Nde, mbapu ene mondok nggoksa pu kundugu yosola-ge, Musa-nen wene yosola, Nagawan Indo-nen onggo yosolar-e, o nggu bem-nen erep nggarij-o.

²⁰ Nagawan Indo-ge Sinai Ndobo iri na anggul pem mbuwagarik, Musa na ndobo anggul pem eram lujwakluk wene mbo obosola, Musa na-ge lagaij-o.

²¹ Lagamu, Mbal Pem Nagawan-nen Musa yak tosolar-e: ”Kar-e mbugundik, tuguruk inndi yeberak inpi-o. An niyudtak pem kuri worak iri kwidsa lobok yurak pug-o, It-nen nde an nene kwid tuwa bem-e it ennggendumu-ge ap kwarat wat ma-o.

²² Tepan ombo an neram panggosa lobok yurak min et it na it-net mat kurudtag-o. Iri nde kwarigit lak ala-ge, mondok indimin-o” luk yij-o.

²³ Yosoloma, Musa-nen Nagawan Indo yak tosolar-e: ” ’Ndobo iri-ge mondok an nondobo lenak-nen yusu-o. Ndobo iri inggi inggi kuri worak pidnak iri-ge kwid turak pug-o’ yigenma me, ir-e ndobo bem lorag-e mondok meya-o” luk yij-o.

²⁴ Yosoloma, Nagawan Indo-nen Musa yak tosolar-e: ”Kar-e mbugundik tuguruk luwasolar-e, Arun min lumer-o. Alat nde, tepan omborak min we nap min-e an neram yu me lobok yuwa naru kuri wosa pidnak ereba-ge mondok kwid turak pug-o. Nde, kwid togola-ge, mondok indimin-o” yak tij-o.

²⁵ Yosoloma, Musa na-ge Isarael nap enndam mbarik, Nagawan Indo-nen wene wosa pid iri na yak indij-o.