MBIRIGA WENE 16 - Nanduk Ngget Tul Pidnak Wene

Mana (no mende mburu) min towe puyu min wok indidnak wene 16:1-36

¹ Iri lug-e, Isarael nap oboksa-ge Elim-nen mbiriga-o. Waneya misik woraruk, mberen tak posolat tanggal lima belas iri bem-e Mesira wi keya buruk mbirigarig-e, Sin karu me wok yiga-o. Nde, iri me-ge o Elim wok Ndobo Sinai wok enggendumu-o.

² Nde, o lid iri me-nen-e it oboksa-nen Musa min Arun min met onpogolat-nen

³ yak ondogolar-e: ”Nit Mesira woragola ereba-net Nagawan Indo-nen nendeleb-e ob-o. Nde, Mesira woragolar-e, nir-e kuali arem sagidnak uno nonggolat, oroti ninmbit nenmbatsa nonggolat yugwi-t nde, kit yu me wok nunpuruk lobok yigep yu-ge nit yu me oboksa nere-nen wat makluk ninmin lobok yigepma-o” luk yiga-o.

⁴ Yogola, Nagawan Indo-nen Musa yak tosolar-e: ”Yawo-ge an-nen kit pidsa kenmanggim nunggwi mende kwarat talme nggal nggilara pil mbuwamin-o. Iri yumu, kir-e pempa o misik tarem norak ndak wosa nak ndok worogolat wolmomtag-o. An nelem nab-e iri yak indigi iri bem an-nen yidnak yidnak kwaruwa, lak? luk enabut mbarimin-o.

⁵ Nde, enam pem tak pogolar-e, nunggwi mende iri na-ge ir-e mondok mberen pem norak ndok wosa lid lud tak purag-o” yij-o.

⁶ Yosoloma-ge, Musa min Arun min-nen it Isarael nap oboksa yak ondogolar-e: Yawo keyama-ge ’Nagawan Indo at-net Mesira wi-nen wok nunpuruk lobok yamu-o’ luk kenaru yugub-o.

⁷ Kit-nen obok pili ereba kolarik me, kup kuplila-ge Nagawan Indo kendam wok yosolat abinal kagub-o. Nde, nit nenmberek ya-ge at-nen yak nindidnak nak kwatli-o.

⁸ Nagawan Indo-ge kit-nen kinsilepma ibili ereba-ge karik me, keyama-ge Nagawan Indo-nen uno wok kondosolat, nde, kuplila-ge oroti wok kondosolat yuwama-ge, nonggolar-e, kinmbit ma-o. Kit-nen kinsilepma-ge nit nenpem pili-t nde, ndemerer-e Nagawan Indo nde kinsilepma ebem pili-o” yiga-o.

⁹ Iri lug-e, Musa-nen Arun yak tosolar-e: ”It-nen Nagawan Indo obok piga ereba-ge ar-e kulidnak me, it oboksa ’Nagawan Indo eram mberer-o’ yak indi-o” luk yij-o.

¹⁰ Yamu, Arun-nen wene na yak ondosolat, nde, ir-e oboksa enlengen-e o lid ereba na nggwe yik karok worakmu-ge, mimo ereya na-net Nagawan Indo eyaya-ge nggan nggan arem-nen nam agaij-o.

¹¹ Nde, Nagawan Indo-nen Musa yak tosolar-e:

¹² ”It Isarael nap-nen nobok pili iri-ge kuligi-o. It Isarael nap iri-ge yu yak indi-o: ’Keyama-ge uno nunggub-o. Nde, kuplila-ge oroti nonggolat kinmbit ma-o’. Iri yogolar-e, an nimin-e ’Ar-e nit-nen idnak Nagawan Indo-nen yusu-o’ luk enaru ma-o” yak tij-o.

¹³ Nde, keyama nggwe-ge towe puyu kwarat lobok yosolar-e, it unuwi mborom ereba na yebet luk keya bij-o. Nde, kuplila-ge lilangen ndolpap nggal nggilara it worali sa ereba na me mbuwagij-o.

¹⁴ Nde, lilangen nggal iri na-ge age lasolar-e, lidmu ereba na-ge ndolpap nggal-nen aberal-e leplep, keyane aboro nggal-nen oro worak ndolpap logok tak nggal-o.

¹⁵ It Isarael nap-nen iri karug-e, ”Yu-ge no mende-o?” luk kabak yiga-o. Kabak yogolat-nen it nak kin wok kerak mbogolar-e: ”Yu-ge no mende-o?” yogola, Musa-nen it yak ondosolar-e: ”Yu-ge Nagawan Indo-nen kit wok kindidnak nunggwi mende-nen yusu-o.

¹⁶ Nde, Nagawan Indo-nen wat sa yak kondosolar-e: ’Kit kondomoktak-nen norak ndak ndak ndok worogolar-e, o misik arem woragwi ndok wosa ap misik amanggim-e embe mberen pem lombok nak kenanggurag-o’ luk yak kindij-o” luk yak indij-o.

¹⁷ Ir-e iri yid iri na ndak ndag-et ndok worogola-t nde, ap ereb-e misiget nap norag-et nde, embe mberen pem nak kenanggurag-o yid iri na kwidsa terak menna yariga-o. Nde, ap ereb-e marig-et nggal ndok wiriga-o.

¹⁸ Iri yiga-t nde, embe misik pem nak-nen waga tumburukmu-ge, it kwarat ndok wiridnak nap na, it marig-et ndok wiridnak nap na ondomoktak norak ndak ndak irit waniga-o. Nde, kwarat ndok wiridnag-e kwarar-e wanigit lak. Nde, marig-et ndok wiridnak nap na mariger-e wanigit lag-o.

¹⁹ Musa-nen it yak ondosolar-e: ”Ap misiger-o luk-nen na kup norak yugu burak pug-o” yak indij-et nde,

²⁰ ap ereb-e Musa ene-ge no mende nggal tak puruk, yugu bigarik pem kub-e ubugwe nggururak emben to yamu kaiga-o. Iri ala, Musa isilepma kwarat enpem pij-o.

²¹ Nde, pempa kuplila-ge ap oboksa-nen ondomoktak norak enpe ndak wosa ndok worogolat woraiga-o. Nde, minggirik keya biga ereba na-ge mo yarosolar-e, yi nggal kwat yosolat lak agaij-o.

²² Iri kwarogolat lima nene luk, enam pem-e nunggwi mende iri na-ge embe nambena mberen pem yaridnak ndok wiriga-o. Nde iri-ge enpe inlitsa embe empat empat pem yarak ndok wiriga-o. Nde, iri na wene-ge it ennggendumu-nen enne kulugwi nap ereba na Musa eram mbirigarik yak tiga-o.

²³ Yak togolikma, Musa-nen it yak ondosolar-e: ”Nagawan Indo-nen watsa nenpem pidnak wene-ge yu-o: Kub-e Mbal Pem Nagawan we woraidnak tarem-e at amanggim lenak pidnak tarem me, we enpabok kwarogolat nak wolmomtag-o. Iri ala, kit-nen lid lud tak pogolar-e, kit-nen nde kan ngen pem woragurak ala-ge, woragurag-o. Nde, kit-nen nde sagurak ala-ge, sagurag-o. Iri kwarogolar-e, nunggwi mende-ge terak menna-t lid lud tak puruk, ereb-e kup norak purag-o” yak indij-o.

²⁴ Musa-nen yak ipdid iri na ndak ndag-et nunggwi mende terak menna minggirik ereba na-ge kup norak yugu biga-t nde, ubugwe na pigit lak, monggok na yigit lag-o.

²⁵ Musa-nen yosolar-e: ”Yawo tarem-e Mbal Pem Nagawan we woraidnak tarem, Nagawan Indo nak kek tak purak tarem me, yeba-ge kit yawo norak nunggwi mende-nen yusu-o. Nde, nunggwi mende-ge worali sa yeba we mbepme ombol nggwe-nen-e mondok marig-et tet wanugup pug-o.

²⁶ Enam tarem ya woragolar-e, mondok nunggwi mende ndok worogolat wolmer-o. Nde, tuju bem tak pogolar-e, Mbal Pem Nagawan we woraidnak tarem me, nunggwi mende-ge mondok mbuma bug-o” yak indij-o.

²⁷ Yak indij-et nde, Isarael nap ereb-e tuju tarem na-t nunggwi mende ndok wuruwokluk yiga-t nde, nunggwi mbi mondok kagit lag-o.

²⁸ Iri yogola, Nagawan Indo-nen Musa yak tosolar-e: ”Kir-e an-nen ’Irit kwarurag-o’ yak kindidnag-e pempa tal tenak woragub-a?

²⁹ Kwara yebet ker-o. Kit-nen we wolmomtag-e misik pem nak wolmomtak tarem wok kindigi-o. Iri bem-nen enam tarem ereya-ge iri bem-e mberen pem ndak norak nunggwi mende wok kindigi-o. Nde, tuju bem tak pogolar-e, ap oboksa-nen mbepme mbirigit lak, o ma nak wolmomtag-o” yak tij-o.

³⁰ Iri bem-e tuju bem tak pogolar-e, mondok yabu wanigit lak we woraiga-o.

³¹ Nde, Isarael nap-nen-e nunggwi mende iri na unu-ge mana yariga-o. Mana iri na ebe-ge marik marik menggeral engen ogere nggal loro, nde, undu-ge tamuk amburu min woraidnak oroti ndu nggal-o.

³² Musa-nen yosolar-e: ”Nagawan Indo-nen yak nondosolar-e: ”Nit Mesira-nen wesera ninmin lobok yosolat, lidmu woragola, Nagawan Indo-nen wok nindid nunggwi mende yu-ge nit-nen wigarak-nen kujwakluk mana iri-ge embe mberen pem nggal yasa ndok worak purag-o’ yak nendamu-o” luk yak indij-o.

³³ Yuruk, Musa-nen Arun yak tosolar-e: ”Togolwak mbi wanugundik mana iri embe mberen pem nggal yasa togolwak arem puruk, nit-nen wigarak-nen abok kujwakluk Nagawan Indo eram iri me ndok wosa pi-o” yak tij-o.

³⁴ Yosoloma, Nagawan Indo-nen watsa Musa yak tid iri na ndak ndag-et Arun-nen-e togolwak iri na-ge ndok worak wolmomtak pem urul pidnak wene labu mbarak iri na eralu pij-o.

³⁵ Nde, Isarael nap mborogolar-e, olengen empat pulu iri arem-e mana iri na-t nil nil it-nen pem wolmomtak wi Kanaan iri na me wok yiga-o.

³⁶ (Ereya tarem-e embe yi mende ndi mende ndak worogolat yarugwi iri nde kobong tak ala-ge dua pulu mok (liter) nggal-o.)