MBIRIGA WENE 11 - Nanduk Ngget Tul Pidnak Wene

Musa-nen-e ”Li manggiya nderak oboksa wat ma-o” luk yak indid wene 11:1-10

¹ Nagawan Indo-nen Musa yak tosolar-e: ”An-nen-e Pirayon min at-nen tenagidnak wi woragwi nap min enpem lak tak onposo mende tuguruk misik mberak pimin-o. Iri rak onposola-nen perak mborobokluk lerak kunpuwa-o. Iri yosolar-e, kir-e o yu me-nen langgara wirik kunpuwa-o.

² Iri bem-e it Isarael kweyap ereba yak indi-o. It-nen-e endam worali Mesira kweyap ereba enpem unmuruk pugwi mende emas min perak min-nen konidnak nggi yuwag-o” yak tij-o.

³ Nde, Nagawan Indo-nen-e Mesira kweyap yeba na-ge inndi konak Isarael nap enambigir-e tak pij-o. Nde, Musa na-ge Pirayon eyabu wanugwi nap min at-nen tenagidnak wi woragwi nap oboksa min-nen mondok kek tak pugwi nap irit kwat yij-o.

⁴ Nde, Musa-nen Pirayon yak tosolar-e: ”Nagawan Indo-nen yosolar-e: ’Yawo kubu nggiringgendumu-ge an-e Mesira uwi oboksa kibiril lobok yosolar-e,

⁵ li ap manggiya nderak Mesira woragwi oboksa wat ma-o. Nde, tel korosolar-e, Mesira nagawan iri ambara iri ebem mbud marik-nen waruk waruk at-nen onnggo pidnak kweyap nggandum mbato yigirugwi ereba-nen manggiya ndagidnak oboksa min onowam nandug-et mul mul ndagidnak oboksa min mondok wat ma-o.

⁶ Iri yuwama, Mesira wi oboksa yip langgu mbarogolat, sa nggwa mbuwa-o. Nde, yip iri nggal-e nanduk-nen na kagwi buk, abok-nen na kwat ma bug-er-o.

⁷ Alat nde, Isarael nap ennggendumu-ge li ala na irit, wam ala na irit mondok mbi sil kujwa bug-o. Iri karuk, Nagawan Indo an-nen-e Mesira nap min Isarael nap min lenak kunpusu iri-ge kenaru yugub-o’ yak kirij-o” luk yak tij-o.

⁸ Worok tak posolat, Musa-nen yosolar-e: ”Nab-o. Kat keyabu wanugwi nap oboksa an neram lobok yogolat neram tebe luk-nen yogolar-e: ’Kar-e kelem nap inmin o yu me keya buruk mberer-o’ yogola-net an-e mbirimin-o” yosoluk, Musa na-ge isilepma wu luk Pirayon eram-nen mbirij-o.

⁹ Nagawan Indo-nen Musa yak tosolar-e: ”An-nen Mesira wi yu me oboksa kwiye worak mende kwarat kwat unpuwaklug e, kat kene-ge mondok kuluwa bug-o” yij-o.

¹⁰ Yosoloma-ge, Musa min Arun min-e kwiye worak mende oboksa ereba Pirayon iri na eram-net kwariga-t nde, Nagawan Indo-nen indi amawi rak posola, Isarael nap yeba na-ge lerak inpigit lak yij-o.