MALEAKI 4 - Nanduk Ngget Tul Pidnak Wene

Nagawan Indo-nen idnak tarem wok ma wene 4:1-6

¹ Nagawan Indo Mondok Amawi worak iri na-nen yosolar-e: ”Inndi kek tak min meya yugwi nap min oboksa tusuangge kan pidnak nggal kan unpurak tarem-e wog-et ma-o. Nde, iri tarem-e erep mbi keya bigit lak, mondok oboksa kan paga lak tak unpuwa-o.

² Alat nde, kit an-nen yidnak yidnak kwarugwi nap kenmanggim-e kinmiri yurak namawi-ge molengen yeberak pil wasolat nggal yimbirik konposolat, eyaya-nen-e ki rak kunpuwa-o. Iri yosola, kir-e sapi amarik ngget nderak o ma-nen mbepme nak posola, alen kaso ereba na nggal wisirik kenalen pem woragub-o.

³ Nde, iri tarem-e an-nen kit kwat konposola-ge, kit-nen-e meya yugwi nab-e urugwe nggwe rak unpugub-o. Iri yugupmu, it iri-ge mabe unuwok-nen yomndogolat lul wurugwi nggal kwarak unpugub-o.

⁴ Kir-e an ndegel noboso nap Musa-nen mul kindidnak wene min imiri mbarak pidnak wene min an-nen ’Iri nggal-et kwarogolat wolmomtag-o’ luk yidnak wene min Isarael nap oboksa-nen kwarogolat wolmomtag-o luk, Sinai ndobo bem-nen Musa wok tigi wene ereba na-ge kwara kinndi yeberag-et wolmer-o.

⁵ Alat nde, Nagawan Indo-nen idnak tarem mondok kwiye worak, ija lombok an-nen lud tak pigi iri na wok yigit lak ma-ge nandug-e an nene lomboksa yoso nap Elia iri na-ge kendam pil lobok yimin-o.

⁶ Pil lobok yumu-ge, an-nen kit kunuwi lak tak pil lobok yimin naru, at-nen-e ineidtak min inlirak min inndi misiget tak unpuwa-o” luk yij-o.