MALEAKI 3 - Nanduk Ngget Tul Pidnak Wene

¹ Nagawan Indo Mondok Amawi worak iri na-nen onggo yosolar-e: ”An-nen-e an nurula lid lud tak puwakluk, an-nen ap mbi pil lobok yimin-o. Iri yosolar-e, Nagawan Indo kit-nen nogore yili an-e mimo nama-t lobok yimin-o. An-nen pil lobok yimin nap kit-nen kinndi ebem worali iri na lobok yosolar-e, an-nen urul pidnak wene-ge oboksa-nen kuluwakluk yuwa-o” luk yij-o.

² Alat nde, Nagawan Indo lobok yosolat, at ondomok-nen nam yuwa iri tarem-e ta-nen nggal mamak puruk wolma-o? At iri-ge kik lena labuk makluk posid tol woragoso nap-nen kan mabidnak kanduk nggal-nen yusu-o. Sum maroso kwe esabon nggal-nen yusu-o.

³ Nde, at lobok yuwa iri-ge perak kopkap masa perak nak lena keya bugwi nggal, ap enpem wene mbenarurak pem lobok yuwa-o. Posid tol konoso nap-nen emas min perak min ebe nak lena keya boso nggal-et, Nagawan Indo-nen pil lobok yuwa nap iri na-nen-e tepan ombo ereba na-nen Nagawan Indo amanggim wam wosa pogolar-e, Nagawan Indo indi-nen pidnak ndak ndag-et at amanggim puwakluk, Nagawan Indo-nen ibil lobok yuwa nap iri na-nen-e tepan ombo mat unpuwa-o.

⁴ Iri kwaruwama, it-nen Nagawan Indo amanggim puwa iri-ge nanduk Yewura nap min Yerusalem woragwi nap min-nen at amanggim pidnak indingen kasolat woragid iri na nggal indingen kasolat wolma-o.

⁵ Nagawan Indo Mondok Amawi worak iri na-nen yosolar-e: ”An-e kenpem wene mbenareyekluk lobok yimin-o. Nde, kugwi kwal ombo min mbabi kwarugwi min ennesiget ap enpem wene pugwi min ap-nen yabu wanidnak pem onggo wok ondogolat lugud tak kwat unpugwi nap min kweyap togwe min li mul ineid iniya lak min ap sal min ereba na lel mberel unpugwi nap min an kek tak nubugwi buk nap oboksa min it oboksa-nen kwatli ereba-ge an ndag-et nak lobok yosolar-e, enpem wene mbenarimin-o” luk yij-o.

Enarengge karetkwe Mbal Pem Nagawan amanggim purak wene 3:6-12

⁶ Nagawan Indo-nen yosolar-e: ”An-e nin yoso buk Nagawan Indo-nen yusu-o. Iri bem-nen kit Yakup-nen wigarag-e mondok lak tak kinpigit lak worali-o.

⁷ Kir-e nanduk konmborak-nen kwariga ereba na nggal-et an-nen imiri mbarak pidnak wene-ge keya buruk, lugud tak nggwe mborogolar-e, an-nen ’Irit kwarurag-o’ luk yidnak wene-ge tugup lak kwat tenak worali bug-o. Iri ala-ge, tuguruk an neram lobok yer-o. Iri yogola-ge, an na tuguruk kit kendam lobok yimin-o. Alat nde, kit-nen kin wanogolar-e: ’Nit tuguruk keram lobok yuwoklug-e, ngge kwarul-o?’ luk yili-o.

⁸ Yawo an-e kit kin wok kenpeyeg-o. Nggweyakma nap-nen-e Mbal Pem Nagawan an namberam ludtag-e ndag-et, lak? Ndemeret meya irir-o. Alat nde, kir-e an-et nde, namberam lali-o. Nde, kit-nen kin wanogolar-e: ’Kamberam lagolar-e ngge kwatli-o?’ yili-t nde, an-nen onggo yak kendeyeg-o. Iri-ge kit-nen karetkwe wok nurugwi bem na irit, an namanggim pugwi bem na irit iri bem-net an nemberam lali-o.

⁹ Kit kenlem oboksa-nen an namberam lali bem-et kit oboksa imbiri lamut kenpem mbusu-o.

¹⁰ Nunggwi mende kwarat an nama emben mborosolat wolmakluk, kit kenarengge oboksa enggep lombok karetkwe an nama waruk lobok yer-o. An-nen yak kundusu yu nak mbi wal ker-o. Iri yogola-ge, an-nen mbal tu kuwara konak mende nak nggilara wok kindimin-o.

¹¹ Yagidnak mende naso sil ereba-ge yagidnak mende ereba na nujwakluk keya bimin pug-o. Iri yosola-ge, kit-nen idnak anggut ari ereba na-ge engen-e utlud puwa-o.

¹² Kit woragwi sa kunuwi ereba na me wolmomtak mondok konak irit kwat yosola karuk, ap oboksa-nen kit kinmin yogolar-e: ’It iri-ge inpine-o’ luk yuwa-o” luk yij-o.

Mbal Pem Nagawan-nen ”Kenabuwa kamin-o” luk urul yak indidnak wene 3:13-18

¹³ Nagawan Indo-nen yosolar-e: ”Kit-nen an nimin yili ereba-ge ndemeret an nimin kenlengenma nggal tak nibili-o. Alat nde, kit-nen kin wanogolar-e: ’Nir-e kat kimin-e no yak kitli-o’ luk yili-o.

¹⁴ Iri-ge kit-nen yogolar-e: ’Nir-e wewesa Mbal Pem Nagawan ndegel ibili-o. No manggim-nen nir-e Nagawan Indo Mondok Amawi worak iri na-nen yidnak yidnak kwat tenak woragolat, nit-nen meya yidnak keya buruk kondok yogolat kwat tenak wolmomtag-o?

¹⁵ Nit nondomok nenlengen-nen kali-o. Ap inndi kek tag-et nde, inmbiringgat worag-et worali-o. Nde, meya yugwi nab-e ebem lud nde imbiringgat worak yosolat, nde, it-nen meya kwarugwi ereba na bem-nen Mbal Pem Nagawan-nen mamak puruk woraso iri na abut mbarukmu-ge, ir-e wene lak, terag-et mborogola kali-o’ yili-o” luk yij-o.

¹⁶ Nde, Nagawan Indo indi aye worak woragwi nap ereba na-nen yak kerak mbogola-ge, Nagawan Indo-nen-e it-nen yili wene-ge kwara kolosolat, yebet kasolat woragij-o. Nde, at kek tak obogolat, at aye worak woragolat kwarugwi nap ereba na unnu-ge at eram at-nen unnu mbaroso engga iri na bem mbarij-o.

¹⁷ Nagawan Indo Mondok Amawi worak iri na-nen yosolar-e: ”It iri-ge an nilirak kwat ma-o. Nde, an-nen kwarimin tarem-e it iri-ge an nindi kundik irit kwat ma-o. Nde, ap misik-nen at ndegel oboso ambara abuwa kaso nggal, iri nggal-et it enabuwa kamin-o.

¹⁸ Nde, an nilirak-nen-e konak kwarugwi nap min meya kwarugwi nap min an ndegel nubugwi nap min an ndegel nubugwi buk nap min enpem mbuwa mende iri-ge nam-et arik tak mbenak irit kujwa-o” luk yij-o.