MALEAKI 2 - Nanduk Ngget Tul Pidnak Wene

¹ Nagawan Indo Mondok Amawi worak iri na-nen tepan ombo yak ondosolar-e: ”An-nen kwarobokluk kenpem pusu wene-ge yu-o:

² Kit-nen kwarugwi mende bem-net an kek tak nuburag-o. Kit-nen nde an-nen yidnak wene kuligit lak yogola-ge, an-nen imbiri lamut tak kinpimin-o. Kit-nen ndak kenalen pem woragwi oboksa iri na-ge nin luk, imbiri lamut mende nde kwat ma-o. Kir-e an-nen kenpem pidnak wene-ge kwara kek tak pigit lak yogola karuk, konak mende oboksa ndemeret an-nen imbiri lamut tak pigi-o.

³ Kit kinlirag-e an-nen angin worak enpem pimin-o. Nde, kit kentare-ge an namanggim wosa kan pugwi ereba na al kela mbo bidnak ereba na bem kentare ndarak puruk, kenpe lesa wam al kela mbo bil mburugwi sa ereba na me mbo kinpil mbirimin-o.

⁴ Kinpil mborosola-ge, kit-nen yebet kagolar-e, an-nen tepan ombo Lewi nap-nen wigarak inmin urul pigi iri na-ge pem irit wolmomtak urul pamu-o luk yebet kabokluk wene yu-ge kenpem pukmu-o.

⁵ An-nen it inmin urul posolat-nen urul yak ondosolar-e: ’Mondok yamuksa konak woragolar-e, kir-e an nak kek tak nobogolat wolmomtag-o’ luk irit yak indigi-o. Nde, iri tarem-e ir-e ndemeret an nak kek tak nobogolat, an nindi aye worak irit woraiga-o.

⁶ Iri-nen it-nen mul ondogolar-e, lugud tak nggwe mul indigit lak, ndemeret mot mor-et mul indiga-o. Ir-e an nimin mondok panggarak woragolat, mot mor-et an nindi-nen pidnak ndak ndag-et kwarogolat woraiga-o. Iri-nen it-nen ap kwarat meya kwarugwi iri na kwarigit lak makluk, yongga ondogolat woraiga-o.

⁷ Ndemeret tepan ombo-nen kwarurag-e Nagawan Indo Mondok Kek tak an nowene ndemeret mot mor-et ap mul ondogolat wolmomtak irir-o. Nde, it iri-ge an-nen wirik inpil lobok yidnak me, ap-nen-e an nindi-nen pidnak wene-ge it irit kin wok onpogolat wolmomtag-o.

⁸ Alat nde, yawo-ge kit tepan ombo-nen-e ndemeret mot mot kwarugwi keya buruk, lugud tak nggwe mbitli-o. Iri kwarogolat, kit-nen mul undugwi wene iri na-nen-e ap kwarat mberena meya kwarugwi rak inpili-o. Kit-nen-e an-nen kinmin urul pigi iri na-ge meya rak pigeb-o.

⁹ Kir-e an nindi-nen pidnak ndak ndak kwarigit lak yogolat, kit-nen an nilirak Isarael nap mul ondogolar-e, ap len len kwatli iri bem-e an-nen Isarael nap enarem yabu wanosola, Isarael nap-nen-e kir-e enlengenma nggal tak kunpuwa-o” luk yij-o.

Isarael nap oboksa-nen Mbal Pem Nagawan-nen yidnak yidnak kwarigit lak yidnak wene 2:10-16

¹⁰ Nit oboksa nineij-e misiget nak-nen yusu-o. Nit oboksa Mbal Pem Nagawan misiget iri na-nen ndak worak ninpidnak-nen yili-o. Iri ala-ge, nir-e noluk-nen nir-e nennggam min-e ”Iri nggal kwarul-o” luk urul pidnak ereba na kwarigit lak yil lobok yogolar-e, Mbal Pem Nagawan-nen nit nonmborak inmin urul pid ereba na iri nggal-et ninsili rak pili-o.

¹¹ Nde, Yewura nab-e Mbal Pem Nagawan-nen it inmin urul pid wene iri na kwid togolar-e, Yerusalem min iri me oboksa min ereba na me-ge meya unmunggum pil kagwi mende kwatli-o. It-nen Nagawan Indo uwi at indi kundik iri na emben to rak pogolar-e, erem nin nap unkugwiwak erembel wanugwi kweyap ereba na inmin wok kerak mbogolat kwatli-o.

¹² Ap iri nggal kwarugwi nab-e Nagawan Indo-nen Isarael nap ennggendumu-nen inggi mbara wirik unpuwag-o. It ereba-ge nit nenlem nap inmin lomboksa tuguruk Nagawan Indo Mondok Amawi worak iri na amanggim nit pogolat ninmin pigit lak wolmag-o!

¹³ Iri-nen kit-nen kwarugwi misig-e yu-o: Kit-nen Nagawan Indo amanggim wosa pidnak mende ereba na isili rak puruk, wanigit lak yosola-ge, kir-e yip langgu mbarogolar-e, Nagawan Indo amanggim wam wosa kan pugwi ondoro iri na-ge kiniyip lengen-nen kobong tak pili-o.

¹⁴ At-nen wanigit lak ala, kit-nen kin wanogolar-e: ”Noluk-nen Nagawan Indo-ge nit-nen amanggim pidnak mende-ge wanusu bug-o?” luk yili-o. At-nen wanigit lak yusu iri-ge kit konkwerak sujwe ndugum pem nimbiri kimbiri wok kerak mbigep ereba na inmin-e tugup lak worali bug-o. Konkwerag-e kenpe misiger-et nde, kir-e konkwela-ge keya inpili iri-ge nanduk Mbal Pem Nagawan imbiri bem urul pogolat-nen owak mbarogolar-e: ”Nir-e pempa tugup lak nonkwerak inmin-et wulmul-o” luk owak mbarigeb-et nde, keya inpili-o. Nde, kit-nen iri kwatli iri-ge Nagawan Indo-ge aru me, iri-nen ndowaga kit-nen amanggim pidnak mende wanusu bug-o.

¹⁵ Mbal Pem Nagawan misiget iri na-net kit min konkwerak min-e kenpe min kinndi min-e misiget tak kinpid iri na-ge lag-a? Iri kwasa kinpid iri-ge Nagawan Indo indi-ge no peraruk-nen kinpij-o? Iri kwarid iri-ge nin pem-nen-e lag-o. Kit-nen kinlirak ndakola, kinlirak ereba na-ge ndemeret Mbal Pem Nagawan ilirak kwat makluk-nen kwarak kenpamu-o. Iri ala-ge, kit kennggendumu-nen konkwerak inmin tugup lak woragit lak yugub-o luk, kit na kit-net kondomok tak kinndi towarak wolmer-o.

¹⁶ Nagawan Indo Isarael nap Enmbal Pem Nagawan-nen yosolar-e: ”Onkwerak keya unpugwi iri-ge an-e mondok nisili-o. Kit kennggendumu ap misik-nen ogwe nde iri nggal kwat obosola-ge, an-e mondok nisili-o. Iri bem-e konkwerak keya unpul-o luk, kwara kinndi tena wolmer-o” luk yij-o.

Ap enpem wene mot mor-et mbenarurak tarem-e panggo yusu-o 2:17–3:5

¹⁷ Kit-nen wene wirik pili ereba bem-e Mbal Pem Nagawan-e eberari rak ibili-o. Iri yogolar-et nde, kit-nen kin wanogolar-e: ”Nir-e Nagawan Indo eberari rak pogolar-e no kwatli-o?” luk yili-o. Iri-ge kit-nen yogolar-e: ”Ap oboksa-nen meya kwatli-t nde, Mbal Pem Nagawan-nen-e konag-et yik eneyasu-o. Nagawan Indo alen-e it enpem-et pusu-o” luk yili-o. Nde, erep-nen-e kit-nen kin wanogolar-e: ”Mot mot nak kwaroso Mbal Pem Nagawan-e ngge me worasu-o?” luk yili iri-nen ar-e eberari rak ibili-o.