MALEAKI 1 - Nanduk Ngget Tul Pidnak Wene

Maleaki

¹ Yu-ge Isarael nap enmanggim Nagawan Indo-nen Maleaki ebem wene wosa pidnak wene-o.

Nagawan Indo-nen Isarael nap enabuwa kaso wene 1:2-5

² Nagawan Indo-nen at ilirak yak ondosolar-e: ”An-e kit kenabuwa-t kasu-o” yak indij-et nde, it-nen onggo yogolar-e: ”Nagawan Indo kat-nen nenabuwa kasolar-e, ngge kwarusu-o?” luk yiga-o. Yogoloma, Nagawan Indo-nen onggo yosolar-e: ”Esau iri-ge Yakup owe-t nde, an-nen-e owot Yakup iri na nde abuwa kasolat,

³ Esau iri na-ge nisili rak pigi-o. Esau woraso sa ndobo worak ereba na-ge an-nen yigisa keya bigi-o. Nde, at uwi nggweyag-e isilepma worak ndakngge wolmomtak nembaga kwarak pigi-o” luk yij-o.

⁴ Erom nap, Esau-nen wigarak ereba-nen yogola-t nde: ”Nit nunuwi siri-ge abu yigisa keya biga-t nde, nir-e tugurug-et wiril lobok yul-o” yogola nggal-nen-e Nagawan Indo-nen-e wene onggo-ge yu nggal yuwa-o: ”It-nen o tuguruk wiril lobok yurak iri-ge ob-et nde, an-nen-e tugurug-et tud tak pil lobok yimin-o. Nde, ap-nen it unnu yarogolar-e: ’Eyak wurugwi uwi-o’ luk ’Nagawan Indo-nen isilepma abu abu enpem pidnak enlem nab-o’ luk yak ondogolat wolma-o” luk Nagawan Indo-nen-e onggo yeleb-o.

⁵ Nde, Isarael nab-e it ondomok enlengen-et karuk-nen yogolar-e: ”Nagawan Indo amawi-ge Isarael nap onnggweyak kwidsa ombol nggwe-t tenagil mburusu me, Nagawan Indo amawi-ge mondok ijar-o!” luk yuwa-o.

Nagawan Indo-nen nggomo ondosolat tepan ombo kwarat met inpidnak wene 1:6–2:9

⁶ Nde, Nagawan Indo Mondok Amawi worak iri na-nen tepan ombo yak ondosolar-e: ”Li marik-nen na ineidtag-e kek tag-et unpugwi-o. Ndegel unpugwi nap-nen na it onmborag-e kek tag-et unpugwi-t nde, an-e kit kineij-et nde, noluk-nen kir-e kek tak nibili bug-o? An-e kit konmbo-t nde, noluk-nen kir-e an naye kagit lak yili-o? Nde, kit-nen-e kenlengenma nggal tak nobogolar-et nde, kit-nen yogolar-e: ’Nir-e ngge kwarogolat-nen nenlengenma nggal tak kibili-o?” luk kin wok nibili-o.

⁷ Kit-nen kenlengenma nggal tak nobogolar-e, nunggwi mende an namanggim purak puk mende-t nde, an namanggim kan pugwi sa iri na me kan pili-o. Iri kwarogolug-et nde, kit-nen kin wok nobogolar-e: ’Nir-e kat te rak kobogolar-e, no kwatli-o?’ luk yili-o. Iri kwarogolar-e, an namanggim wosa kan pugwi ondoro iri na-ge emben to rak pili-o.

⁸ Kit-nen nde wam erengen ngguru min arem nggwidnak min erel worak min ereba na nde an namanggim pogola-t nde ala-ge, lugud tak kwatli-ge irir-o! Iri ala-ge, wam yanem ereba nggal mbi ngguberenot mbi wok ter-a? Iri yogola-ge, indingen tak kunpuruk konag-et kwat kunpuwa, lak?” luk yak indij-o.

⁹ Kit tepan omborak wa-e. Yawo-ge nit nenabuwa yuwaklug-e, Mbal Pem Nagawan emengen mbarugwi mbi wal ker-o. At-nen-e kit-nen tepan yugub-e kenne ereb-e nggaruwa bug-o. Iri kwaruwa iri-ge kit-nen lugud tak kwaridnak pem-et kenne ereb-e nggaruwa bug-o.

¹⁰ Nagawan Indo Mondok Amawi worak iri na-nen yosolar-e: ”Kir-e wewesa an namanggim wam wosa kan pugwi ondoro iri na me-ge kan amare rak perenak woragup naru, an nuwi iri-ge mondok tu lerak puruk keya burag-e mondok konag-o. An-e kit yik kiniyudtak na mondok nisili-o. Kit-nen an namanggim pili mende na wanurag-e mondok nisili-o.

¹¹ Yi nap ndi nap yi wi ndi wi worali-nen an kek tak nibili-o. Ap enlem oboksa-nen an kek tak nobogolar-e, nin me nan me oboksa an nunu kek tak pogolat emben konak mende namanggim kan pogolat, an namanggim wosa purak mende ndak ndag-et kan pili-o.

¹² Alat nde, kit-nen-e an namanggim wam wosa kan pugwi ondoro iri na-ge ebe lak mende rak pogolar-e, kit-nen nunggwi buk mende-t nde, iri na me kan pili-o. Nde, iri kwatli iri-ge an-et kenlengenma nggal tak nibili-o.

¹³ Iri kwarogolat kit-nen yogolar-e: ’Yeba kwarugwi oboksa-ge ninsili yusu-o’ yuruk, an te rak nobogolar-e, yariya wanidnak wam min erel worak min indi ud min ereba na nde waruk lobok luk, an namanggim pili-o. Kit kinndi-nen peragolar-e, kit-nen an namanggim pili ereba-ge an-nen-e wanusu-o luk perali-a?

¹⁴ Kit konowam ereba na enggendumu omok worak usul-et pimin-o luk urul pidnak ereba na worala-t nde, wam-e meya ebe lak, indi ud ereba na nde an namanggim pogolat, an namberam lagwi nap kir-e imbiri lamut mer-o! Nde, an-e nagawan mondok kek tak, ap enlem oboksa-nen kek tak nubugwi-nen yusu-o” luk yij-o.