LUKAS 23 - Nanduk Ngget Tul Pidnak Wene

Yesus na Pilatus eram waruk mbiriga wene 23:1-5

¹ Iri luk, wene mbarugwi nap pidsa men yogolar-e, Yesus na waruk Pilatus eram piga-o.

² Puruk, it-nen enesiget wene at ebem pogolar-e: ”Ap yu-ge nit nenlem nap inndi kabak tak posolat, ’Nagawan Kaisat amanggim tol purak pug-o’ luk yak ondosolat, ’Nagawan Kerisut iri-ge an-net yusu-o’ luk yosola kulige-o” luk yiga-o.

³ Yogolikma-ge, Pilatus-nen at kin wok obosolar-e: ”Kar-e ndemeret Yawuri nap nagawan-nen yusu, lak?” luk yosoloma-ge, Yesus-nen at yak tosolar-e: ”Yigen irir-o” luk yij-o.

⁴ Yosoloma-ge, Pilatus-nen tepan omborak nagawan min ap kwarat na min yak ondosolar-e: ”An-nen-e at ebem wene mbarurag-e at meya yidnak mbi lag-et kasu-o” luk yij-et nde,

⁵ it enne amawi kwarat lagolar-e: ”At-nen mul ondoso wene bem-net ap inndi lesa wanosolar-e, Nggalilea-nen tel korarik, Yurea wi oboksa waring karuk, yawo-ge yu me-t wok yij-o” luk yiga-o.

Yesus na Erores eram waruk mbiriga wene 23:6-12

⁶ Yogolikma, Pilatus na wene iri kuluruk-nen it kin wok onposolar-e: ”Ap yu-ge ndemeret Nggalilea nap, lak?” luk yij-o.

⁷ Nde, Yesus na-ge Erores-nen tenagaidnak wi-nen lobok yidnak ala, aru luk, Erores na-ge Yerusalem lobok yarik worasola-ge, ”At yu-ge Erores eram waruk mberer-o” luk wirik pij-o.

⁸ Erores na pi-net Yesus na obok kuluruk, kudtak indi peraso me, ar-e Yesus karuk, alen kwarat kasolar-e: ”At yu-ge kwiye worak mende mbi kwarosola, kayeg-o” luk peragaij-o.

⁹ Iri ala-ge, Erores na-nen wene kwarat Yesus kin wok ibij-et nde, Yesus na wene mbi erep nggarigit lak, puk nak yij-o.

¹⁰ Nde, tepan omborak nagawan min imiri mbarak pidnak wene enaru nap min at eralu mendak woragolat-nen enne amawi min-et enesiget wene Yesus ebem pogolat woraiga-o.

¹¹ Erores min at-nen idnak san winde min-nen Yesus na nggweyel obogolar-e, pesel obogolat-nen yugwi wene yak togolat woraiga-o. Iri luk, nagawan-nen yurugwi sum yesa wok turuk, tuguruk Pilatus eram wirik ibiga-o.

¹² Nde, iri tarem-nen-e Erores min Pilatus min-e nandug-e kuri worak woragwi-t nde, nanggam kanggam luk lambuk yiga-o.

”Yesus war-et mag-o” luk yid wene 23:13-25

¹³ Iri luk, Pilatus-nen tepan omborak nagawan min Yawuri nap ennggendumu enne kulugwi nap min yonggo unpuruk,

¹⁴ it yak ondosolar-e: ”Kit-nen-e ap yu na an neram waruk lobok yigepndig-e, ’At yu-nen ap inndi kabak tak unpusu-o’ luk yigeb-et nde, kit kinmbiri bem-et wene na kwara kin wok ibiginggal-e, at-nen lugud tak kwaridnak kit-nen ebem pigep wene-ge an-nen-e ndemeret at kwaridnak mbi kagit lag-o.

¹⁵ Erores-nen na irit, at meya yidnak mbi kagit lak ala-ge, nit nendam pil lobok yid irir-o. Meya kwaridnak pem-nen undugwi ndak ndak ar-e mondok kwarigit lak kagi-o.

¹⁶ Iri bem-e, an-nen-e at linggamburok wutluk, wesera keya bimin-o” luk yij-o.

¹⁷ [Nde, pempa O Anggul Pandok Mbiridnak tarem wok yosola, Pilatus-nen o kubu me inpil nggwidnak nab-e misik tak mondok wesera wok ondosolat woraso-o.]

¹⁸ Yosoloma-ge, ap iri oboksa-nen enne misik tarem-et lek kagolat-nen yogolar-e: ”Yesus yu-ge mondok wururag-o! Mbarabas perak wesel nundurag-o!” luk yiga-o.

¹⁹ (Mbarabas iri-ge o Yerusalem-nen nari wari rak posolat ap wiridnak pem o kubu me ibil nggwidnak nab-o.)

²⁰ Yogolikma-ge, Pilatus-nen Yesus na wisirik purak perasolar-e, tugurug-et ap kwarat ereba na inmin wene yij-et nde,

²¹ it-nen enne ngguloksa yogolar-e: ”E lang pang tak pem wururag-o! E lang pang tak pem wururag-er-o!” luk yiga-o.

²² Yogolikma-ge, kenan pem tak posolat-nen Pilatus na-nen it yak ondosolar-e: ”Ar-e no meya yidnak pem-nen wururag-o? Meya kwaridnak pem-nen undugwi ndak ndak ar-e kwarigit lag-o. Iri bem, an-nen-e linggamburok nak wutluk, wisirik ibimin-o” luk yij-et nde,

²³ it-nen mondok enne ngguloksa yogolar-e: ”Yesus iri-ge mondok e bem panggarak purag-o!” luk yik tenak woragola-ge, it-nen yiga na-t kwat yij-o.

²⁴ Kwat yosolar-e, Pilatus-nen na it-nen yiga iri na ndak ndag-et ”Wururag-o” luk yij-o.

²⁵ Iri luk, Pilatus-nen-e it-nen nggi yidnak nap nari wari rak posolat, ap worosola, o kubu me ibil nggwidnak nap na-ge wesel undurug-e, Yesus na-ge it inndi-nen pidnak kwat ubuwakluk wesera ininggem pij-o.

Yesus na e lang pang tak pem wiriga wene 23:26-43

²⁶ It na Yesus waruk mburukmu-ge, o Kirene nap Simon na ama nggwe-nen o siri nggwe mborosoma, imin lid pid lug-e it-nen at na tenagurug-e, e lang pang tak na pijanuruk, Yesus imbirik waruk mburuwakluk lembesa endak pem piga-o.

²⁷ Alama-ge, ap mondok kwarat at langgal luk mbiriga-o. Nde, it ennggenggerag-e kwami erep na mborogolar-e, Yesus ubud yip togolat, yip lilan wanogolat yiga-o.

²⁸ Yogolikma-ge, Yesus na nden kaga it yik eneyasolat-nen yak ondosolar-e: ”Yerusalem kweyap yu-ge wa-e. An nubud yip tili meyog-o. Are, kit kondomok kenabuwa min kinlirak enabuwa min nde yip ter-o.

²⁹ Yu nde ker-o. Ap-nen yogolar-e: ’Kwami yibiri min li ndakwi buk kwami min li nggisiya kamo mak undugwi buk kwami min-e mondok konak lombog-o!’ luk yurak tarem-e lobok yuwa-o.

³⁰ Iri tarem-e ap-nen ndobo yak togolar-e: ’Yemen ninpi-o!’ luk, ndobo amun yak togolar-e: ’Kura ninpi-o!’ luk yuwa-o.

³¹ E ki worala-t nde, yu nggal kwatli ala-ge, e umbuk yosola-ge, ngge nde kwaruwa-o?” luk yij-o.

³² Nde, it-nen waruk mborogolar-e, meya yugwi nap mberen Yesus imin wururak pem inmin mbiriga-o.

³³ Mbirigarig-e, o misik unu-ge Enanggulwak Pugwarak Sa iri me wokluk, Yesus na e lang pang tak pem panggarak puruk, meya yugwi nap mberen ereya na-ge misig-e Yesus inggi kigit ambigit nggwe, misig-e at inggi kware ambigit nggwe wosa inpiga-o.

³⁴ Panggarak pikma, Yesus-nen tepan yosolar-e: ”Neid wa-e. Ir-e enaru buk-nen kwatli me, it-nen meya yili yu-ge kat-nen kembaram tak pi-o” luk yij-o. Nde, it-nen at usum tembesa wanuwoklug-e, engga mbara ligik puruk, enpem mbidnak nap-nen waniga-o.

³⁵ Iri kwarogola-ge, Yawuri nap ennggendumu enne kulugwi nap-nen Yesus na nggweyel obogolat-nen yogolar-e: ”At-nen-e nin nap inmiri yoso-t nde, ar-e ndemeret Mbal Pem Nagawan-nen len ibidnak nap Kerisut nde ala-ge, at ondomok imiri yuwag-o!” luk yogola, ap kwarat ereba na-ge iri me mendak-nen yik karok woraiga-o.

³⁶ San ombo-nen na at nggweyel obogolar-e, at eram lobok luk, anggut engen amburu meya iri na emendam pogolat-nen

³⁷ yogolar-e: ”Kar-e ndemeret Yawuri nap nagawan alar-e, kat kambik kimiri yi-o!” luk yiga-o.

³⁸ Yesus anggulnduk engga mbara pogolar-e: ”At yu-ge Yawuri nap nagawan-nen yusu-o” luk mbara piga-o.

³⁹ Nde, meya yoso nap e bem panggarak pidnak misik iri na-nen Yesus nggweyel obosolar-e: ”Kat nde Kerisut ala-ge, kat kambik kimiri luk, nit na ninmiri yi-o!” luk yij-o.

⁴⁰ Iri yosola-ge, at meya yoso misik iri na-nen at met obosolar-e: ”Kar-e Mbal Pem Nagawan indi aye kasu bug-a? Nit na at e bem panggarak ibiga iri nggal-et Panggarak ninpiga-o.

⁴¹ Nde, nit nenmbereg-e nit meya yidnak pem yurag-et nindiga-o. Alat nde, at yu perak nde meya kwarigit lag-et nde panggarak piga-o” luk yij-o.

⁴² Yuruk, at-nen Yesus yak tosolar-e: ”Yesus wa-e. Kat-nen tenagaidnak wi iri na me wok yosolar-e, an-e meme rak nuburak pug-o!” luk yak tij-o.

⁴³ Yak tosoloma-ge, Yesus-nen at yak tosolar-e: ”Ndemeret yak kereyeg-o. Ap wat luk ndok wiril mburugwi sa iri me-ge yawo-net totno wulmul-o” luk yak tij-o.

Yesus wat yidnak wene 23:44-49

⁴⁴ Mo enggendumu jam duabelas pem-e mo na lumu luk, o iri me pidsa ndamuk luk woralar-e, o keyama jam tiga pem yij-o.

⁴⁵ Nde, Mbal Pem Nagawan ama uguri worak woraso sum na-ge ngara mberen agaij-o.

⁴⁶ Yesus na ene nggoksa yosolar-e: ”Neid wa-e. An nindi-ge kat kinggem pusu-o” yuruk, wat yij-o.

⁴⁷ Wat yosola-ge, san ombo nagawan na-nen iri kwarosola karuk, Mbal Pem Nagawan erembel wanosolat-nen yosolar-e: ”Ndemerer-o. At yu-ge konak nab-o” luk yij-o.

⁴⁸ Iri kwarogola kujwokluk ndok wiriga nap-nen iri karuk, it oboksa enma mborogolar-e: ”Niri nera-nen-o” luk inmigwak taril taril mbiriga-o.

⁴⁹ Nde, Yesus enaru yidnak nap min Nggalilea-nen at imin lobok yiga kwami min-nen-e wandak nggal mendak woragolar-e, iri na kwarogola yik karok woraiga-o.

Yesus yapma piga wene 23:50-56

^50-51 Ap mbi unu-ge Yusup irit woragaij-o. At iri-ge Yawuri nap enma Arimatea-nen lobok yidnak nab-o. Ar-e konak nap, lud tak nak kwaroso nap, Mbal Pem Nagawan-nen tenagaidnak wi lobok yuwa-o luk yik karok woraso nap irit woragaij-o. Ar-e wene mbaroso nab-et nde, it-nen wene mbarogolat, it-nen Yesus kwat obogolat kwarogola-ge, ar-e ennggendumu nggwigit lag-o.

⁵² Yusup na-ge Pilatus eram mberarig-e, Yesus orogwak na wok tuwakluk nggi yak tij-o.

⁵³ Iri luk, Yesus orogwak na-ge waga nggweyak ma rak puruk, sum loro lebenak konak mbi-nen perena keya buruk, waruk mberarig-e, kerep ndobo arem kona nenaridnak sa iri na me pil nggwij-o. Nde, ondoro at yapma pid iri-ge ap misig-e yapma inpigit lag-o.

⁵⁴ Nde, we woragwi tarem na amanggim lid lud tak pugwi tarem Hari Jumat pem-net kwariga-o.

⁵⁵ Nde, Nggalilea-nen Yesus imin lobok yiga kwami na-ge Yusup imin mbirigarig-e, ondoro nenaridnak na min Yesus orogwak na nggesa posola kul-o luk mbiriga-o.

⁵⁶ Iri luk, it na enma mbirigarig-e, Yesus orogwak na bem ndarak purak emben konak mende min amburu min lid lud tak piga-o. Nde, we woragwi tarem-nen imiri mbarak pidnak wene-nen yidnak yidnak kwarogolar-e, it na onmbol kwarogolat woraiga-o.