WENE MBENARUGWI NAP-NEN KWARIDNAK WENE 15 - Nanduk Ngget Tul Pidnak Wene

¹ Siyak woraruk, nggandum mbato mbarugwi tarem-e Simson iri na-ge ogwe iri na eram mbirij-o. Mborosolar-e, kambing mendaso misik ogwe amanggim waruk mbirij-o. Mberarik, abak iri na yak tosolar-e: ”An-e nogwe nene yoso sa nggwimin-o” yak tij-et nde, abak iri na-nen-e: ”Lag-o” luk imiri yij-o.

² Iri luk, Simson yak tosolar-e: ”An nindi arem-nen-e kar-e kisili rak puruk keya bigenma-o perasoluk, kanggam misik wok tukmu-o. Kar-e ondolma owot mondok kwe konak iri nde wani-o” yak tij-o.

³ Yosoloma, Simson-nen yosolar-e: ”Yawo kuri-nen an-nen Pilisin nap kwat inpimin iri-ge an meya-ge lag-o!” luk yij-o.

⁴ Iri yosoluk, Simson na mberarig-e, serigala ndakngge isilepma worak tiga ratus (300) tenaguruk mberen lombok iyuwak kamasa keya buruk, kamarak pidnak sa ereba na-ge tal wosa pil lobok lug-e,

⁵ tal ereba na paga pil lobok lug-e, serigala ereba na-ge Pilisin nap eneyapmu wirik pij-o. Iri yamu-ge, nggandum mbarak ereba na oboksa min nggandum mbato uwi yagidnak ereba min kan nasolar-e, saitun yabu ereba na min-et oboksa kan ninggij-o.

⁶ Iri kwaramu-ge, Pilisin nab-e ”Ta-nen kwaramu-o?” luk mbenariga-o. Mbenarogola, ap-nen yak ondogolar-e: ”Simson abak-nen Simson ogwe na anggam misik wok tidnak pem-nen Simson-nen kwaramu-o” luk yak ondogola karuk, Pilisin nab-e insilepma kwarat luk nggogolar-e, kwe iri na min eid ija enma woragwi oboksa inmin pendaga kan inpiga-o.

⁷ Iri luk, Simson-nen Pilisin nap yak ondosolar-e: ”E! Kit-nen kwarugwi-ge irir-a? Yu kwarigep yu onggo kwat kinpigit lak ma-ge nindi abu woramin pug-o” luk owak mbarij-o.

⁸ Iri luk Pilisin nap ondosolar-e, isilepma min enpem mbud yarik ondosolar-e, it ennggendumu enpe kwarat indij-o. Unduruk mberarik, kerep ndobo Etam iri me kerep yanggo misik me nggwarik woragij-o.

Simson-nen Pilisin nap urugwe nggwe rak inpidnak wene 15:9-20

⁹ Iri kwaridnak pem Pilisin nab-e Yewura nap unuwi nggweyak pem nggogolar-e, unuwi lije ereba me wiril lobok yogolar-e, o siri Lei iri na me enpem mbud yiga-o.

¹⁰ Iri yogola Yewura nap-nen Pilisin nap kin wok onpogolar-e: ”Noluk-nen kir-e nit nindili-o?” yak indiga-o. Yogola, Pilisin nap-nen onggo yogolar-e: ”Nir-e Simson tenatluk, at-nen nit kwat ninpid nggal kwat uburak pem lobok yige-o” luk yiga-o.

¹¹ Iri yogola kulurug-e, Yewura nab-e enpe tiga ribu (3.000) irit kerep ndobo Etam iri na me kerep yanggo iri na me mbiriga-o. Mbirigarik-nen yogolar-e: ”Simson, kar-e nit yawo Pilisin nap ininggiyapma worali iri na-ge kar-e karu bug-a? Kat yawo-ge no kwat nunpusu-o?” yogoloma, Simson-nen onggo yosolar-e: ”An-e it-nen kwat nibiga onggo nak kwat inpigi-o” yak indij-o.

¹² Yosoloma, it-nen yogolar-e: ”Nir-e kat kamat kuburuk mburulndik Pilisin nap ininggem kegera kuburak lobok yige-o” luk yak tiga-o. Yak togola, Simson-nen yosolar-e: ”Iri ala, ’Nit-nen-e kurul pug-er-o’ luk owak mbarer-o” luk yak indij-o.

¹³ Yosola, it-nen yogolar-e: ”Ndemeret kurul-e lag-o. Are, kamat kuburuk nak mburulndik Pilisin nap ininggem kubul-o” yak turug-e, kere ngget nak mberen pem kamariga-o. Kamatlug-e, kerep yanggo iri na me-nen mbiriga-o.

¹⁴ Kamatluk mbirigarik, o Lei wok yogola-ge, Pilisin nab-e inni enne bem-et Simson eram lobok yogola-ge, mondok mimo ereya na-net Nagawan Indo-nen amawi rak posolar-e, kere kamaridnak iri na-ge kan ninggidnak arengga nggal lebena keya bij-o.

¹⁵ Iri rak puruk kelerai wam ondokwak yanak ngget misik wanosolar-e, iri na bem ap seribu (1.000) irit abu indij-o.

¹⁶ Ondosoluk, Simson-nen ndawi yosolar-e: ”Eneyanggo wat makluk kelerai ondokwak pem-nen ap seribu irit abu indigi-o. Kelerai ondokwak yenak pem-nen ap worak ereba na-ge ndok wosa ligik pigi-o” luk yij-o.

¹⁷ Iri rak purug-e, kelerai ondokwak iri na-ge mbo bij-o. Iri kwaridnak me, iri na me unu-ge Aramat Lei yariga-o.

¹⁸ Iri lug-e, Simson yi nere kwarat ala karuk, Nagawan Indo eram wene pil lasolat-nen yosolar-e: ”Nagawan Indo wa-e. Kat-nen kwiye worak kwarosolat yanem-et ombol nggwe rak nibigen-et nde, yawo-ge an-e yi nere-nen wat yumu, kat enaru buk Pilisin nap yu ininggem yurag-e ndag-er-a?” yij-o.

¹⁹ Yosoloma, Mbal Pem Nagawan-nen kerep ndobo Lei iri na uru belak posoloma ndobo arem-nen yi wasola, Simson-e yi ninggij-o. Nurug-e, Simson na-ge tuguruk ebem yamuk yij-o. Iri kwaridnak ala karuk, yi pilana wasu iri na unu-ge Yi Akot yariga-o. Yi ulusu iri-ge Lei iri me-t yawo na worasur-o.

²⁰ Pilisin nap-nen Isarael nap yemndak unpuruk woragola, Simson-nen Isarael nap lit unpuruk nosolar-e, olengen dua pulu (20) irit woragij-o.