ESERA 7 - Nanduk Ngget Tul Pidnak Wene

Esera Yerusalem wok yidnak wene 7:1-10

¹ Yi olengen ndi olengen ereba na worarug-e, Aratatasta iri na-ge Perisia iri me nagawan worala-ge, ap misik unu-ge Esera irit woragij-o. Nde, Esera iri-ge Tepan Ombo Nggok Arun-nen wigarak irit woragij-o. Nde, at omborak anggup nggwe-nen wonaril mbogolar-e: Esera eij-e Asaria, Asaria eij-e Ilkia, Ilkia eij-e

² Salum, Salum eij-e Sandok, Sandok eij-e Agitup, Agitup eij-e

³ Amaria, Amaria eij-e Asaria, Asaria eij-e Merayot, Merayot eij-e

⁴ Seraya, Seraya eij-e Usi, Usi eij-e Mbuki, Mbuki eij-e

⁵ Abisua, Abisua eij-e Pineas, Pineas eij-e Eleasat, Eleasat eij-e Tepan Ombo Nggok Arun irir-o.

^6-7 Nde, Esera iri-ge imiri mbarak pidnak wene ereba na sekola yidnak me, Isarael nap Enmbal Pem Nagawan-nen idnak imiri mbarak pidnak wene Musa wok tid iri na-ge mondok kwara aru nab-o. Nde, Esera iri na-ge Nagawan Indo Embal Pem Nagawan-nen imbiringgat tak posola-ge, Nagawan Aratatasta-nen-e at-nen nggi yidnak mende oboksa wog-et tij-o. Nde, Nagawan Aratatasta-nen nagawan menluk o tena woralat olengen tuju bem tak poso tarem-e Esera iri na-ge Mbabel-nen Yerusalem mborosolar-e, Isarael nab-e tepan omborak min Lewi nap min Nagawan Indo erembel wanogolat Mbal Pem Nagawan ama-nen ndawi yugwi nap min Mbal Pem Nagawan uwi tumende pak tak woragwi nap min yabu wanugwi nap min irit inmin mbirij-o.

^8-9 Waneya anggul-et tanggal satu iri bem-e it iri na-ge Mbabel keya buruk mbiriga-o. Mbirigarig-e, Mbal Pem Nagawan-nen yongga ondosola, waneya lima tanggal satu iri bem-e Yerusalem wok yiga-o.

¹⁰ Nde, Esera-nen-e Nagawan Indo-nen ”Irit kwarurag-o” yidnak wene min it-nen kwat tenak woragwi wene min oboksa iri na at-nen kwarosolat, ereba na Isarael nap mul ondosolat kwarurak pem-e Nagawan Indo-nen idnak imiri mbarak pidnak engga iri na-ge mondok kwara-t mbenarosolat woraso-o.

Nagawan Aratatasta-nen engga mbarak mbi Esera wok tidnak wene 7:11-26

¹¹ Nagawan Aratatasta-nen engga mbarak ap tepan ombo imiri mbarak pidnak wene mondok aru nap Esera iri na wok tidnag-e yu-o:

¹² ”Engga yu-ge Nagawan Aratatasta an-nen aid arem iri me Nagawan Indo Kek tak Woraso Amawi Worak iri na-nen idnak imiri mbarak pidnak wene mondok aru nap Esera iri na kebem pusu-o.

¹³ Wene yu-ge an-net yusu-o. Tepan ombo min Lewi nap min Isarael nap an-nen tenagidnak wi worali oboksa min ta-nen nde enma Yerusalem mbururak peragolar-e, kat kimin-et mburuwag-o.

¹⁴ Nde, kar-e an min an nindi tenakwi nap enpe tuju min nit iri-net o Yerusalem min Yewura min wirik kibili-o. Iri me mburugundik, o iri me abage lombonosolar-e, Mbal Pem Nagawan-nen idnak imiri mbarak pidnak wene kebem pidnak ereba na-ge ndemeret ndemeret yidnak yidnak kwatli, lak? luk lumbunurag-o.

¹⁵ Nde, an min an nindi tenakwi nap min-nen-e Isarael nap Enmbal Pem Nagawan Yerusalem iri me woraso iri na amanggim emas min perak min pili yeba-ge kat-nen waruk mbiri-o.

¹⁶ Iri-nen Mbabel wi woragwi nap oboksa-nen pidnak emas min perak min oboksa min enlem Isarael nap min it-nen idnak tepan omborak min-nen Enmbal Pem Nagawan uwi Yerusalem iri na amanggim pidnak emas min perak min waruk mbiri-o.

¹⁷ Nde, tol ereba bem kat-nen mondok mot mor-et kwarosolat onggo posolar-e, sapi kusi min lomba kusi min lomba amarik mendaso usul min nggandum mbato min anggut amburu min onggo puruk, ereba oboksa-ge Nagawan Indo uwi Yerusalem iri na me-nen Nagawan Indo amanggim kan pugwi ondoro iri na bem kan purag-o.

¹⁸ Iri kwatluk-nen perak nde, perak tol min emas tol min ereba minggit ala perak, Kembal Pem Nagawan indi-nen pidnak ndak ndag-et kat min kanggamirak yabu misiget erep wanili nap inmin kit-nen ukwe pidnak ereba-ge wanurag-o.

¹⁹ Nde, Nagawan Indo ama nen at erembel wanogolat-nen kwarurak silobulo kat keram kegera pidnak ereba-ge Mbal Pem Nagawan Yerusalem worasu iri na eram nak kegera purag-o.

²⁰ Nde, Nagawan Indo uwi iri na amanggim ukwe pidnak mende erep iri-ge nagawan-nen tenagidnak wi iri-nen ndok wiridnak tol ereba-t nggi yurag-o.

²¹ Nde, yawo-ge nagawan an-nen tenagidnak wi o Eperat mo mboso (barat) nggwe ngguberenot woraidnak sa-nen tol tena worali nap kenpem wene yu pusu-o: Kek tak aid arem iri me woraso Mbal Pem Nagawan iri na-nen idnak imiri mbarak pidnak wene mondok kwarat aru nap tepan ombo Esera-nen nde nggi yidnak mende-ge mondok ndag-et nak yu nggal wok turag-o.

²² Wok togolar-e, angin ndak wosa ereya nggal wonarak irit wok turag-o: perak tol angin-e 3.400 kilo, nde, nggandum mbato angin-e 10.000 kilo, nde, anggut amburu-g e ndak wosa 2.000 liter woranggasa wok turag-o. Nde, saitun amburu na ndak wosa 2.000 liter woranggasa wok turag-o. Nde, mayu-ge at-nen ukwe pidnak ndag-et wok turag-o.

²³ Nde, an na irit, abok an nimbirik nagawan men ma na irit, Mbal Pem Nagawan isilepma nenpem puwa naru, aid arem iri me kek tak woraso Mbal Pem Nagawan iri na-nen at uwi iri na amanggim nggi yuwa mende-ge mondok kona mot mor-et lid lud tak pogolat wolmomtag-o.

²⁴ Kit-nen-e tepan ombo min Lewi nap min ndawi yugwi nap min Mbal Pem Nagawan uwi tumende pak tak woragwi nap min iri me yabu wanugwi nap min iri-nen Nagawan Indo uwi iri me yabu wanugwi nap erep min enpem-e pemerinta enmanggim purak tol puwakluk, mondok nggi yurak pug-o.

²⁵ Nde, kat Esera-nen-e Mbal Pem Nagawan-nen indi nggat nggat elem wok kirid iri na bem-net kwarosolar-e, o Eperat iri me mo mboso (barat) nggwe worali nap oboksa kat Kembal Pem Nagawan-nen idnak imiri mbarak pidnak wene ereba na ndak ndak kwarugwi nap ereba na tena unpuruk wolmakluk kat-nen-e ennggendumu enne kulurak nap lenak onposolat, enpem wene mbenarugwi nap lenak onposolat kwarurag-o. Nde, kat-nen-e imiri mbarak pidnak wene ereba na enaru buk nap ereba-ge mul undurag-o.

²⁶ Ta-nen nde Kembal Pem Nagawan-nen idnak imiri mbarak pidnak wene ereba na kwarigit lak yosolat, iri-nen nagawan-nen tenagidnak wi iri na me-nen kwarogolat kwarurak yidnak wene ereba na wolmomtak owak mbarak pidnak wene ereba na kwarigit lak yuwa nap iri-ge mondok ondogolat ala na, mbo onpogolat ala na, enarengge ondoro rak pogolat ala na, o kubu me onpogolat ala na, irit kwat unpurag-o” luk mbarij-o.

Esera-nen Mbal Pem Nagawan erembel wanidnak wene 7:27-28

²⁷ Yosoloma, Esera-nen yosolar-e: ”Nit nonmborak-nen erembel wanugwi Mbal Pem Nagawan iri nak kek tak wolmag-o! Nagawan Indo-nen nagawan iri arem yabu wanosola-ge, nagawan-nen-e Nagawan Indo uwi Yerusalem iri amanggim nag-et nggok tak pusu-o.

²⁸ Iri yosolar-e, Mbal Pem Nagawan-net an yongga norosola, nagawan min at indi tenakwi nap min at eyabu wanugwi nap yok nggok min-nen-e an-e indingen tak nibili-o. Nde, Nagawan Indo Nembal Pem Nagawan-nen-e amawi wok neramu, Isarael nap enne kulugwi nap enmengen mbarosola, it inndi-ge an nimin Yerusalem mbururak yili-o” luk yij-o. 8:1-36 Pasal 8 yu arem-e Esera imin Yerusalem mbiriga nap unnu mbarak min mbururak pem lid lud tak pidnak wene min Yerusalem mbiriga wene min mbarak worasu-o.