AYUP 39 - Nanduk Ngget Tul Pidnak Wene

¹ Ndobo bem woraso kambing ereba na ija-nen ndagusu tarem-e kar-e karu, lak? Urusa wam mbepme mende amarik ndagosola-ge, kar-e kwara lombot poso, lak?

² Nde, ereba abila luk, inik nggal woraruk-nen ndagoso-o luk, kar-e karu, lak? ”Iri tarem-nen ndaguwa-o” lug-e kar-e wonarak woraso, lak?

³ Iri tarem-nen amarik ndagosolat, mem kasolat ombol punu ma-o” luk kar-e karu, lak?

⁴ Amarik ereba na-ge nembaga ereba woralat, mondok nggok amawi luk, ija keya buruk, indigum noso-o.

⁵ Kelerai erengen kege iri-ge ta-nen lerak keya boso-o? Ta-nen we nijat ereba nuwakluk lerak keya boso-o?

⁶ At ama nggal at wolmomtak an-nen wok tosolar-e, nembaga irit wok tukmu-o. Nembaga mayu worak ereba me-ge at wolmomtak ondoro rak pukmu-o.

⁷ Nde, kelerai ereba na-ge o siri unsune worak ereba na koroga woraso bug-o. Ap-nen mbi miniya rak puruk, ebem-nen yabu wanurag-e meya-o.

⁸ Ndobo bem tusuangge ereba-ge at naso-nen yusu-o. Ereba me tusuangge miri kore yoso-o.

⁹ Lembu wam erengen kege-nen-e kamanggim yabu wanuwa? Lembu iri nggal-e kat kowam uwi arem nene yuwa?

¹⁰ Kat nen-e nggweyak yaloso iri na ebem parik puruk, kamawi nak-nen watsa nggweyak yaloso rak poso-a? Kat-nen-e nggweyak ndamera keya buwakluk, watsa ebem poso-a?

¹¹ Kar-e at amawi kwarat ala karuk, kindi-ge ebem-et wat tak puruk, keyabu nggok angin worag-e at ebem purag-e ndag-a?

¹² Kenggandum mbato mbarugwi tarem-nen mbarak pidnak ereba na ndok worak puruk, ”Waruk engen lurugwi sa pil mbiri-o” yak toso-a?

¹³ Nde, towe saro nggal (burung unta) pubu mbirigit lak, isiyamu mondok ndag-et nak yembak kaso-t nde, towe mbuwa waru-nen pubu mboroso-ge at iri min ndak wururag-e meya-o.

¹⁴ Nde, towe saro nggal iri-ge engen-e sisiri bem puruk nak keya bosoma, sisiri nen nak embem tak poso-o.

¹⁵ At-nen-e ”Nengen-e ap min ndumbu nggwija min-nen yemen kujwarik, tegarak puwa-o” luk mondok umuj-e kaso bug-o.

¹⁶ At iri-ge at ondomok amarig-et nde, ”An namarig-o” luk peragit lak, nin nggal tak posolar-e, at-nen irigak mbidnak ereba na-ge yebet kaso bug-o.

¹⁷ Iri kwaroso iri-ge an-net indi lak ndak worak puruk: indi tenggerak elem-e wok tigit lak yukmu-nen kwarusu-o.

¹⁸ Alat nde, at nde ndag-et nak pong kasolar-e, kura wam min ap ombol pem koreyak iri na min-e keya onposo-o.

¹⁹ Ayup wa-e. Kura wam pong kil mboroso amawi iri-ge kat-nen wok tigen-a? Wok tosolat, urumsu yambuk arem mborosolat kwarusu iri-ge kat-nen wok tigen-a?

²⁰ Nde, mborosolat mangge nggal yawot lang, sing kerang mburusu iri na-nen ndowaga ap kwiye yugwi iri-ge kat-nen yak tidnak pem kwarusu-a?

²¹ Mbirikmu-nen alen posolat ijok-nen nggweyak poloso-o. Mondok amawi kunduruk, wim silmu ndag-et nak mboroso-o.

²² Kwiye-nen kot kot yugwi unu iri-ge ar-e mondok aru bug-o. Are, kabo aye-o luk na mondok tema yoso bug-o.

²³ Nde, ombol pem ap koreyak iri na-nen yalawi tiongsa mberak pidnak iri na ebem mo yembak tak posolar-e, abinal-nen yembak yosolat pinel kabel mboso-o.

²⁴ Nde, iri yosola, kura wam iri na ebem-e age nak to yosola, kura na-ge mondok pong kaso-o. Wim ala ene pu yugwi mende ene pu yogola-ge, mondok kondok wirigit lak, amawi kunduruk pong kil mboroso-o.

²⁵ Ene pu yugwi mende ene pu yogola kolosolar-e, pempa indi purung tenak woraso-o. Erepma-t nde, wim emben-e kaso-o. Wim wari-nen: ”Yu nggal-o, iri nggal-o” yogolat, enne na kolosor-o.

²⁶ Nde, towe manggenowe-nen abare (selatan) nggwe pubu mborosolar-e, yambuk kagit lak yebaluk nak mboroso, iri kwasa pubu mboroso ereba-ge kat-nen mul toso, lak?

²⁷ Nde, towe ud iri-ge ndobo wolak pem at uwi wirigit lak ma-nen kat-nen yak tidnak ndak ndag-et at uwi-ge ndobo anggul pem teram woroso-a?

²⁸ At uwi-ge kerep ndobo worok nggabik nggabuk pem teram-et woroso-o. Nde, kerep abi anggat yorok worok ereba na-ge at uwi pak nggal kwarak poso-o.

²⁹ Nde, iri na me woralar-e, tu ponok ponok ereba na nak yik karok pak tak woralar-e, at-nen norak mende lobok yuwa ereba nak lemben tenak woraso-o.

³⁰ Nde, eyabi worak wat yidnak sa-ge ar-e iri na me nak mborosolat woralar-e, at amarik ereba na eyabi naso-o.