2 SEMUEL 9 - Nanduk Ngget Tul Pidnak Wene

Ndaut min Mebiboset min-nen kwaridnak wene 9:1-13

¹ Nde, misik tarem-e Ndaut-nen kin wanosolar-e: ”Ap Saul-nen ndagidnak mbi worali, lak? Woragola-ge, Yonatan-nen ndowaga an-e ir-e konag-et kwat inpimin-o” luk yij-o.

² Nde, Saul ilirak ndegel onposo nap unu-ge Siba irit woragij-o. At iri-ge: ”Nagawan Ndaut eram mbiri-o” yak tikma, Ndaut eram lobok yamu-ge, Ndaut-nen kin wok obosolar-e: ”Kar-e Siba-t lak?” luk yak tij-o. Yosoloma, at-nen-e: ”An-er-o” luk yij-o.

³ Iri luk Ndaut-nen kin wok obosolar-e: ”Saul ilirak mbi worali, lak? Woragola-ge, an-nen Mbal Pem Nagawan imin urul posolat ’Konag-et kwat inpimin-o’ luk urul pigi ndak ndag-et konag-et kwat inpimin-o” luk yij-o. Yosoloma, Siba-nen yosolar-e: ”Yonatan ambara elepwak langgonak misiget worasu-o” luk yak tij-o.

⁴ Yosoloma, Nagawan Ndaut-nen yosolar-e: ”Ngge me worasu-o?” yosoloma, Siba-nen yosolar-e: ”Amiel ambara Makit ama o Londebat worasu-o” luk yak tij-o.

⁵ Yosoloma-ge, Nagawan Ndaut-nen-e: ”Yonatan ambara iri na wene mbo ibil mberer-o” luk yak indij-o.

⁶ Nde, Saul ambara Yonatan-nen ndagidnak Mebiboset iri na lobok yosolar-e, Nagawan Ndaut iri na kek tak obosolat erare nggwe tud yij-o. Iri kwarosola, Ndaut-nen yosolar-e: ”Kar-e Mebiboset, lak?” yosoloma, at-nen yosolar-e: ”Iri-ge an-er-o, nab-o” luk yak tij-o.

⁷ Yosoloma, Ndaut-nen yosolar-e: ”Kar-e kwiye kasu-ge meyog-o. Kat keid Yonatan iri na ebem-nen ndowaga an-nen-e kabuwa-t kasu-o. Nde, kombo Saul onggweyag-e oboksa tuguruk kat wok kirimin-o. Nde, kar-e pempa nunggwi mende-ge an woraso sa-nen totno nok tenak wulmul-o” yak tij-o.

⁸ Yosoloma, Mebiboset iri na-ge tuguruk erare nggwe tud yosolat-nen yosolar-e: ”Nab-o. An nggal-et nde, noluk-nen kar-e an nimin-e konak nak kwat nubusu-o?” yij-o.

⁹ Iri luk, Ndaut-nen Saul ndegel oboso nap Siba iri na wene mbo uburuk-nen yak tosolar-e: ”Kat-nen ndegel oboso nap Saul min at ama woragwi nap min inmining angge oboksa-ge at ombo yu wok tusu-o.

¹⁰ Iri ala-ge, kat kilirak min kat yongga kurugwi nap min-nen-e nggweyak tuguruk wok tusu iri me yabu wanuruk, ebe mbatlug-e, konggo bidnak nap Saul ilirak-nen ukwe lak, ndak wolmakluk wok ondosolat wolmomtag-o. Alat nde, Mebiboset iri-ge nunggwi mende-ge pempa an woraso sa-nen nasolat wolma-o” yak tij-o. (Nde Siba iri na-ge ambararak enpe-ge lima belas, nde, yongga wurugwi nap enpe-ge dua pulu (20) irit woraiga-o.)

¹¹ Yosoloma, Siba-nen onggo yosolar-e: ”Nagawan kat-nen nebem piger ereba-ge oboksa kwarimin-er-o” luk yak tij-o. Nde, Mebiboset iri na-ge Nagawan Ndaut ambik ambara nggal nunggwi mende-ge Ndaut imin ondoro misik me nasolat woragij-o.

¹² Nde, Mebiboset iri na ambara unu-ge Mika-o. Nde, Siba ama woragwi nap oboksa-ge Mebiboset ndegel ubugwi nap irit kwat yiga-o.

¹³ Iri nggal kwasa Mebiboset owak mberensa wat yidnak iri na-ge Yerusalem woralar-e, pempa nunggwi mende-ge nagawan woraso sa-nen nasolat woragij-o.