2 SEMUEL 22 - Nanduk Ngget Tul Pidnak Wene

Ndaut-nen ombol nggwe yidnak pem ndawi yidnak wene 22:1-51

¹ Nde, Saul min wim nap erep min ininggem-nen Nagawan Indo-nen imiri yidnak pem-e Ndaut-nen-e Nagawan Indo erembel wanosolat ndawi yu ngarij-o:

² Nagawan Indo kar-e an kura noboso elem-nen yusu-o. Kar-e an namawi elem-nen yusu-o.

³ Nagawan Indo-ge an kurak yoso pak leget-nen yusu-o. Nembal Pem Nagawan kar-e an lumurak noboso kerep ndobo nggal-nen yusu-o. Kar-e ndumno nggal an lumurak nobosolat, an pempa yamuksa wolmakluk yik neyarok worasolat kwarusu-o.

⁴ An-e Nagawan Indo eram wene mbo bil lasola, wim nap ininggem-nen mengga keya nubusu bem-e at nak erembel wanurag-o!

⁵ An-e wat yugwi elem-nen lop lop tak nobosolat, lak tak onposo elem-nen yemendak nobosolat yij-o.

⁶ Wat momtak elem-nen lop lop norosolat, wat momtak esabu-ge an nabuwok logo worasolat yij-o.

⁷ An-e pabik pabok woralar-e, Nagawan Indo eram wene mbo bil lasolar-e: ”Yongga niri-o” luk Nembal Pem Nagawan eram nggi yigi-o. Iri yosola, at ama-nen-e an nene-ge kuluruk, an nene mbo bil laidnak kwara kulij-o.

⁸ Mbal Pem Nagawan isilepma yosolar-e, o nggweyak yu-ge tugup luk lele yosolat, ndobo mabin min-et tugup luk lele yij-o.

⁹ Abiru nggwe-nen-e kule wasolat, emndam nggwe-nen-e kanduk min kan ngen min wagij-o.

¹⁰ Ar-e mbal ngak tak puruk mbuwasolar-e, nggan nggan puru rak pem ijok puruk mbuwagij-o.

¹¹ Ar-e aid nap (kerup) ebem kore luk pubu mbirij-o. Ar-e o wija isiyamu bem kore luk yebaluk nij-o.

¹² Ar-e at ondomok lumurak posolar-e, ndamuk ebem muruksa keya buruk woragij-o. Nggan nggan mom ki rak-nen nggetla keya buruk woragij-o.

¹³ At eram-nen o binel yosolar-e, nggan nggan min talme engen worak min kanduk min wagij-o.

¹⁴ Iri kwarosolar-e, Mbal Pem Nagawan Mondok kek tak iri na-nen at ene kuluwakluk teram nggwe-nen Nagawan Indo ene o nggu nggal yij-o.

¹⁵ At-nen at amare bem mbisingsa ondosola-ge, at uwim nab-e sit mbit tak inpij-o. At-nen-e o binel kundugu kundugu yebek yaga pil mbuwalat, kwiye-nen mbiriga-o.

¹⁶ Nagawan Indo-nen isilepma min met onposolat, wim nap enpem mbud yosola-ge, o nggweyak mabin iri na kuwak yosolat, yi koma yiriwak iri na kuwak yosolat yij-o.

¹⁷ Yi yubuk tak arem-nen Nagawan Indo inggi teram nggwe-nen mberak pil mbuwasolar-e, tena nuburuk lit neyagij-o.

¹⁸ An nuwim nap enmawi kwarat ininggem-nen, an insili rak nubugwi nap oboksa ereba-ge an-e namawi lak, it enmawi mondok kwarat me, it ininggem-nen nimiri yij-o.

¹⁹ It-nen an nebem kore yogolar-e, lak tak nuburak mende nebem mbidnak tarem nak-nen nebem kore yiga-t nde, Nagawan Indo-ge an yongga noroso nap kwat yij-o.

²⁰ At-nen indingen tak nobosolat me, lak tak nuburak inggem-nen mengga keya nobosolat, nimiri yij-o.

²¹ Nagawan Indo-nen-e an-nen lud tak nak kwaridnak iri na onggo wok norosolat, an-nen lugud tak kwarigit lak yosola me, imbiringgat tak nibij-o.

²² An-e Nagawan Indo-nen nebem pidnak nak kwarosolat, Mbal Pem Nagawan keya buruk mboroso bug-o.

²³ At nen ”Iri nggal kwarurag-o” yidnak wene oboksa an-nen kwara yebet kasolat, at-nen nebem pidnak wene-ge liring liring tak poso bug-o.

²⁴ An-nen lugud tak kwarugwi keya buruk, lugud tak kwarigit lak woraso iri-ge ar-e arur-o.

²⁵ Iri ala, Nagawan Indo-nen-e an-nen lugud tak kwarigit lak yosola me, at-nen-e an-nen lud tak nak kwarusu-ge onggo wok noroso-o.

²⁶ Nagawan Indo wa-e. Kar-e ap kat kimin tugup lak worali nap inmin-e tugup lag-et woraso-o. Nde, konak nak kwarugwi nap inmin-e konag-et kwat onposo-o.

²⁷ Kat kimin marak woragwi nap inmin-e kar-e marak irit woraso-o. Alat nde, lugud tak kwarugwi nap inmin-e sirid mbaroso-o.

²⁸ Inndi teberak woragwi nab-e kat-nen-e inmiri yoso-o. Alat nde, inndi kek yugwi nab-e, kat-nen teberak onposo-o.

²⁹ Nagawan Indo wa-e. Kat-nen-e an neral pago bosolat, Nembal Pem Nagawan-nen-e an ndamuk woraso-ge lak tak poso-o.

³⁰ Kat-nen-e nuwim nap lak tak unpurak amawi wok norosolat, kat-nen amawi wok norosolar-e, it-nen pak puruk woragwi mija luk nggusu-o.

³¹ Mbal Pem Nagawan-nen kwaroso iri-ge iminep mbarak-nen yusu-o. Nagawan Indo-nen kwarimin-o luk urul pidnag-e ndemerer-o luk yebet kagwi-o. At iri-ge at arem kura worali nap oboksa undumno nggal-nen yusu-o.

³² Mbal Pem Nagawan iri-ge nit nenambigit nak yoso me, Mbal Pem Nagawan-e Nagawan Indo iri nak-nen yusu-o.

³³ Mbal Pem Nagawan iri-ge an namawi rak posolat, an-nen noso tula-ge yamuksa nuwakluk, at-nen konoso-o.

³⁴ At-nen an nuwog-e urusa wam ujok nggal amawi worak poso-o. Ndobo worak sa ereba-nen nimiri yoso-o.

³⁵ At-nen-e wim nggugwi mirik nobosola, an-e san mondok amawi worak kunarak woraso-o.

³⁶ Nagawan Indo wa-e. Kar-e nggetlel nuburuk woralat, nimiri yoso-o. Kat-nen kwat noboso iri-nen an nunu worak tak poso-o.

³⁷ An wim kugun pem wok nuburuk mburuwa naru, kar-e yik neyarok woraso-o. An-e mondok wosa mboso bug-o.

³⁸ An-nen-e nuwim nap muk eneyaruk urugwe nggwe rak onposo-o. Nde, it lak tak inpigit lak ma-ge an-e mondok ndong yoso bug-o.

³⁹ An-nen werel yaga mbud tak inpidnag-e tuguruk men yugwi bug-o. An-nen mbud tak inpidnag-e, an neram-nen-e pugwak yugwi bug-o.

⁴⁰ Kat-nen-e an-nen wim nggurak amawi wok norosolat, wim nap urugwe nggwe rak unpuruk ombol nggwe yurak amawi wok noroso-o.

⁴¹ An nuwim nab-e kat-nen-e an neram-nen langgara wirik onposo-o. An insili rak nubugwi nab-e an-nen lak tak onposo-o.

⁴² Ir-e yongga unduwakluk enne mbo bili-t nde, mondok yongga indigit lag-o. Ir-e Nagawan Indo eram enne pil lali-t nde, enne erep nggaroso bug-o.

⁴³ Ir-e an-nen mabe nggal yigisa liring eneyaso-o. It iri-ge miril nggal an-nen ndowasa mbo onposo-o.

⁴⁴ Kat-nen-e eyak nak wurugwi nap ininggem-nen nimiri yosolat, ap enlem oboksa enanggul pem nagawan tak nobosolat kwarigen-o. Ap enlem eneyaso bug-et nde, an ndegel nubugwi nap kwat yili-o.

⁴⁵ Enlem nin nab-et nde, an neram tebe yili-o. Nde, an-nen wirik pidnak wene kulurug-e, yidnak yidnag-et kwatli-o.

⁴⁶ It-nen enmawi kundugwi-ge lak yosolat, kwiye-nen lele yogolat it kurak yil nggugwi sa-nen wali-o.

⁴⁷ Nagawan Indo-ge uruk nak woraso-o! Nambigit Yoso iri nak erembel waner-o! Nimiri yoso Mbal Pem Nagawan kek tak woraso anggu obok nak nggok tak per-o!

⁴⁸ At nen nuwim nap urugwe nggwe rak unpuruk ombol nggwe rak nubusu-o. Ap enlem oboksa an neram nak tebek tak unpusu-o.

⁴⁹ Ap-nen nuwim nap ininggem-nen nimiri yusu-o. Nagawan Indo wa-e. Kat-nen nuwim nab-e urugwe nggwe rak unpuruk ombol nggwe rak nubusu-o. Kat-nen-e ap insilepma worak ininggem-nen kura nubusu-o.

⁵⁰ Iri yosola-ge, an-nen-e ap enlem oboksa ennggendumu-nen kek tak kobosolat, ndawi bem kerembel wanusu-o.

⁵¹ Mbal Pem Nagawan-nen-e at-nen mendak pidnak nagawan iri na mondok ombol nggwe rak ubusu-o. At-nen lenak pidnak nab-e pempa abuwa kasolat worasu-o. Iri-ge Ndaut min at-nen wigarak min pem irit enabuwa kasolat worasu-o.