2 SEMUEL 2 - Nanduk Ngget Tul Pidnak Wene

Ndaut Yewura nap ennggendumu nagawan men yidnak wene 2:1-7

¹ Iri luk ombol nggwe-ge Ndaut-nen Nagawan Indo kin wanosolar-e: ”Nagawan Indo kindi-nen-e an-e Yewura siri misiget yu nak tenaburuk wolmomtak perasu, lak?” yosoloma, Nagawan Indo-nen yosolar-e: ”Yigen irir-o” yosoloma, Ndaut-nen yosolar-e: ”O-ge ngge-o?” yosoloma, Nagawan Indo-nen yosolar-e: ”Eberon irir-o” yak tij-o.

² Yak tosoloma-ge, Ndaut iri na-ge ogwerak mberen Abinoam Yisiriel kwe iri na min Nabal ogwe togwe Karamel kwe Abigail iri na min inmin luk Eboron mbirij-o.

³ Iri nggal-et at imin nugwi nap onkwela inmin na Ndaut imin-et mbiriga-o. Mbirigarig-e, Eboron min eralu eralu ereba me-t woraiga-o.

⁴ Woragolar-e, Yewura nap Eboron lobok yogolar-e, Ndaut iri na-ge Yewura nap ennggendumu nagawan tak pogolat anggul tenaiga-o. Nde, Nggileat woragwi Yabes nap-nen Saul iri na yapma ibidnak wene-ge Ndaut-nen-e kulij-o.

⁵ Kulurug-e, Ndaut-nen ap iri na me wirik onposolat-nen wene wosa enpem posolar-e: ”Kir-e kit-nen idnak nagawan iri na abuwa kagolat Saul yapma ibigep iri bem-e Nagawan Indo nen imbiringgat tak kunpuwag-o.

⁶ Iri bem-e Nagawan Indo-nen tugup lak enabuwa kaso iri na bem kenabuwa kujwag-o. Kit-nen iri nggal kwarigep pem-e an-nen na kit kinmin-e konag-et kwarosolat woramin-o.

⁷ Kir-e mamak puruk woragolat, wim wari-nen kwarugwi nggal-et kwiye lag-et wolmer-o. Kit-nen idnak nagawan Saul iri na-ge ndemeret wat yij-et nde, an-e Yewura nap-nen it ennggendumu nagawan makluk mendak nibiga-o” luk yak indij-o.

Isiboset iri na Isarael nap ennggendumu nagawan mendak ibidnak wene 2:8-11

⁸ Saul-nen idnak san ombo onowe Net ambara Apnet min Saul ambara Isiboset enmbereg-e Yi Yareren eyak ele bem o Maganaim mbiriga-o.

⁹ Mbirigarig-e, Apnet iri na-nen Isiboset iri na-ge o Nggileat min Asuri min Yisiriel min Eperaim min Mbenyamin min iri-nen mondok Isarael nap oboksa enanggul pem irit nagawan mendak ibij-o.

¹⁰ Nde, Isiboset iri na-ge olengen empat pulu (40) bem Isarael nap enanggul pem nagawan tak ibikma, at-nen tena unpuruk woralar-e, olengen mberen nak woragij-o. Alat nde, it enlem Yewura nab-e tugup lak pempa Ndaut-nen yidnak yidnak kwarogolat woraiga-o.

¹¹ Nde, Ndaut iri na-ge Eboron iri me-nen Yewura nap tena unpuruk woralar-e, olengen tuju setenga (7,5) irit woragij-o.

Isarael nap min Yewura nap min wim mbariga wene 2:12-32

¹² Nde, misik tarem-e Apnet iri na-ge Isiboset imin nugwi nap ereba na inmin Maganaim-nen-e o siri Nggibeon mbiriga-o.

¹³ Nde, kwe Seruya ambara Yoap iri na min Yewura nap Ndaut imin nugwi nap min-e o Nggibeon iri na me-t mbirigarik, Apnet tak inmin lambuk yogolar-e, kuri wat luk woragolar-e, Nggibeon iri me yi mburu iri na koroga Apnet-nen lit karuk iri na-ge yi mburu iri na eyak ponok nggwe woraiga-o. Nde, Yoap-nen lit karuk iri na-ge eyak ponok nggwe woraiga-o.

¹⁴ Woragolar-e, Apnet-nen Yoap yak tosolar-e: ”Nit ninmin nugwi nab-e enmawi mbi wal kujwag-o” yosoloma, Yoap-nen yosolar-e: ”Ob-o” luk yij-o.

¹⁵ Nde, Isiboset ambigit nggwe-ge Mbenyamin nab-e enpe duabelas irit nggwiga-o. Iri nggal-et Ndaut imin nugwi nap na enpe duabelas irit nggwiga-o.

¹⁶ Iri nggogolar-e, enanggulsu merara tenaburuk, kabo tawinduk enal arem pil nggwe nggwe yogolar-e, ponok ponog-et wat kerak mburuk yat wat laiga-o. Nggibeon iri me-nen iri kwaridnak sa iri na unu-ge Kabo-nen Yabu Wanidnak Sa-o luk yariga-o.

¹⁷ Iri kwatlug-e, wim kwiye worak mbarogolar-e, Isarael nap san ombo Apnet-nen waruk iri na-ge Ndaut-nen idnak san ombo-nen urugwe nggwe rak inpiga-o.

¹⁸ Iri yogolar-e, kwe Seruya ambararak kenan Yoap min Abisai min Asael min iri-ge iri me woraiga-o. Nde, Asael iri-ge pong kasolar-e, ijok anggarim-e pabeya nggal mboroso irit woragij-o.

¹⁹ Woralar-e, Asael-nen Apnet iri muk mak kil mborosola,

²⁰ Apnet-nen ombol nggwe petla yik karuk-nen yosolar-e: ”Kar-e Asael-a?” yosoloma, at-nen yosolar-e: ”Ye, an-er-o” luk yak tij-o.

²¹ Yosoloma, Apnet-nen tugurug-et yosolar-e: ”An muk neyasu-ge meyog-o. Are, an-nen idnak san ombo ereba ennggendumu misik tena unpugundik esan mengga wani-o yak tij-et nde, kuligit kuligit at nag-et muk kil mborosola karuk,

²² Apnet iri na-nen tugurug-et yosolar-e: ”An muk neyasu-ge meyog-o. Kururak nimbit min-et iri kwarusu iri-nen ndowaga kirimindig-e, kowe Yoap iri-ge nggesa-nen yik kamin-o?” yak tij-et nde,

²³ Asael na-ge ndong yigit lak muk kaso komo nak ala karug-e, Apnet-nen-e tege-ge ombol nggwe mbising kil mbiridnggal-e, Asael na-ge embesingga arem-et nggwarik-nen abi-ge erawak nggwe mbiringin yij-o. Iri rak pamu, Asael na-ge mbirigit lak iri na me-t wat yij-o. Iri yamu, at imbirik lobok yiga nap ereba na-ge Asael worak worasu sa iri na me-t yong ndong yiga-o.

²⁴ Alat nde, Yoap min Abisai min ya na-ge Apnet iri na muk kil mbiriga mbiriga mo wusa nggosoloma-ge, ndobo Ama iri na bem wok yiga-o. Nde, ndobo Ama iri-ge mo luwaso (timur) nggwe Nggiya ambigit Nggibeon-nen-e nembaga ereba me-o.

²⁵ Iri me-nen-e Apnet iri na-ge Mbenyamin nap erep ereba na inmin lambuk yiga-o. Iri yosolar-e, ndobo misik pem wim nggurak lid lud tak piga-o.

²⁶ Iri kwarogolat Apnet-nen Yoap eram ene pil lobok yosolar-e: ”Nir-e pem mondok wim nggwerenak wulmul-a? Kar-e wim yu-ge umburugwi nggari worak na-ge yebet kasu bug-a? Nir-e nenlem misiget kit kentep-net yili-o. Mepme tarem-nen kat-nen idnak san ombo nit muk neneyali ereba larok maklug-e, meyog-o luk watsa yak undugun-o?” luk yak tij-o.

²⁷ Yosola karuk, Yoap-nen ene nggarosolar-e: ”Mbal Pem Nagawan Uruk nak Woraso owag-o. Kat nde kene nde yigit lak nggal-nen-e an nimin nugwi nab-e mug-et keneyukmu o nda yeleb-et nde, iri yigen iri-nen larok yili-o” luk yak undurug-e,

²⁸ Yoap-nen-e at-nen idnak san ombo-nen Isarael nap muk eneyali ereba na ndong yuwaklug-e, posid poba ene yij-o. Iri kwasa wim na-ge saiga-o.

²⁹ Nde, Apnet iri na esan ombo inmin-e mondok kubu tu wanigarik, Yareren Mbirik iri na mbiriga mbiriga, Yi Yareren mbatluk mburukmu, o nda yosola-ge, irit mbiriga mbiriga Maganaim wok yiga-o.

³⁰ Nde, Yoap iri na-ge Apnet tak muk eneyaiga iri na keya buruk, ndok worak unpuruk wonarosolar-e, Asael na-ge wonarigit lak, ap erep wonat unpukmu-ge enpe-ge sembilan belas irit lak eneyaiga-o.

³¹ Nde, Ndaut owosirak-nen Mbenyamin nap Apnet owosirak ondogolar-e, tiga ratus enam pulu (360) irit indiga-o.

³² Wonat unpurug-e, Yoap min at imin nugwi nap inmin-nen-e Asael na-ge waga at owe owot yapma unpugwi sa Mbetleyem iri me-t yapma ibiga-o. Iri lug-e, kubu iri na-t mbiriga mbiriga kuplila-ge Eboron wok yiga-o.