2 NAGAWAN NAGAWAN-NEN KWARIDNAK WENE 22 - Nanduk Ngget Tul Pidnak Wene

Yewura Nagawan Yosia-nen kwaridnak wene 22:1-2

¹ Nde, Yosia iri-ge ndesa mburuk olengen delapan pem-e Yewura nagawan men yij-o. Menlug-e, Yerusalem iri me nagawan woralat olengen tiga pulu satu (31) woragij-o. Nde, Yosia ija unu-ge Yerira-o. O Mboskat nap Andaya iri na ara-o.

² Nde, Yosia-nen-e Mbal Pem Nagawan alen tak purak mende nak kwarij-o. Nde, at-nen-e ombo Ndaut-nen kwaroso nggal nak kwarosolat, at-nen-e Mbal Pem Nagawan-nen ”Iri nggal kwarurag-o” yidnak oboksa ndak ndak nak kwarosolat woragij-o.

Nagawan Indo-nen imiri mbarak pidnak engga mbarak kaiga wene 22:3-20

^3-4 Nde, Yosia iri-ge at-nen idnak engga mbaroso nab-e Mesulam ambara Asalya iri na ambara unu-ge Sapan irit woragij-o. Yosia-nen o tena woralat olengen delapan belas pem-e Nagawan Yosia-nen-e wene yu at-nen idnak engga mbaroso nap iri na ebem pij-o: ”Kar-e Nagawan Indo ama tepan ombo kek tak Ilkia iri na eram mbiri-o. Mburugundig-e, Nagawan Indo uwi tumende bem-nen yabu wanugwi tepan ombo ereba-nen tol ndok wurugwi yeba na-ge inik nggal ndok wiriga-o luk wonarak yak kuruwak-nen mbiri-o.

⁵ Kin wanurug-e, tol iri-ge Nagawan Indo uwi iri konugwi nap enanggul pem ereba na wok unduwama, it-nen-e Nagawan Indo uwi konili nap onggo wok ondogolar-e,

⁶ e ngarugwi nap min o wurugwi nap min kerep konugwi nap min wok ondogolat, ereb-e Nagawan Indo uwi iri na konurak pem e min kerep min onggo pogolat mag-o.

⁷ Nde, it Nagawan Indo uwi wurugwi nap enanggul pem ereba-ge mondok mot mor-et kwarugwi nap me, tol it ininggem pidnak ereba na-ge lumbunurag-e lag-o” luk ebem pij-o.

⁸ Ebem posoloma, Sapan-nen-e nagawan-nen at ebem pid wene iri na-ge tepan ombo Ilkia yak tij-o. Iri yosola, tepan ombo Ilkia-nen Sapan yak tosolar-e: ”An-e Nagawan Indo ama-nen Mbal Pem Nagawan-nen idnak imiri mbarak pidnak wene engga mbarak misik kagirig-o” luk yij-o. Yosolug-e, engga iri na-ge Ilkia-nen-e Sapan wok tij-o. Wok tamu, Sapan-nen-e engga iri na-ge wonarij-o.

⁹ Karuk, Sapan iri na nagawan eram wene waruk mberarik-nen yak tosolar-e: ”Tol Nagawan Indo uwi ndok witli ereba na-ge kat ndegel kubugwi nap-nen-e waga Nagawan Indo uwi iri konugwi nap enanggul pem ereba na ininggem piga-o” luk yak tij-o.

¹⁰ Yak turug-e, Sapan-nen yosolar-e: ”Ilkia-nen-e engga yu wok neramu-o” yosoluk, Sapan-nen-e engga iri na-ge Isikia kuluwakluk wonarij-o.

¹¹ Wonarosola, nagawan-nen kulurug-e, indi puru yosolar-e usum-e ndela bela keya bij-o.

¹² Iri rak purug-e, Nagawan Isikia-nen-e tepan ombo Ilkia min Sapan ambara Aikam min Mika ambara Akmbot min at-nen idnak engga mbaroso nap Sapan min nagawan yongga woroso nap Asaya min yak ondosolar-e:

¹³ ”An min Yewura nap oboksa min nenmanggim engga yu arem mbarak worasu yeba wene-ge ngge kwarag-o luk Nagawan Indo kin wok ibil mberer-o. Nde, nonmborak-nen-e engga yu arem ’Iri nggal kwarurag-o’ luk yidnak wene mbarak worasu yeba-ge ndak ndag-e kwarigit lak yidnak me, Nagawan Indo isilepma-ge nit nenpem pusu-o” luk yij-o.

¹⁴ Yak ondosoloma-ge, Ilkia min Aikam min Akmbot min Sapan min Asalya min ereya na-ge tu mirik unpuwakluk kwe Ulnda eram mbiriga-o. Nde, Ulnda iri-ge Mbal Pem Nagawan ene lomboksa yoso kwe-o. At iri-ge o Yerusalem iri me o ngget pilidnak sa ereba me woragij-o. At un Salum iri-ge Arakas ambara Tikwa iri na ambara-o. Nde, Salum iri-ge Nagawan Indo ama yabu wanogolat-nen yurugwi sum ereba-ge at inggem woraso nab-o. Nde, kwe Ulnda iri na-nen it-nen yidnak wene ereba na kulurug-e,

¹⁵ Ulnda-nen-e Nagawan Indo-nen yidnak wene yu Nagawan Isikia yak til mburuwakluk tuguruk wirik inpij-o.

¹⁶ Nagawan Indo-nen yosolar-e: ”Nagawan-nen engga yanem wonarid iri ndak ndag-et an-nen-e Yerusalem min Yerusalem woragwi nap oboksa min-e mondok angin worak mende enpem pimin-o.

¹⁷ Iri kwarimin iri-ge ir-e an keya nuburuk, nin kugwiwak ereba na nde amanggim wam wosa pogolar-e, it-nen kwatli ereba oboksa-ge an nisilepma rak nak pili-o. Nde, nisilepma-ge Yerusalem ebem-et pigirik me, nisilepma pigi yu-ge mondok teyok ma bug-o.

¹⁸ Alat nde, Nagawan Isikia amanggim-e an Isarael nap Enmbal Pem Nagawan-nen-e yu nggal yak tusu-o: ’Engga iri arem mbarak worasu wene ereba kulurug-e,

¹⁹ kar-e niri nera iri nggal kwarigi-o luk an neram tebe yigen-o. An-nen-e Yerusalem min Yerusalem woragwi nap min mondok angin worak mende enpem pimin-o. O siri iri-ge an-nen-e unmunggum lera mburak mende rak pumu, ap-nen yik kagolar-e, unmunggum lera mbuwa-o. O Yerusalem unu-ge imbiri lamut mende rak pimin-o. Alat nde, kat-nen iri kwat inpimin wene iri na kulurug-e, kindi kalok yosolat, kusum lebena keya bosolat, yip tosolat yigen-o. Iri yosolat, kat-nen tepan yigen iri-ge an-e kuligi-o.

²⁰ Iri bem-e an-nen-e Yerusalem ebem angin worak mende mberak purak yigi iri na-ge kat worala tarem-e mberak pimin pug-o. Kar-e konag-et woraruk, wat yugun-o’ ” yak tij-o. Iri yak tid wene ereba na-ge Yosia-nen wirik inpid nap ereba na-nen-e at yak til lobok yiga-o.