2 NAGAWAN NAGAWAN-NEN KWARIDNAK WENE 18 - Nanduk Ngget Tul Pidnak Wene

Isarael nap unuwi siri Samaria iri na wim nap ininggem yid wene 18:9-12

⁹ Nde, Isarael nap nagawan Osea na-ge Isarael nap tena unpuruk woralat olengen tuju rak posoma-ge, Yewura nap ennggendumu Isikia iri na nagawan menluk o tena woralar-e, olengen empat worasola tarem-e Asiut nap Nagawan Salmaneset iri na-nen-e Isarael nap inmin wim mbarosolat, o Samaria iri na-ge leget wanuruk woragij-o.

¹⁰ Nde, leget wa unpuruk woragolar-e, olengen kenan worarug-e, Samaria siri iri na-ge wim nap ininggi bem mbij-o. Nde, iri kwat yid iri-ge Isikia na-nen Yewura nap tena unpuruk woralar-e, olengen enam pem tak posola tarem-nen kwat yij-o. Nde, Osea-nen Samaria iri me Isarael nap tena unpuruk woralar-e, olengen sembilan pem tak posoma-nen kwat yij-o.

¹¹ Abok nggwe-ge Asiut nagawan iri na-nen Isarael nab-e kam unpuruk mberarik, ereb-e o siri Ala onposolat, nde, ereb-e Yi Abot koroga Nggosan nggweyak pem ereba onposolat, nde, ereb-e o Marai iri me o siri lombok ereba me inpil lobok yij-o.

¹² O Samaria wim nap ininggem yid iri-ge Isarael nap-nen Nagawan Indo Enmbal Pem Nagawan iri na-nen yidnak yidnak kwarigit lak pem-nen-o. Nde, it-nen-e Nagawan Indo-nen urul yak ondosola, ”Kwarul-o” luk it-nen urul Nagawan Indo imin yidnak ereba na lugud tak pogolat, at ndegel oboso nap Musa-nen enpem pidnak imiri mbarak pidnak wene ereba na lugud tak pogolat, ereba na kuligit lak yogolat, yidnak yidnak kwarigit lak yogolat kwaridnak pem-nen ndowaga iri kwat inpiga-o.

Asiut nap-nen o Yerusalem enpem mbud yidnak wene 18:13-37

¹³ Yewura Nagawan Isikia iri na Yewura iri me nagawan woralat olengen empat belas pem-e o Yewura nggweyak pem o siri kerep pak leget worak ereba na-ge Asiut Nagawan Sanegirip-nen urugwe nggwe rak inpij-o.

¹⁴ Iri ala karuk, Nagawan Isikia-nen Nagawan Sanegirip o Lais worasu iri na eram engga mbara pil mborosolar-e: ”Nab-o. An-e meya-t kwarukmu-o. Nde, kat-nen nit ninmin wim mbarusu iri-ge larok min-o. Nde, nap kat-nen an-nen kwarurak nebem pugun ereba-ge oboksa-t pimin-o” yosola karuk, Sanegirip-nen yosolar-e: ”Iri ala, kat-nen-e perak angin-e sepulu ribu (10.000) kilo min emas angin-e seribu (1.000) kilo min mondok namanggim pil lobok yurag-o” luk yak tij-o.

¹⁵ Yosoloma-ge, Isikia-nen-e Mbal Pem Nagawan woraso perak ereba na min at-nen tenagidnak wi amanggim at woraso sa ndok worak worasu perak ereba na min Isikia-nen-e Sanegirip eram pil mbirij-o.

¹⁶ Emas Nagawan Indo uwi tumende bem min Isikia-nen tumende ambanggo nggwe min mbeyok tak pidnak emas ereba na-ge oboksa panggara Sanegirip eram pil mbirij-o.

¹⁷ Alat nde, Asiut nagawan iri na-nen-e it Yerusalem enpem kore yuwakluk o Lais-nen ap san ombo kere nggok misik inpil lobok yij-o. Nde, san ombo kere misik lobok yiga ereya-ge ap san wari nggok kenan nak-nen lit unpuruk lobok yiga-o. Nde, ereya-ge misig-e san ombo onowe, nde, misig-e nagawan amanggim yi konugwi nap onowe, nde, misig-e nagawan yik karok woragwi san ombo enanggul pem onowe-o. It ereya-nen lit unpuruk lobok yiga-o. Nde, it iri na o silmu wok yil lobok yogolar-e, yapmu yi mbun misik abam nggwe emnde mbaridnak sa yi mburuwakluk yi pud waruk mbiridnak sa eralu yabu misik unu-ge Sum Maroso Nap Yabu iri na me ondoro waniga-o.

¹⁸ Iri me woragolar-e, Nagawan Isikia wene mbo ibiga-o. Wene mbo obogola-ge, Nagawan Isikia eyabu ombo kenan it inmin lambuk yurak o ma-nen lobok yiga-o. Nde, ap kenan ereya-ge nagawan woraso sa iri me-nen ene kulugwi nap Ilkia ambara Elyakim min Isikia-nen idnak engga mbaroso nap Sepna min nagawan woraso sa iri me-nen kwarugwi wene engga mbaroso nap Asap ambara Yoa min endam wok yogola,

¹⁹ Asiut nap san ombo misik-nen it yak ondosolar-e: ”Asiut nagawan-nen yidnak wene yu-ge Isikia yak ter-o: ’Noluk-nen kat-nen-e an-e namawi-o luk yusu-o?

²⁰ Kat kindi-nen perasolar-e san ombo enmawi min inndi nggat nggat pugwi min ondolma-ge we enne nak-nen yurak iri-ge ndak perasu-a? Kat kindi-ge ta ebem wat tak puruk kwiye lag-et Asiut imin wim purak yusu-o?

²¹ Kat kindi-nen-e Mesira-nen yongga nuruwa-o luk wat tak worasu-t nde, at iri-ge pinde nde wangun tak puruk pem kalok yosolar-e, ininggi kundugu poso iri nggal-nen yusu-o. Ap oboksa-nen ta-nen nde Mesira nagawan iri na ebem nde indi wat tak puruk wolma ala-ge, yanem iri nggal kwat unpuwa-o yij-o’ luk yak ter-o” luk yak indij-o.

²² Yosoluk, Asiut nap san wari iri na-net wene erep min yosolar-e: ”Are, kit-nen yogolar-e: ’Nir-e Nagawan Indo Nenmbal Pem nagawan ebem-et ninndi wat tak puruk wulmul-o’ yugup, lak? Nde, Isikia-nen Yewura nap min Yerusalem nap min yak ondosolar-e: ’Nagawan Indo amanggim kan pugwi sa Yerusalem iri me nak-nen Nagawan Indo erembel wanurag-o’ yosoluk, Nagawan Indo amanggim kan pugwi sa min kan pugwi ondoro min Isikia-net lak tak pid iri na-ge lag-a?

²³ Nde, yawo-ge Asiut nagawan iri na unu bem kwiye lag-et nenmawi wal kujwog-o. Iri kwarogolar-e, kit-nen kura wam ereya oboksa bem ndak kore yugup, lak? kenabut mbareyeklug-e, an-nen kura wam dua ribu (2.000) wok kindimin-o!

²⁴ Kat kindi-nen-e wim koma bem min kura ombol pem min lobok yogolat, Mesira nap-nen yongga nuruwa-o luk kindi-ge enpem wat tak puruk worasu-t nde, nit Asiut nagawan iri-nen idnak san ombo mondok teberak min inmin-et wim mbarugun-et nde, mondok langgara wirik unpurag-e meya-o.

²⁵ Kat kindi-nen-e Nagawan Indo indi-nen-e peragit lak ma, Asiut nagawan indi nak-nen nenpem kore yosolat, urugwe nggwe rak nonposolat yij-o luk perasu-a? Nagawan Indo iri na-net: ’Mondok ondosolat, mondok lak tak inpi-o’ yamu-nen kwarigi-o” luk yij-o.

²⁶ Yosoloma, Elyakim min Sepna min Yoa min-nen san ombo onowe iri na yak togolar-e: ”Nab-o. Wene-ge Aram wene bem yak nindi-o. Nir-e kulul-er-o. Ap kerep leget pem worali yeba kuluwa-o luk, Iberani wene bem yusu-ge meyog-o” luk yak tiga-o.

²⁷ Yogoloma, san ombo onowe iri na-nen yosolar-e: ”Wene yeba oboksa-ge kit min kit-nen idnak nagawan min kit nak yak kunduwakluk Asiut nagawan iri-nen-e nibil lobok yamu perali-a? Lag-o. An-e we nap kerep pak leget pem koreyak worali ereba min-et kulurak yusu-o. Abok woragolar-e, it inmin-et kenal min kenmeye min nonggolat woragub-o” luk yij-o.

²⁸ Iri luk san ombo onowe iri na menluk-nen Iberani wene bem ene nggoksa yosolar-e: ”Asiut nagawan-nen yid wene yu kwara koler-o!

²⁹ Isikia iri-nen-e an ninggem-nen kinmiri yuwa-ge lak me, at ene-ge kulurak pug-o.

³⁰ ’Nagawan Indo ebem kinndi wat tak puruk wolmomtag-o’ luk kenarem woragosola-ge, mondok kulurak pug-o. Kinndi-nen yebet kagolar-e: ’Nagawan Indo-nen ninmiri yosolat, Asiut nap san ombo-nen o siri yu wanuwa naru ininggi sogan worosola wanuwa bug-o’ luk mondok yebet kudtak pug-o.

³¹ Isikia ene-ge mondok kulurak pug-o. Asiut nagawan iri-nen yak kondosolar-e: ’Kir-e kunuwi siri keya buruk, tebeluk an neram lobok yer-o. Iri luk konag-et woragolar-e, kondomok yagidnak kenengen nonggolat, kondomok kinid mbun emnde mbaridnak sa-net kenangga nonggolat, yamuksa kwat tenak worakmu,

³² an lobok yosolar-e, o kit kunuwi yu nggal ma-t kinpil mburumu, ereba woragolar-e, anggut yabu wanugupndik, anggut engen kwarat mbarogolat, nggandum mbato yabu wanugupndik, kit norak nggandum mbato kwarat yigisa pogolat kwat tenak woragub-o. Nde, o iri me-ge e saitun elem min saitun engen amburu min tamuk amburu min-e mondok kwarar-o. Kit-nen nde an-nen yak kundusu yeba nde kwarugup ala-ge, wat yigit lak, kunluk woragub-o. Kir-e Isikia-nen ene nak-nen kenmberam lasolat, Nagawan Indo-nen ninmiri yuwa-o yusu iri ene-ge mondok kulurak pug-o.

³³ O mbi Asiut nagawan an-nen ninggiyapma rak onposola-ge, it unkugwiwak-nen an ninggem-nen inmiri yidnak mbi kir-e kulugwi, lak?

³⁴ Nde, o Amat min Arapat min unkugwiwak ereba na-ge yawo-ge ngge me worasu-o? O Separawaim min Ena min Iwa min unkugwiwak ereba na-ge ngge me worasu-o? Samaria nap unkugwiwak ereba-ge ngge me worasu-o? It unkugwiwak-nen-e Samaria nab-e inmiri yid, lak?

³⁵ O-ge ngge unkugwiwak-nen lobok yarik, an ninggem-nen inmiri yij-o? Nagawan Indo-nen Yerusalem woragwi nap inmiri yuwa-o luk perali-a?’ yak kundusu-o” luk yij-o.

³⁶ Yosoloma-ge, Isikia-nen Yerusalem woragwi nap yak ondosolar-e: ”Enne onggo yurak pug-o” yidnak pem onggo yigit lak, enne nak lak woraiga-o.

³⁷ Nde, Elyakim min Sepna min Yoa min it ereya na-ge inndi abi kalok yogolat, unsum ndela bela keya biga-o. Iri luk, mborogolar-e, Asiut nap san ombo onowe-nen yidnak wene ereba na-ge Nagawan Isikia yak til mbiriga-o.