1 YOANES 5 - Nanduk Ngget Tul Pidnak Wene

Nit-nen nggweyak ma yu pinik tak purak wene 5:1-5

¹ Ta-nen nde Yesus-e Kerisut-nen yusu-o luk ebem inndi angin tubu yili nab-e Mbal Pem Nagawan ilirak-nen yili-o. Nde, Eid abuwa kasu nab-e at ambara iri na-t abuwa kasu-o.

² Nir-e Mbal Pem Nagawan abuwa kagolat, at-nen yidnak yidnak kwarogolar-e, nir-e Mbal Pem Nagawan ilirak enabuwa kali-o luk nenaru yili-o.

³ Mbal Pem Nagawan abuwa kagolar-e, at-nen yidnak yidnak nak kwarurag-o. Nde, at-nen: ”Iri kwarer-o” yak nindidnak wene iri-ge nit nenmanggim-e angin worag-e lag-o.

⁴ Nde, Mbal Pem Nagawan ilirak-nen-e nggweyak ma yu pinik tak purag-e ndak-nen yusu-o. Nde, nit ninndi angin tubu yidnak pem-net nggweyak ma yu pinik tak pul-o.

⁵ Tarak-nen nggweyak ma yu pinik tak puwa-o? Yesus-e Mbal Pem Nagawan Ambara-o luk inndi at ebem angin tubu yuwa nap-net nggweyak ma yu pinik tak puwa-o.

Yesus Kerisut owene kinggiridnak wene 5:6-12

⁶ Yesus Kerisut lobok yid iri-ge at yi ma purak yi min at wat momtak eyabi min imin lobok yij-o. Yi nak waruk lobok yigit lag-o. Are, yi min eyabi min-et waruk lobok yij-o. Konak Indi iri-ge lud tak nak yoso me, at-nen-e ”Wene yu-ge ndemerer-o” luk kunggurusu-o.

⁷ Iri bem-e wene yu-ge kenan yu-nen kunggurusu-o.

⁸ Konak Indi min yi min eyabi min it kenan yu-nen-e wene misiget erep nak kinggitli-o.

⁹ Nggweyak ma nap-nen kinggitli wene wanili-t nde, Mbal Pem Nagawan-nen kinggiridnak wene-ge terak minik nggulok-nen yusu-o. Nde, Mbal Pem Nagawan-nen Ambara owene kenggel nindidnak wene-ge yu-o.

¹⁰ Iri bem-e, ta-nen nde Mbal Pem Nagawan Ambara ebem indi angin tubu yuwa nab-e kinggiridnak wene na-ge at arem worasu-o. Nde,ta-nen nde Mbal Pem Nagawan-nen kinggiridnak na wanigit lak me, Mbal Pem Nagawan-e enesiget yoso nap tak pusu-o.

¹¹ Kinggiridnak wene-ge yu-o. Mbal Pem Nagawan-nen-e nunlug-et woralik nalik momtak elem wok nindij-o. Nde, at Ambara iri-ge unlug-et woralik nalik momtak iri elem-nen yusu-o.

¹² Ta-nen nde Ambara wok ibidnak nab-e unlug-et wolmomtak elem winde worasu-o. Nde, ta-nen nde Ambara wok ibigit lak nab-e unlug-et wolmomtak elem wanigit lak worasu-o.

Unlug-et woralik nalik momtak wene 5:13-21

¹³ Mbal Pem Nagawan Ambara unu bem kinndi angin tubu yigep napnen-e nir-e nunlug-et woralik nalik momtak elem irit winde yige-o luk kenaru yobokluk-nen engga yu mbal kundusu-o.

¹⁴ Nit-nen nde at indi-n pidnak ndak ndag-et at ebem yi mende ndi mende nggi yak togola-ge, nenne koloso me, nir-e kwiye lag-et Mbal Pem Nagawan eram mbitli-o.

¹⁵ Nde, nit-nen nggi yidnak mende nenne koloso nenaru ala-ge, nit-nen at ebem nggi yidnak mende na wog-et nunduwa-o luk nenaru yili-o.

¹⁶ Ap mbi-nen at anggam aid wene wanidnak nap an-nen at lak tak uburak puk mende meya misik kwarosola-ge, Mbal Pem Nagawan-nen-e ap na urug-et wolmomtak elem wok tuwakluk anggam na amanggim tepan yuwag-o. Yu nggal kwarurak iri-ge it lak tak unpurak puk mende meya mbi kwarogola nak-nen kwarurag-o. Alat nde, it lak tak unpurak mende meya mbi kwarosoma-nen enmanggim tepan yurak yak kundusu-ge lag-o.

¹⁷ Mborok tak kwarugwi mende pidsa-ge meya elem-nen yusu-t nde, lak tak unpurak puk mende meya erep na worasur-o.

¹⁸ Mbal Pem Nagawan ilirag-e Mbal Pem Nagawan Ambara-nen nggitlik unpuruk woraso me, meya kwat tenak worali bug-o luk nenaru-o. Nde, Meya Kwaroso Nap-nen na yi lik ndi lik kwat unpuwa bug-o.

¹⁹ O nggweyak yu pidsa-ge Meya Kwaroso Nap inggem worasu-t nde, nir-e Mbal Pem Nagawan ilirak-net yili-o luk nenaru worali-o.

²⁰ Nir-e ndemeret Mbal Pem Nagawan na nenaru maklug-e, Mbal Pem Nagawan Ambara na lobok yarik, nit ninndi pindong tak pij-o luk nenaru yili-o. At Ambara Yesus Kerisut ebem-nen nir-e ndemeret Mbal Pem Nagawan na imin kundik worali-o. Nde, at yu-ge ndemeret Mbal Pem Nagawan urug-et woralik nalik yoso-nen yusu-o.

²¹ Nilirak wa-e. Kir-e kugiwak kwarugwi na kwarugup naru, mondok kwil kwalsa wolmer-o.