1 SEMUEL 9 - Nanduk Ngget Tul Pidnak Wene

Saul-nen Semuel imin lambuk yidnak wene 9:1-26a

¹ Enlem Mbenyamin nap arengge kwarat me, unu worak unu-ge Kis irit woragij-o. Nde, Kis iri eij-e Abiel, nde, ombo-ge Serot. Nde, Serot iri-ge Apia ambara Mbekorat ambara-o.

² Nde, Kis iri ambara unu-ge Saul irit woragii-o. Nde, Saul na-ge ap sujwe abage na konak, ebe na tenaga men yidnak irit woragij-o. Nde, Isarael nap oboksa ennggendumu-nen enpage min enpe min konak at nggal mbi woragit lag-o. Nde, Saul iri-ge ebe na mondok mot irit me, Isarael nap oboksa enanggul-e endakmbe kuri nag-o.

³ Nde, misik tarem-e Kis egelerai wam ereb-e lak yij-o. Lak yamu ala karuk, Kis-nen Saul yak tosolar-e: ”Kar-e ndegel koboso nap misik kimin tak puruk, kelerai wam lak yid ereba kore yil mberer-o” yak tij-o.

⁴ Yak tosoloma, Saul na-ge ndegel oboso nap iri na imin-e ndobo worak Eperaim nggwe min Salisa nggweyak nggwe min kibiril niga-t nde, kelerai wam lak yid ereba na-ge mondok mbi kagit lag-o. Iri ala karuk, nok mbirigarik, o Salim nggwe mbirigarik kore yiga-t nde, mondok kagit lag-er-o. Iri ala karuk, Mbenyamin nap onnggweyak nggwe kore yiga-t nde, iri na kagit lag-er-o.

⁵ Iri me-n mbirigarik, o Sup nggweyak pem wok yogolar-e, Saul-nen ndegel oboso nap iri yak tosolar-e: ”Nab-o. An neij-e kelerai lak yidnak ereba na bem umud ereba keya buruk, nit lak ala umud kundugu wolma naru ma mburuwog-o” yak tij-o.

⁶ Yak tosoloma-ge, ndegel oboso nap iri na-nen onggo yosolar-e: ”Pug-o, nab-o. O siri yu me-ge Mbal Pem Nagawan ndegel oboso nap misik worasu-o. Nde, at-nen iri nggal kwat ma-o yidnag-e mondok iri na-t kwat yoso me, at iri-ge kek tak ubugwi-o. Iri ala-ge, at eram nde mburuwog-o. Kelerai lak yid ereba na worasu wene-ge at-nen yak nunduwa nde ma-o” luk Saul yak tij-o.

⁷ Yosoloma, Saul-nen yosolar-e: ”Nit nde ap iri eram mburulndig-e, nir-e no wok tul-o? Tundumu norak nunggwi mende wanige-ge abu lak yosolat, nenarengge mende nendam-e abu lak me, nir-e ap iri-ge no wok tul-o?” luk yij-o.

⁸ Yosoloma, ndegel oboso nap iri na-nen yosolar-e; ”An neram-e perak tol marik misik worasu-o. Kelerai wam lak yid ereba wene mirik nunpuwakluk tol iri-ge Mbal Pem Nagawan ndegel oboso nap iri wok timin-o” luk yij-o.

^9-11 Yosoloma, Saul-nen yosolar-e; ”Iri ala-ge ob-o. Eram mburuwog-o” yurug-e, Mbal Pem Nagawan ndegel oboso nap iri na woraso sa o silmu mbiriga-o. Mbirigarik, o siri iri na me lagwi ndobo iri na nggwe lakmu-ge, kweyap ndugum siyak yi kenanggil lobok yukmu, lid pid yiga-o. Lid pid lug-e, it-nen kweyap ndugum yeba na kin wok onpogolar-e: ”Ap yari na-ge o siri yu me worasu, lak?” luk kin waniga-o. (Nde, ereya tarem-e Mbal Pem Nagawan ene lomboksa yugwi nap unnu-ge ap yari-o yugwi-o. Nde, ap-nen wene nde Mbal Pem Nagawan kin wanurak yogolar-e, it-nen-e yu nggal yugwi-o: ”Ap yari eram mburuwog-o” yugwi-o.)

^12-13 Nde, kweyap ndugum ereba-nen onggo yogolar-e: ”Worasu-o. Ar-e yanem-et nanduk mburusu-o. Kit nde ndag-et mborogolat-nen-e tenakub-o. Nde, ndobo bem Mbal Pem Nagawan amanggim kan pugwi sa ondoro iri bem o siri yu me woragwi nap-nen-e Mbal Pem Nagawan amanggim eyabi worak kan purak me, ar-e o silmu yu me wok yusu-o. Nde, at-nen-e Mbal Pem Nagawan amanggim kan purak ereba imbiringgat tak pigit lak ma-ge, yonggo inpidnak nap ereba-ge nunggwi mende-ge nujwa bug-o. Kit nde yanem-et mburugupndig-e, ar-e norak pem ndobo bem lagit lak ma imin lambuk yugub-o” luk yak indiga-o.

¹⁴ Yak ondogolikma, Saul min ndegel oboso nap iri na embereg-e o silmu nggwe mbirigarik, o pak tumende nggwe nggukmu-ge, Semuel iri na-ge Mbal Pem Nagawan amanggim kan purak ndobo bem mbururak puruk wagidnggal, lid pid mbiga-o.

¹⁵ Nde, kup Saul lobok yekluk yosola-ge, Nagawan Indo-nen Semuel yak tosolar-e, yu nggal yak tij-o:

¹⁶ ”Kub-e yanem nggal kuplila an-nen elem Mbenyamin nap misik kat keram pil lobok yimin-o. Iri yosola-ge, amburu anggul pem kilik posolar-e, Isarael nap ennggendumu nagawan tak ibi-o. Iri rak ubugunmu-ge, at-nen-e an nilirag-e Pilisin nap ininggiyapma-nen inmiri yuwa-o. Nde, an-e an nilirak-nen yane worogolat, ’Yongga nindi-o’ luk yip togolat yili ereba-ge eneyasolat, kolosolat kwarusu-o” yak tij-o.

¹⁷ Yak tarik worasoma, Semuel-nen Saul na kasoma ereya na-net Nagawan Indo-nen Semuel yak tosolar-e: ”Ap an-nen obok kat yak kirigi iri na-ge irir-o. At iri-nen an nilirag-e tena unpuruk wolma-o” yak tij-o.

¹⁸ Iri na yak tosola-ge, Saul na-ge o pak tumende iri na eralu Semuel eram panggo yij-o. Iri yosolat-nen kin wok obosolar-e: ”Ap yari iri na uwi-ge ngge me-o, nab-o?” luk yak tij-o.

¹⁹ Yak tosoloma, Semuel-nen yak tosolar-e: ”Ap yari na-ge an-er-o. Nde, yawo-ge kir-e totno nunggwi mende nok-nen nabuwok Mbal Pem Nagawan amanggim wam wosa purak sa ndobo bem eid me mberer-o. Kup kuplila-nen kit-nen kin wanigep wene ereba oboksa-ge onggo yak kundumu-nen mbururag-o.

²⁰ Nde, kit kenkelerai pul yamu kenan tarem woraigep ereba-ge kunmud kudtak pug-o. Abu kaigarik worali-o. Nde, Isarael nap oboksa ennggendumu-nen ukwe nggok peragwi iri-ge ta-nen wanusu-o? Iri na-ge kat min kat keid ama woragwi nap min kenpem-et worasu iri-ge lag-a?” luk yak tij-o.

²¹ Yak tosoloma, Saul-nen onggo yosolar-e; ”An nelem-e Mbenyamin nab-o. Nde, an nelem Mbenyamin iri-ge Isarael nap ennggendumu marik komosa-nen yusu-o. Nit nelem arem-e an nereb-e mondok ebe lak mende-nen yili-o. Noluk-nen kar-e iri nggal an yak nurusu-o?” luk yak tij-o.

²² Iri lug-e, Semuel-nen Saul na-ge ndegel oboso nap iri na enmberek inmin luk o kuri worak siyak nggok nggal iri na me nggwiga-o. Nggurug-e, it mberen ya na ondoro wok ondosolar-e, yonggo inpidnak nap enpe tiga pulu (30) nggal ereba na unlugwe ambigit nggwe ap kektak-nen kore yugwi sa ereba bem-et kore yuwakluk, ondoro wok indij-o.

²³ Iri rak unpuruk, Semuel-nen sagoso nap iri na yak tosolar-e: ”Uno yanem an-nen ndok worak pi-o luk wok kirigi iri na-ge yu me pil lobok yi-o” yak tamu-ge,

²⁴ sagoso nap iri na-nen-e awe uno konak lena pidnak ereba na-ge Saul eram pil lobok yij-o. Iri yosola, Semuel-nen Saul yak tosolar-e: ”Uno yu-ge ap erep yonggo inpigi yeba inmin nonggolat kat norak kamanggim pigi-net yusu-o. Ndak min-o” yak tosoloma-ge, Saul na-ge uno ereba na ninggij-o. Nde, iri tarem-nen Saul na-ge nunggwi mende-ge Semuel imin misikmu ningga-o.

²⁵ Nurug-e, Nagawan Indo erembel wanidnak sa iri na me-nen o silmu mbigarig-e, Saul na nene yurak ondoro-ge teram o ngguwa bem wok tamu

^26a at iri me nene yij-o.

Semuel-nen Saul na nagawan makluk anggul pem amburu kilik pidnak wene 9:26b–10:16

^26b Nene luk, o kil posola-ge, Saul na-ge o ngguwa bem teram nene yosoma, Semuel-nen wene mbo bosolat-nen yak tosolar-e; ”Nab-o. Men min-o. Kat mborosola ndemera kibil mbirimin-o” yosoloma-ge, Saul na-ge men lug-e Semuel enmberek mbiriga-o.

²⁷ Mbirigarik o siri lak kuri maksa wok yogolar-e, Semuel-nen Saul yak tosolar-e: ”Kat ndegel koboso nap iri-ge ’Nanduk log-o’ luk yak ti-o” yak tosoloma-ge, at ndegel oboso nap iri na-ge nanduk mborosola, Semuel-nen Saul yak tosolar-e: ”Marig-et nak ndong yuwog-o. An-e Mbal Pem Nagawan-nen kamanggim yidnak wene mbi yak kirimin-o” luk yak tij-o.