1 SEMUEL 5 - Nanduk Ngget Tul Pidnak Wene

Urul pidnak wene labu mbarak Pilisin nap ennggendumu woragid wene 5:1-12

¹ Nde, Pilisin nap-nen Mbal Pem Nagawan-nen idnak urul pidnak wene labu mbarak iri na mengga waruk mbirigarig-e, Eben-Kaeset-nen waruk mbirigarik, it unuwi silmu Asndot waruk mbiriga-o.

² Iri na me urul pidnak wene labu mbarak iri na waruk mbirigarig-e, it unkugwiwak Ndagon iri na uwi iri na me waruk nggwigarik, it unkugwiwak ndak worak iri na eralu piga-o.

³ Puruk kub-e Asndot woragwi nab-e kuplila unkugwiwak uwi iri na me lobok yiganggal-e, it unkugwiwak Ndagon iri na-ge Nagawan Indo-nen idnak urul pidnak wene labu mbarak iri na eralu erare nggwe langgurak worasoma karug-e, tuguruk leksa ondolma piga-o.

⁴ Alat nde, kup-nen kuplila yik kaiganggal-e, it unkugwiwak ndak worak iri na-ge tugurug-et urul pidnak wene labu mbarak iri na eralu tudtak-nen anggulwak min inggi min-e tenggesa tumende eralu worala, abare worak iri nak ebis worasoma kaiga-o.

⁵ (Iri kwaridnak ala karuk, kugwi Ndagon iri na erembel wanugwi ombo min Asndot iri me woragwi Ndagon erembel wanugwi min oboksa-nen yawo-nen na kugwiwak iri na erembel wanurak uwi iri na me nggogolar-e, wirim pem-e unuwok pigit lak we abandok nak nggugwi-o.)

⁶ Iri luk imbirig-e, Nagawan Indo-nen o Asndot iri me woragwi nap min inggi inggi woragwi nap min mondok angin worak mende enpem posolar-e, marigot irit enpem pij-o.

⁷ It-nen enpem mbusu mende iri na karuk, it-nen yogolar-e: ”Yu-ge Isarael nap Enmbal Pem Nagawan-nen nenpe min nunkugwiwak Ndagon min angin worak nenpem pusu-o. Iri ala, nit-nen urul pidnak wene labu mbarak yu pemsa parugu wolmomtag-e meya-o” luk yiga-o.

⁸ Iri lug-e, ndok worogola kin wanuwoklug-e Pilisin nap nagawan lima ereya na yonggo inpiga-o. Ndok worogola-ge, it-nen kin wok onpogolar-e: ”Isarael nap Enmbal Pem Nagawan-nen idnak urul pidnak wene labu mbarak yu-ge ngge rak pul-o?” luk yak ondogola, it nen onggo yogolar-e: ”Urul pidnak wene labu mbarak iri na-ge o siri Nggat pil mbururag-o” yikma, o Pilisin iri me o siri Nggat iri na me pil mbiriga-o.

⁹ Urul pidnak wene labu mbarak iri na-ge iri me pil mbiriga-t nde, Nagawan Indo-nen o siri iri na enpem-et mondok angin worak mende posola-ge, yane worogolat sa nggwa mbiga-o. Nde, o iri me woragwi sujwe-nen na irit indi worak-nen na irit marigot iri na it oboksa enpem mbud yil lobok yij-o.

¹⁰ Iri ala karuk, urul pidnak wene labu mbarak iri na-ge iri me-nen waga o Pilisin iri me-net nde, o Ekoron pil mbiriga-o. Waruk o iri na me wok yukmu-ge, o iri me woragwi nap-nen enne nggoksa yogolar-e: ”Nit oboksa nunduwakluk Isarael nap Enmbal Pem Nagawan-nen idnak urul pidnak wene labu mbarak iri-ge waruk lobok yili-a?” luk yiga-o.

¹¹ Iri lug-e, Pilisin nap nagawan oboksa ndok wuruwakluk yonggo inpiga-o. Yonggo unpuruk, ndok worogolat, yak ondogolar-e: ”Nit min nit nonkwela inmin nunduwa naru, Isarael nap Enmbal Pem Nagawan-nen idnak urul pidnak wene labu mbarak iri-ge tuguruk nanduk woraso sa ondolma pil mbururag-o” luk yiga-o. Nde, Mbal Pem Nagawan-nen mondok angin worak mende o siri iri me woragwi nap enpem mberak posola, sa nggwa mbiga-o.

¹² Nde, ap ereb-e wat yogolat, nde, erep ereba na-ge marigot iri na enpem yosola-ge, o siri iri me woragwi nap-nen-e enne nggoksa it unkugwiwak ereba na-nen yongga unduwakluk emengen mbariga-o.