1 SEMUEL 31 - Nanduk Ngget Tul Pidnak Wene

Saul ambararak inmin wat yidnak wene 31:1-13

¹ Nde, Pilisin nab-e Ndobo Nggilmboa iri bem-nen Isareal nap enpem kore yiga-o. Iri kwarogolar-e, iri me-nen Isarael nab-e kwarat ondogola, Saul ambararak min ap erep min-e kwiye mbiriga-o.

² Iri yogola, Pisilin nap-nen muk iniyil mbirigarig-e, Saul ilirak erebe na ennggendumu kenan ereya na-ge indiga-o. Nde, ereya-ge Yonatan min Abinandap min Malkisua min irit indiga-o.

³ Nde, Saul eram iri me-ge wim mondok kwiye worak tomborogolar-e Saul na mare wiril lobok yidnak me, angin irit ebem mbij-o.

⁴ Iri yikma, Saul-nen ap sujwe at esan waruk noso nap iri nak yak tosolar-e: ”An-e Nagawan Indo enaru buk nap ereba-nen tena nuburuk pesel nebaga keya nuburuk nururag-e mondok nimbit me, kat-nen yalawi iri lit yaga niri-o” yak tij-o. Alat nde, ap sujwe iri na-nen-e Saul iri na kwara kek tak oboso me, wururag-e kwiye-nen larok yij-o. Iri ala karuk, Saul na-ge at ambik eyalawi iri na sindik puruk indi-net yebaksa ambik eyalawi anggat pem mbosolat, wat yij-o.

⁵ Iri kwarosola, ap sujwe iri na-nen yik kagaidnggal-e, Saul na-ge abu-t wat yidnak karug-e, at na ondomok eyalawi iri na sindik puruk ondomok eyalawi iri na bem yebaksa anggat pem mbosoluk, Saul eralu irit wat yij-o.

⁶ Iri nggal kwasa Saul min at ambararak kenan min at imin nugwi nap oboksa min ap sujwe esan waruk noso iri na min o misik tarem nak wat yiga-o.

⁷ Nde, Isarael nap Yisiriel mbirik iri na eyak ponok nggwe woragwi nap min mo luwaso (timur) ambigit yi Yareren eyak ponok nggwe woragwi nap min-nen kuliganggal-e Isarael nap san ombo kwiyen-nen ndi yogolat, Saul ambararak inmin na indidnak wene kulurug-e, unuwi siri keya buruk kwiye mborogola-ge, Pilisin nap-nen-e it unuwi siri ereba na-ge waniga-o.

⁸ Nde, nene luk kub-e Pilisin nab-e Isarael nap indidnak ereba na enpem worasu mende ereba na wanuwokluk lobok yiganggal-e, Saul iri na ambararak kenan inmin nde Ndobo Nggilmboa iri bem nde worak eneyaiga-o.

⁹ Eneyagrug-e, Saul iri na anggulwak mbatluk, eragun iri na yunggutluk kwariga-o. Iri lug-e, Pisilin nap-nen-e ap wirik onpogolar-e, Saul anggulwak mbarak min eragun min parugu Pisilin nap woragwi o siri min it unkugwigwak woraso sa min Saul wiridnak wene iri na yak indil nuwakluk wirik inpiga-o.

¹⁰ Nde, Saul eragun yunggwirik iri na-ge it unkugwiwak Asoret uwi iri na me ndok worak pil nggwiga-o. Nde, ebe iri na-ge posid luruk wosa o siri Mbet-Sean pak leget pem tiong tak piga-o.

¹¹ Alat nde, Yabes-Nggileat woragwi nap-nen-e Pilisin nap-nen Saul kwat ibidnak wene ereba na kulurug-e,

¹² o iri me woragwi nap ap mondok kwiye lak ereba na-ge kuburu Mbet-Sean mbirigarik, Saul ambararak ontogwak luruk wosa pak leget pem piga ereba na-ge lesa nggweyakma rak purak, waruk Yabes lobok yigarik, kan piga-o.

¹³ Nde, onowak yenak ereba na-ge ndok wosa keya buruk, e tamariska indipma yapma inpiga-o. Yapma unpurug-e, tabun puruk nunggwi mende ninggit lak tuju bem woraiga-o.