1 SEMUEL 24 - Nanduk Ngget Tul Pidnak Wene

Ndaut-nen Saul wururak imbit-nen keya ibidnak wene 24:1-12

¹ Nde, Saul na Pilisin nap inmin wim mbatluk lobok yosolat-nen kulidnggal-e: ”Ndaut na-ge o Enggeri koroga karu me ereba me worasu-o” yogola kulij-o.

² Kulurug-e, Saul-nen Isarael nap san ombo ereba na ennggendumu-nen san wari nak oboksa tiga ribu (3.000) iri lenak unpurug-e, Ndaut min Ndaut imin nugwi nap min onkore mo luwaso (timur) ambigit ndobo unu-ge Walma Woraso Kambing Ndobo iri na nggwe mbiriga-o.

³ Nde, Saul na mberarig-e, tu mbanggoma lomba uwi siyak worak sa iri na me wok yij-o. Nde, iri na me-ge kerep eyanggo misik worala-ge, iri na me al wereyekluk nggwij-o. Nde, kerep eyanggo iri na arem-e Ndaut iri na imin nugwi nap inmin-e iri me-t woragola-ge, ar-e emnde bem nak nggwij-o.

⁴ Iri yosola Ndaut imin nugwi nap-nen Ndaut yak togolar-e: ”Nagawan Indo-nen kat yak korosolar-e: ’Kuwim nab-e an-nen kegera kinggem tak pimin-o. Iri yosola, kar-e kat kindi-nen pidnak kwat uburag-o’ yid iri na-ge yawo-ge nanongga me, nonmbo, mondok wiri-o” yak tiga-o. Yogoloma-ge, Ndaut na mbik mbok Saul woraso sa iri na me wasolar-e, usum leyok sum iri na erep siyak mbarij-o.

⁵ Mbatluk ombol nggwe-ge Ndaut-nen yebet kasolar-e: ”An iri kwarigi iri-ge meya-t kwarigi-o” luk yebet kagaij-o.

⁶ Yebet karuk-nen at imin nugwi nap ereba na yak ondosolar-e: ”An-nen idnak Nagawan Indo-nen lenak pidnak nap yu an-nen wirimin naru Nagawan Indo-nen yik neyarok wolmag-o. At iri-ge Nagawan Indo-nen lenak pidnak me, an-nen-e mariger-o luk andi bandi rak ibimin pug-o” yak indij-o.

⁷ Iri nggal kwasa Ndaut-nen-e: ”Saul iri-ge wururag-e lag-o” luk at imin nugwi nap ereba na inndi yangunij-o. Nde, Saul na-ge kerep yanggoma iri me-nen at mbururak peragid nggwe-t mbirij-o.

⁸ Mborosoloma-ge, Ndaut na-ge imbirik kerep yanggoma iri na me-nen wasolat ene nggoksa yosolar-e: ”Nagawan wa-e” luk yak tosoloma,

⁹ Saul-nen nden kaga yik kagaidnggal-e, Ndaut nde erare nggwe tud yosolat-nen yosolar-e: ”Ap-nen kat yak korogolar-e: ’Ndaut na-ge kat kereyekluk yusu-o’ luk yak kitli iri-ge noluk-nen kulusu-o?

¹⁰ Yanem kerep yanggoma yu me-nen Nagawan Indo-nen nagawan kar-e ndegel koboso nap an ninggem posola-ge, an-nen nagawan kat kuruwakluk an nowosirak-nen nemengen mbariga-t nde, nab-o. An-e larok yosolat-nen yosolar-e: ’An-nen idnak nagawan makluk Nagawan Indo-nen lenak ibid nap iri-ge mariget ter-o luk andi bandi rak ibimin pug-o’ luk yak indigi-o.

¹¹ Neid wa-e. Yik ki-o. Nagawan kusum leyok sum erep mbarak an ninggem yu ki-o. Ndemeret nagawan kar-e an-nen ketleb-et nde, we kusum erep mariget nak mbara wanigirik, ninggem yu ki-o. Iri ala-ge, an-e kat kimin meya kwarurak na perasu buk, iri-nen nden karuk kat kimin meya rak kuburak na perasu bug-o. An-e nagawan kat kimin-e meya mariget ter-o luk kwarigit lag-et nde, nagawan kar-e an nereyekluk an langgal nuburuk waring kasu-o.

¹² Nit nenmberek nennggendumu ta-nen nde meya kwarusu iri-ge Nagawan Indo nak-nen nenpem wene mbenaruwag-o. An-e kar-e marigit tet andi bandi rak kibimin pug-et nde, kat-nen an kwat nubusu iri-ge Nagawan Indo nak-nen onggo puwag-o.

¹³ Nanduk-nen wene ijambo yogolar e: ’Meya kwarugwi iri-ge meya kwarugwi nap nak-nen kwarugwi-o’ luk yugwi iri-ge kar-e karu-o. Iri bem-e nagawan kat kimin-e an-e mariget tet andi bandi rak kibimin pug-o.

¹⁴ Isarael nap nagawan kat-nen nereyekluk langgal nuburuk nusu nap an nebage mbi lombot nibi-o. An-e yengge meya wat yekluk min pi min nggal-nen yusu-o.

¹⁵ Nagawan Indo-ge wene mbenarugwi nap kwat yosolat, wene yu-ge an min nagawan kat min nennggendumu-ge at nak-nen mbenaruwa-o. Iri yosolar-e, kat-nen nereyekluk yusu-t nde, Nagawan Indo-ge an nambigit yosolat, yongga nuruwag-o” luk yij-o.

¹⁶ Ndaut-nen wene yu abu yosola karug-e, Saul-nen yosolar-e: ”Nambara Ndaut wa-e. Yu-ge Ndaut kar-et, lak?” yosolug-e, Saul na-ge yip tij-o.

¹⁷ Iri luk-nen Saul-nen yosolar-e: ”Kar-e ndemeret op nab-er-o. Meya-ge an-er-o.

¹⁸ An-e kat kimin meya-t kwarosola-t nde, kat-nen-e konag-et kwat nibigen-o. An-e kat-nen nuruwakluk Nagawan Indo-nen niminep wesera kinggem nibij-et nde, keya nibigen. Iri bem-e yawo-ge kar-e an nimin-e konag-et kwarusu-o luk naru yusu-o.

¹⁹ Ap-nen unuwim nap inmin lambuk lug-e, keya unpugwi bug-et nde, kar-e keya nibidnak me, kat-nen yawo konak kwat nibigen iri bem-e Nagawan Indo-nen imbiringgat tak kubuwa-o!

²⁰ Nde, an-nen-e kar-e Isarael nap ennggendumu nagawan yugun-o luk keberasu-o. Iri yosolar-e, Isarael yu me kat-nen tenakun uwi-ge mondok tugup lak irit wolma-o luk perasu-o.

²¹ Kat nde iri nggal woralar-e, an-nen wigarag-e mondok indigit lak yosolat, unu lak tak posolat kwarimin pug-o luk Nagawan Indo unu bem owak mbari-o” luk Ndaut yak tij-o.

²² Yosoloma, Ndaut-nen-e: ”Kat-nen yigen irit kwat inpimin-o” luk owak mbarij-o. Iri lug-e, tuguruk Saul na-ge ama mborosola-ge, Ndaut iri na imin nugwi nap inmin-e tuguruk kurak tak woragwi sa mbiriga-o.