1 SEMUEL 18 - Nanduk Ngget Tul Pidnak Wene

^1-2 Saul na Ndaut enmberek wene ndutlug-e, Saul-ne Ndaut na-ge at eyabu wanoso nap tak pamu, iri tarem-net Ndaut na-ge ”Keid eram kama mbururag-e lag-o” yamu, irit woragij-o. Nde, Yonatan Saul ambara iri na-nen Ndaut-nen wene ereba na yosola kulurug-e, Yonatan indi-ge mondok Ndaut arem purungsa nggwij-o. Iri yosolar-e, at ondomok abuwa kaso nggal irit abuwa kagaij-o.

³ Nde, abuwa kasolar-e, Yonatan-nen-e: ”An-e Ndaut yu-ge mondok pem irit imin kundik woramin-o” luk owak mbarij-o.

⁴ Iri yosolar-e, Yonatan-nen-e usum na-ge yonggora keya buruk, Ndaut wok tosolar-e, posid-nen konidnak eragun min-et eyalawi min-et esan min-et esani are san ombo-nen pugwi min-et oboksa Ndaut wok tij-o.

⁵ Nde, Ndaut-nen-e Saul-nen yabu ebem pid ereba na kwara wanosolat irit woragij-o. Iri kwarosola karug-e, Saul-nen-e Ndaut na-ge san ombo onowe nggok irit mendak pij-o. Iri yamu-ge san ombo onowe oboksa-nen na irit, Saul ndegel ubugwi nap-nen na irit Ndaut na indingen tak pogolat woraiga-o.

Saul-nen erengen ale Ndaut ebem pidnak wene 18:6-16

⁶ Ndaut-nen Pilisin nap Nggoliat iri na wutluk lobok yosola-ge, san ombo oboksa wim tumbutluk o silmu lobok yogola-ge, o Isarael wi woragwi kweyap oboksa wagolar-e, Saul abi wanogolat-nen enalen pem ndawi yogolat, onpoba ene rak pogolat-nen ndawi yogolar-e, kot kil lobok yiga-o.

⁷ Kweyap ereba na-nen kot kagolat ndawi-ge yu nggal yiga-o: ”Saul-nen-e mondok kwarat (beribu-ribu) indij-et nde, Ndaut-nen-e mondok wonarurak puk (berpulu-pulu ribu) indij-o” luk yiga-o.

⁸ Iri yogola kulurug-e, Saul-nen yebet kasolar-e: ” ’At Saul-e kwarat (beribu-ribu) indij-et nde, Ndaut-nen-e mondok wonarurak puk (berpulu-pulu ribu) endamu-o’ luk an-e teberak nuburuk ar-et nagawan tak ubuwa yur-a?” perasolug-e, mondok isilepma kwarat Ndaut ebem pij-o.

⁹ At erengen ale Ndaut ebem poso tel kurij-e iri tarem-net tel kurij-o.

¹⁰ Nde, kub-e Saul na-ge tege tenasa ama worasoma-ge, meya indi-ge Mbal Pem Nagawan-nen Saul arem pil lobok yosola-ge, mimo Saul arem nggosolar-e, ap kimiri-nen kwarugwi irit kwarij-o. Nde, iri na tarem-e Ndaut na-ge kecapi poba ene yusu ereba na nggal-et yik tenak worasoma-ge,

¹¹ Saul-nen perasolar-e: ”Nerege yu bem-et Ndaut iri-ge kebet min panggara mbiringin tak peyeg-o” luk abi-ge ebem ndurum tak puruk mon kagaidnggal kebel kasola, kebet nde mbiringin yij-o. Mberen pem-et Saul-nen wirij-et nde, wabij-o.

¹² Iri lug-e Saul na indi wok yosolat-nen yebet kasoma-ge, Nagawan Indo-nen-e ar-e keya uburuk, Ndaut irit kura oboso ala karug-e, at-nen Ndaut aye yij-o.

¹³ Aye yosolar-e, Ndaut na-ge at Saul woraso sa worasu iri na lak tak uburuk, san ombo ebamu, san ombo lit eneyaruk wim timbiril nosola-ge,

¹⁴ Nagawan Indo-nen Ndaut yongga worasola-ge, Ndaut-nen kwaridnag-e ebe nak yosolat woragij-o.

¹⁵ Saul-nen yik kagaidnggal Ndaut-nen kwaridnag-e ebe nak yosola karug-e, ebem lud nde Saul-e Ndaut aye-t kasolat woragij-o.

¹⁶ Alat nde, Isarael nap min Yewura nap min oboksa-nen-e Ndaut-nen-e pempa lit unpuruk nosolar-e, konak nak kwat onposolat worala karuk, Ndaut na-ge inndi-ge at ebem pogolat woraiga-o.

Ndaut-nen Saul ara wanidnak wene 18:17-30

¹⁷ Saul-nen perasolar-e: ”Ndaut yu-ge an ninggi-nen wururag-e meya-o. Alat nde wim pem-nen Pilisin nap-nen wuruwag-o” perasolug-e, Saul-nen Ndaut yak tosolar-e: ”Kat nde an-nen idnak wim wari kwiye lak woralat, Nagawan Indo amanggim wim nggosola-ge, an nara ambap Merap iri-ge kat wok kirimin-o” yak tij-o.

¹⁸ Yosoloma, Ndaut-nen Saul yak tosolar-e: ”Isarael nap ennggendumu-nen an min neid niya nowe nowot inmin-e nunggwirik nggal ala-nen nagawan kat kara wanimin-o?” luk yij-et nde,

¹⁹ kwe Merap iri na Ndaut wok turak tarem-nen-e lugudsa Meola nap Andiriel nde wok tij-o.

²⁰ Nde, Saul ara Merap owot Mikal iri na indi-ge Ndaut ebem pidnak iri na kulurug-e, Saul na-ge alen kagaij-o.

²¹ Alen kagaid iri-ge at-nen perasolar-e: ”Ndaut na-ge Mikal wanurak puruk wim nggosolat amawi kondosoma, Pilisin nap-nen wuruwag-o” luk Saul-nen mberen pem tak posolat Ndaut yak tosolar-e: ”Yawo kar-e an nara un kwat yurag-o” luk yak tij-o.

²² Yak turuk Saul-nen-e Ndaut kuraga yak tuwakluk ap enpem posolar-e, yu nggal enpem pij-o: ”Nagawan min at eyabu wanugwi nap oboksa min-nen-e inndingen tak kibili-o. Nde, yawo-ge kat-nen ara iri na wok uburak tarem-e ndak yij-o” luk yak tiga-o.

²³ Nde, it-nen Saul-nen yak indidnak wene ereba na yak togola-ge, Ndaut-nen onggo yosolar-e: ”Kit kenarem-nen-e nagawan abak kwat yurak iri-ge angin lag-o luk perali-a? An-e narengge na lak, nebe na ebe lak mende-nen yusu-o” yij-o.

²⁴ Yosoloma-ge, Saul eyabu wanugwi nap-nen-e Ndaut-nen yid iri na-ge Saul yak tiga-o.

²⁵ Iri yogola kuluruk, Saul-nen Ndaut yak turak wene enpem Posolar-e, yu nggal enpem pij-o: ”Nagawan Saul-nen yosolar-e: ’Kwe onggo nggal-e enmepnggo posolat an nuwim nap Pilisin nap iniye ambesap abi mbarak seratus (100) nak wok niril lobok yurak perasu-o’ luk yak ter-o” luk yak indij-o. (Nde, iri yid iri-ge Pilisin nap nen Ndaut wuruwakluk are posolat-nen yij-o.)

^26-27 Nde, Saul eyabu wanugwi nap-nen-e Saul-nen yidnak wene-ge Ndaut yak tiga-o. Iri yogola-ge, Ndaut-nen-e nagawan ara wanurak pem alen kagaij-o. Iri bem-e kwe na wok uburak tarem Saul-nen wat tak pid iri na awo wok yigit lak ma Ndaut na-ge at imin nugwi nap inmin o Pilisin mberarig-e, Pilisin nap dua ratus (200) irit unduruk, iniye ambesap abi mbara waruk lobok yarik, Saul-nen nggi yid iri na ndak ndag-e lak, are, terak menna irit Saul eram pij-o. Iri rak posola-ge, Saul-nen-e ara Mikal iri na-ge Ndaut wok tij-o.

²⁸ Iri nggal kwarosola-ge, Saul-nen yik kasolar-e, Nagawan Indo-nen-e Ndaut na nggetlel obosolat, nde, at ara Mikal iri na-nen na Ndaut ebem-et indi kundik posolat kwarosola, irit yenggerak kagaij-o.

²⁹ Iri ala karug-e, ebem lud Ndaut aye kasolat woralar-e, Ndaut na-ge pempa imin sirid mbarak irit woragij-o.

³⁰ Nde, san ombo Pilisin nab-e pempa wim nggurak lobok yogola-ge, Saul-nen idnak san ombo erep-nen-e mariget ondogola-t nde, Ndaut-nen-e mondok kwarat ondosolat woragij-o. Iri yosola-ge, ebem lud Ndaut anggu obok mborosolat woragij-o.