1 SEMUEL 15 - Nanduk Ngget Tul Pidnak Wene

Amalek nap inmin wim mbaridnak wene 15:1-9

¹ Nde, misik tarem-e Samuel-nen Saul yak tosolar-e: ”Nagawan Indo-net yak norosola-nen kar-e Nagawan Indo ilirak Isarael nap ennggendumu nagawan tak kobosolat amburu kanggul pem kilik pukmu-o. Iri bem-e nagawan kar-e Nagawan Indo Amawi Worak iri na-nen yidnak wene yu kwara kuli-o.

² Amalek nap onmborak-nen-e Isarael nap Mesira-nen lobok yukmu inmin wim mbaridnak me, Nagawan Indo-nen-e Amalek nab-e angin worak mende enpem puwa-o.

³ Iri bem-e kir-e mburugupndik Amalek nap enpem kore yogolat, enarengge min mondok abu pendega lak tak purag-o. Yi mende ndi mende misiger-o luk mondok keya burak pug-o. Ap ala na kwami ala na li marik ala na, li nggisiya ala na onowam sapi min lomba min unta min kelerai min oboksa mondok pendega lak tak unpurag-o” luk yak tij-o.

⁴ Iri lug-e, Saul-nen-e san ombo oboksa lid lud tak unpuruk, o Telaim iri me-nen wonat onposolar-e, Isarael nab-e dua ratus ribu (200.000), nde, Yewura nab-e sepulu ribu (10.000) san ombo nak irit wonat inpij-o.

⁵ Wonat unpurug-e, at-nen idnak san ombo inmin o siri Amalek mbirigarig-e, yi ogorak ma iri na me pak tiga-o.

⁶ Pak tak woragolar-e, at-nen wene wosa Keni nap enaru rak posolar-e: ”Konmborak-nen-e nanduk Isarael nap Mesira-nen lobok yukmu inmin konag-et kwaridnak me, kir-e Amalek nap inmin lak tak kinpimin-o luk, mondok kenarik lena mberer-o” luk wene wosa bij-o. Yosoloma-ge, Keni nab-e lena enarik mbiriga-o.

⁷ Iri luk, Saul-nen Amalek nap inmin wim mbarosolar-e, Awila kuri-nen mo luwaso (timur) nggwe Mesira ambigit Asiut mburugwi tula tula ereba na me wim nggogolar-e, Amalek nab-e urugwe nggwe rak inpij-o.

^8-9 Iri kwarogolar-e, Amalek nap oboksa min san ombo min oboksa Saul-nen indij-o. Alat nde, Saul min at-nen idnak san ombo oboksa min-nen-e Amalek nap nagawan Agak iri na nak uruk tenaiga-o. Iri nggal-et sapi min lomba min mondok konak ereba na min sapi mendaso min lomba mendaso min mondok usul ereba na min silobulo erep onggo nggok pugwi ereba na-ge oboksa wanogolat, nde, ebe lak mende meya ereba nak mondok oboksa lak tak piga-o.

Saul-nen nagawan woraso iri na Nagawan Indo-nen lak tak ibidnak wene 15:10-35

¹⁰ Iri kwarogola Nagawan Indo-nen Semuel yak tosolar-e:

¹¹ ”Saul yu-ge an neram-nen nden karuk mborosolat, an-nen ebem pigi-ge kwarigit lak yidnak me, niri nera-nen Saul yu-ge nagawan tak ibigi-o” luk yak tij-o. Yosoloma, Semuel-e indi puru luk, Nagawan Indo emengen mbal tenak nene yij-o.

¹² Nene luk kub-e Semuel na-ge kubu kabu Saul imin lambuk yurak mbirij-o. Mborosoma-ge, ap-nen yak togolar-e: ”Saul na-ge o Karamel mberarik, iri me-nen at ondomok amanggim unu kek tak purak misik ndak wosa puruk, Nggilnggal nggwe mbirij-o” yak tiga-o.

¹³ Nde, Semuel na mberarik, Saul imin lambuk yosola-ge, Saul-nen Semuel yak tosolar-e: ”Nombo-o. Nagawan Indo-nen imbiringgat tak kubuwag-o. An-e Nagawan Indo-nen kwarurag-o luk nebem pidnag-e ndak ndag-et kwarigi-o” luk yak tij-o.

¹⁴ Yosoloma, Semuel-nen yosolar-e: ”Irit nde, noluk-nen an-e sapi ene min lomba ene min kulusu-o?” luk kin wok ibij-o.

¹⁵ Yosoloma, Saul-nen yosolar-e: ”Ereba-ge Amalek nap onowam kugun pem wanidnag-o. Ereba-ge ap erep yeba-nen omok worak ala karuk, lomba min sapi min Nagawan Indo nombo Kembal Pem Nagawan iri na amanggim wosa kan purak wanidnag-o. Alat nde, mondok kwarar-e abu lak tak pikma-o” luk yak tij-o.

¹⁶ Yosoloma, Semuel-nen yosolar-e: ”Irit nde, pug-o, nab-o. Nagawan Indo-nen yawo kubu yak nirid wene mbi yak kirimin” luk yak tij-o. Yosoloma, Saul-nen yosolar-e: ”Yi-o, nab-o” luk yij-o.

¹⁷ Yosoloma, Semuel-nen yosolar-e: ”Kat kondomok-nen yebet kasolar-e: ’An nggal-e meyar-o’ luk yebet kaigen-et nde, kar-e Isarael nap enanggul pem nagawan kwat yigen-o. Kar-e Nagawan Indo net Isarael nap enanggul pem nagawan yonokluk lenak kebamu-o.

¹⁸ Iri-nen: ’Amalek nap meya yugwi iri-ge mondok lak tak inpi-o’ luk kebem pij-o. ’Iri yosolar-e, kat-nen inmin wim mbarosolat, mondok obok pendega lak tak unpurag-o’ luk yak kirij-et nde,

¹⁹ kar-e noluk-nen Nagawan Indo-nen kebem pij-e kwarigit lak yigen-o? Noluk-nen kat tet wirimikmik wim kugun pem yeba wanigen-o? Iri nggal kwarogolat Nagawan Indo indi abi kalak pigen-o” yak tij-o.

²⁰ Yosoloma, Saul-nen onggo yosolar-e: ”An-e Nagawan Indo-nen nebem pidnak ndak ndag-e mbirigirik wim mbarosolat, Amalek nap oboksa ondosolat, nde, nagawan Agak iri-ge uruk tenaga waruk lobok yigi-o.

²¹ Alat nde, an nimin nugwi nap-nen-e lomba min sapi min mondok omok worak ereba-ge wirigit lak, kugun pem waniga ereba-ge Nagawan Indo nombo Kembal Pem Nagawan iri na amanggim Nggilnggal iri me wosa kan purak puruk waniga-o” luk yij-o.

²² Yosoloma, Semuel-nen yosolar-e: ”Nagawan Indo-nen indingen kasu-ge at-nen yidnak yidnak kwarurak iri, lak? Are, at amanggim wam wosa kan purak iri-a? At amanggim wosa kan purak iri-ge marik-nen yusu-o. Alat nde, at-nen yidnak yidnak kwarurak iri perak nde mondok nggok-nen yusu-o. Lomba omok pugwi iri-ge marik-nen yusu-o. Alat nde, inndi-net at-nen yidnak nak kwarurak iri perak nde nggok-nen yusu-o.

²³ Nagawan Indo imin eyak wurugwi iri-ge kugwi tu mbarugwi ndak ndak-net yusu-o. Nde, inndi kek yugwi iri-ge kugwiwak erembel wanugwi ndak ndak-net yusu-o. Kar-e Nagawan Indo ene tarigendik me, Nagawan Indo-nen-e kat-nen nagawan woraso iri na-ge lak tak kibij-o” luk yak tij-o.

²⁴ Nde, Saul-nen wene iri kulurug-e, at-nen para Semuel yak tosolar-e: ”Ndemeret. An-e Nagawan Indo ene na tarosolat, an-nen kwarurak kat-nen mirik nibigen na tarigi-o. Nde, iri kwarigi iri-ge an nimin nugwi nap inndi aye-nen it enne nggarigirig-o.

²⁵ Alat nde, nab-o. An-nen meya kwarigi-ge kamberam tak puruk, an-nen Nagawan Indo erembel waneyek-nen yawo tuguruk an nimin Nggilnggal mburuwog-o” luk Semuel emengen mbarij-o.

²⁶ Alat nde, Semuel-nen onggo yosolar-e: ”An-e tuguruk nagawan kat kimin mbururag-e nimbir-o. Kar-e Nagawan Indo-nen yidnak wene taridnak me, Nagawan Indo-nen-e kat-nen nagawan woraso lak tak kibij-o” luk yak tij-o.

²⁷ Yak turuk, Semuel na-ge mbereyeg-o luk, nden karuk mborosoma-ge, Saul-nen-e mburuwa naru tena ebeyeg-o luk, Semuel usum erep tena bidnggal-e sum erep siyag-e ndelepsa labuk yij-o.

²⁸ Iri ala karuk, Semuel-nen Saul yak tosolar-e; ”O yawo-net kat-nen Isaraei nap ennggendumu nagawan woraso iri na-ge Nagawan Indo-nen kat kinggem-nen lit yaga kat nggal-e lag-o. Are, konak mot mot nak kwaroso nap misik wok tij-o.

²⁹ Isarael nap Enmbal Pem Nagawan Kek tak iri-ge ki nap inndi nggal-e lak me, enesiget na yoso buk, at indi-nen pidnak iri-ge mborok tak poso buk-nen yusu-o” luk yak tij-o.

³⁰ Yak tosoloma-ge Saul-nen onggo yosolar-e: ”An-e meya-t kwarigi-o. Alat nde, yongga norosolar-e, nab-o. An-e Nagawan Indo nombo Kembal Pem Nagawan erembel waneyek-nen tuguruk nenmberek mburuwog-o. Iri nggal kwasa nimin mborosola-ge, Isarael nap ennggendumu enne kulugwi nap min Isarael nap oboksa min enlengen pem-e kek tak nobosolat-nen kwarugun-o” luk yak tij-o.

³¹ Yosoloma-ge, Semuel na-ge tuguruk Saul min Nggilnggal mbiriga-o. Mbirigarig-e, Saul-nen-e Nagawan Indo erembel wanij-o.

³² Iri lug-e, Semuel-nen yak ondosolar-e: ”Nagawan Agak iri na waruk lobok yer-o” yamu, Agak na waruk lobok yogola-ge, at-nen perasolar-e: ”Nururag-e woragirig-et me, nuruwa bug-o” perasolug-e, Agak na-ge te-t lobok yij-o.

³³ Lobok yosola, Semuel-nen yosolar-e: ”Kat keyalawi-nen kweyap kwarat inlirak lak tak onposo iri na nggal-et kat kiya-ge ambara na lag-et mag-o” yosoluk yarik, Nggilnggal-nen wam wosa Mbal Pem Nagawan amanggim kan pugwi sa eralu iri me Agak na-ge yalawi bem-nen mbarep parepsa keya bij-o.

³⁴ Iri rak purug-e, Semuel na-ge ama Arama mborosola-ge, nagawan Saul na-ge ama Nggibea mbirij-o.

³⁵ Iri kwariga kuri Semuel na woralar-e, Saul imin-e lambuk yigit lak irit woragij-o. Alat nde, Semuel na-ge Nagawan Indo-nen-e: ”Niri nera-nen Saul yu-ge Isarael nap enanggul pem nagawan mendak pigi-o” yosola karug-e, Semuel na-ge Saul yebet karug-e indi andi kerenak woragij-o.