1 SEMUEL 13 - Nanduk Ngget Tul Pidnak Wene

Pilisin nap inmin wim mbariga wene 13:1-23

¹ Nde, Saul na nagawan luk woralar-e, misik tarem-e

² Israel nap ennggendumu-nen ab-e tiga ribu (3.000) irit len unpurug-e, dua ribu-ge (2.000) at imin o Mikmas ndobo worak o Mbetel iri me woraiga-o. Nde, ap seribu-ge (1.000) at ambara Yonatan min Mbenyamin nap unuwi nggweyak pem o Nggibea mbiriga-o. Nde, ap erep terak ereba na-ge ”Kenma lombok ndi yer-o” luk yak indij-o.

³ Nde, Yonatan-nen Pilisin nap san ombo onowe misik o Nggibea iri me-nen wirij-o. Iri yamu iri wene iri na Pilisin nap oboksa-nen naru karu mbiga-o. Iri yogola-ge, Saul-nen-e Iberani nap oboksa-nen kuluruk wim timbiril lobok yuwakluk wim puwokluk-nen pugwi posid poba ene iri na ”O iri na oboksa ene pu yil ner-o” yamu, pil niga-o.

⁴ Isarael nap oboksa yak ondogolar-e: ”Saul-nen Pilisin nap san ombo onowe woramu me, Pilisin nab-e insilepma Isarael nap enpem pili-o” yogola kulurug-e, ap oboksa-nen Saul-nen wene mbo inpid iri na ombol nggwe nak wat kil Saul eram Nggil Nggal mbiriga-o.

⁵ Nde, Pilisin nab-e Isarael nap undurak ap kamariga-o. Nde, Pilisin nap enarengge wim koma-ge tiga pulu ribu (30.000) irit lud tak piga-o. Nde, ap enam ratus (600) iri-ge kura wam ombol pem mbururak lud tak piga-o. Nde, san ombo-ge mondok yi sisiri nggal irit ndok wiriga-o. Iri rak purug-e, o sare-ge mo luwaso (timur) nggwe Mbet-Awen ambigit Mikmas iri me lit kil lobok yiga-o.

⁶ Iri rak purug-e, wim-e Isarael nap inmin mbariga-o. Mbarigarik tomborogolar-e, Isarael nab-e mondok meya meya rag-et onpogola karug-e, Isarael nap ereb-e kerep yanggoma min ndobo bem ereba min e urumu kerep urumu nggweyak arem yi mbun nenaridnak sa ereba na me min yurak kurak mbiga-o.

⁷ Nde, ereb-e Yi Yareren mbara Nggat min Nggileat min nggweyak pem ndil laiga-o. Nde, Saul na-ge Nggilnggal irit worala-ge, ap at imin worali ereba na-ge kwiye kwarat irit yiga-o.

⁸ Iri na me Saul na Semuel yik karok woralar-e, enam nene yij-o. Semuel-nen urul pid iri na ndak ndag-et yik karok woragij-et nde, Semuel na-ge Nggilnggal iri me wok yigit lak irit yij-o. Iri ala, ap erep na Saul na arik keya bugwi tel korogola karug-e,

⁹ at-nen ap ereba na yak ondosolar-e: ”Nagawan Indo amanggim wosa kan purak min at imin kondogolat wosa kan Purak min waruk lobok yer-o” yak undurug-e, at ondomok-nen Mbal Pem Nagawan amanggim wosa kan pij-o.

¹⁰ Alat nde, Saul na-ge nggeret wam wosa kan puruk worasoma-ge, Semuel na-ge lobok yij-o. Lobok yosola-ge, Saul na-ge wa yak teyekluk abuwok mbirij-o.

¹¹ Alat nde, Semuel-nen kin wok obosolar-e: ”Kar-e no kwarigen-o?” luk yak tosola, Saul-nen yosolar-e: ”An-e kat-nen urul pigen iri na yik keyarok woragi-t nde, lobok na yigit lak. Iri-nen ap na an keya nuburuk mborogolat ondoro nak yogolat, iri-nen Pilisin nab-e Mikmas nak kamarogola karug-e,

¹² an nindi-nen yebet kasolar-e: ’An Nggilnggal yu me worasoma, an-e Nagawan Indo-nen nabuwa kujwakluk emengen mbarigit lak ma Pilisin nab-e niril lobok yuwa yur-a?’ perasolug-e, ’Mbal Pem Nagawan amanggim wam wosa kan peyeg-o’ luk kan pigi-o” luk yak tij-o.

¹³ Wene iri kuluruk, Semuel-nen Saul yak tosolar-e: ”Nagawan kat-nen kwarigen iri-ge mondok indi lak-nen kwarugwi-t kwarigenma-o. Kat nde Nagawan Indo-nen kebem pidnak iri na-t kwatlepnggal-nen-e nagawan men yugwi iri na-ge kat-nen nderak lolo irit Isarael nap ennggendumu iri nak-nen nagawan woraleb-o.

¹⁴ Kar-e Nagawan Indo-nen kebem pidnak wene iri na-ge kwid tidnak me, kat kebem pidnak yabu iri na-ge pem wolma bug-o. Nde, yawo-ge Nagawan Indo-nen at ilirak tena unpuruk wolmomtak at indi-n pidnak nap mbi mondok abu lenak pij-o” luk yak tij-o.

¹⁵ Yak turug-e, Semuel na-ge Nggilnggal-nen at mbururak sa Mbenyamin nap onnggweyak pem o Nggibea mbirij-o. Mborosola-ge, Saul-nen-e at-nen idnak san ombo ereba na wonat onposoma-ge enpe-ge enam ratus (600) nggal irit eneyagaij-o.

¹⁶ Iri lug-e Saul ambara Yonatan iri na-nen lit karuk, it-nen idnak san ombo ereba na inmin-e Mbenyamin nap unuwi nggweyak pem o Nggeba iri me o sare lit kil lobok yiga-o. Nde, Pilisin nab-e Mikmas iri me o sare lit kil lobok yiga-o.

¹⁷ Ap nden unpugwi nap kere kenan iri-ge Pilisin nap ennggendumu-nen ap nden unpurak mborogolar-e, kere misig-e o Sual nggweyak ambigit Opera nggwe mborogolat,

¹⁸ nde, kere misig-e o Mbet-Oron nggwe mborogolat, nde, kere misig-e o Somboim min nembaga min mak mak mbirik ereba na nggwe mbiriga-o.

¹⁹ Nde, Isarael nap ennggendumu-ge Isarael nap-nen posid wuru min yalawi min konurag-e Pilisin nap-nen posid elem-e imiri yogola me, Isarael nap-nen posid wuru min yalawi min konurag-e kabak nak irit woraiga-o.

²⁰ Iri yogola karuk Isarael nap-nen-e sapi amawi bem-nen nggweyak yalugwi tege min nggweyak tege min ije min kabo min anggat marurak pem-e Pilisin nap endam mburugwi-o.

²¹ Nde, ije min sapi amawi bem-nen nggweyak yalugwi tege min anggat marurak onggo-ge kerep tol misik pugwi-o. Nde, sapi mburuwakluk lel kagwi min nggweyak tege min anggat marurak pem-e onggo-ge kerep tol mberen pugwi-o.

²² Iri kwarugwi iri-nen ndowaga o Mikmas iri me-nen wim nggwiga tarem-e Isarael nap ennggendumu-ge ap misiger-o luk mbi-nen yalawi ala na posid wuru ala na mondok ininggem lak irit woraiga-o. Alat nde Saul ambara Yonatan enmberek nak perak ininggem woraiga-o.

²³ Nde, Pilisin nab-e tu paktag-e ndobo kaluruk Mikmas mburugwi sa yengenma iri na me o worak puruk, o paktak woraiga-o.