1 NAGAWAN NAGAWAN-NEN KWARIDNAK WENE 2 - Nanduk Ngget Tul Pidnak Wene

Ndaut-nen at wat yigit lak ma Salomo nggomo wiridnak wene 2:1-9

¹ Nde, Ndaut na-ge at wat momtak abu panggo yosola karug-e, ambara Salomo iri na wene mbo ibij-o. Mondok wene nanu nggal woroksiyem Ndaut-nen nggomo worosolar-e:

² ”An wat momtak abu panggo yij-o. Kar-e kindi tugup lak kwiye lak irit wolmomtag-o.

³ Nagawan Indo Kembal Pem Nagawan-nen kebem pidnag-et kwarosolat wolmin-o. Kat-nen mburugundik, yi kwatlik ndi kwatlik kwarugun oboksa ebe worak maklug-e, Musa-nen mbaridnak engga arem mbarak worasu imiri mbarak pidnak wene oboksa min at-nen ’Iri kwarurag-o’ luk kebem pidnak wene oboksa min mondok ndak ndak kwarosolat wolmin-o.

⁴ Kat-nen nde Nagawan Indo-nen yidnak yidnag-et kwarosola-ge, at-nen an nimin urul posolat: ’Kat-nen wigarak-nen-e Isarael nap tena unpuruk wolma-o. Mbigija-ge it-nen inndi min enpe min ebis-et tugup lak pempa-nen an-nen yidnak yidnak kwat tenak wolma iri nag-o’ luk yid iri na-ge kwaruwar-o.

⁵ Iri-nen wene misik na worasur-o. Kar-e Yoap-nen an nimin kwarij-e mondok karu irir-o. Yoap-nen kwarosolar-e, Isarael nap wim wari mberen Net ambara Apnet min Yetet ambara Amasa min ereya na-ge wim pem-nen ap indiga-t nde, onggo-ge wim saga keya bidnak ombol nggwe-nen nde Yoap-nen it mberen indid irir-o. Nde, it iri-ge meya kwarigit lag-et nde indij-o. Iri yamu yawo-ge at-nen kwaridnag-e an nebem nde angin mbosola, an andi bandi kasu-o.

⁶ Iri ala-ge, nambara-o. Kat-nen at kwat uburag-e karu nar-o. Alat nde, at iri-ge wat momtak tarem-nen wat maklug-e, keya burak pug-o.

⁷ Alat nde, an-e kowe Apsalom aye-nen mbirigirik worala-ge, it-nen-e konag-et kwat nibidnak me, Nggileat nap Mbarasilai iri na ambararak inmin-e kat-nen-e konag-et kwat onposolat, it-nen ukwe yuwa mende-ge yongga ondosolat wolmomtag-o.

⁸ Nde, Mbenyamin nap unuwi nggweyak pem o Mbaurim woraso Nggera ambara Simei iri na owene siyak yak kururak worasu-o. Nde, an nanduk o Maganaim mborosoma-ge, Simei iri-nen-e mondok kwarat imbiri lamut tak nebamu-o. Alat nde abok nggwe an nabuwok Yi Yareren arem lobok yamu-ge an-nen yosolar-e: ’Mondok Nagawan Indo owag-o. Mondok kirimin pug-o’ luk owak mbarukmu-o.

⁹ Alat nde, kat-nen kwarurak yak kereyeg-o. Ar-e keya uburak pug-o. An-e naru-o. Kar-e kindi nggat nggat worak me, Simei iri-ge ap indi worag-et nde, kamawi-t kundugundik at-nen kwaridnak pem wururag-er-o” luk yak tij-o.

Ndaut wat yidnak wene 2:10-12

¹⁰ Abok nggwe-ge Ndaut na-ge wat yamu Ndaut uwi silmu-t yapma ibiga-o.

¹¹ Nde, Ndaut na-ge Isarael nap ennggendumu nagawan woralar-e, olengen empat pulu (40) woragid iri-ge olengen tuju-ge Eberon woralat nagawan woragij-o. Nde, olengen tiga pulu tiga (33) iri-ge Yerusalem nagawan woralat-nen woragij-o.

¹² Iri luk wat yamu-ge Salomo iri eid Ndaut ondolma nagawan men yij-o. Nde, Salomo-nen tenagidnak wi-ge sil kudtak meya, tugup lak irit woragij-o. 2:13-46 Ayat ereba arem-e Salomo-nen-e at owe Andonia na-ge nagawan men yurak yoso iri na wirij-o. Iri-nen Ndaut-nen Simei min Yoap min unduwakluk Salomo ebem pidnak iri na indidnak wene min mbarak worasu-o.