YEREMIA 51 - Alkitab Singog In Mongondow Masa In Tanaa

Hukuman ibanea kon Babel

¹ Ki Tuhan in noguman, “Popoangoi-Kubí in tompot pomoguyaat inta mogirup mopobayá in Babel bo kon intaunea mita.

² Potabá-Kubí in intau mita ango-angoi inta morimumud kon Babel naonda bo tompot mopoḷayug in kuḻit in gandum. Kon singgai in bodito tatua mosia in monubu kon butá tatua nongkon bayongan in tampat bo moyompat kodariton.

³ Dika ogoian in kasampatan in tontaranea in mopopiot in piotnea andeka mopongata in pakeang parangnea. Tayowmobiagnea mita dika bióon mako in mobiag. Rimumudon in bayongan in tontaranea!

⁴ Kekebanbí modaḷom in mosia bo matoi kon daḷan mita in kotá monia.

⁵ Akuoi, ki Tuhan, Allah Inta Totok in mokawasa, Allah inta mokudus in Israel, diábí monaḷámai kon Israel bo Yohuda, umpakabí mosia ain binaradosa kon i-Nakó.

⁶ Posaḷamatdon in awakmu! Poḷaguidon nongkon Babel, dika modapot in moiko moitakin koḻimodan popisí in dosanea! Sin naadon in wakutunea Akuoi motuḻí kon aid moraat in Babel, bo mohukum kon inia podudui in oaidnea.

⁷ Babel inta koina in naonda bo galas buḷawan inta kinadaian-Ku bo nokopopisí kon bayongan inta kon dunia noḷoḷangu. Bangusa mita in nonginum kon anggur nongkon galas tatua, dá mosia in nobaḻídon nobundai.

⁸ Táe daḻídon noḷabú in Babel bo noḷosi. Ombaḷaidon in sia, bo potayakaidon kon undam pongundam kon kekebnea mita, dika-dika bo mopiapabí in sia.

⁹ Intau ango-angoi inta nogutun kon tua in nosigumanan, ‘Kita in noḷongasidon notuḷung kon Babel, táe nolatdon! Maníka taḷaandon naton in butá tanaa bo mobui kon butá naton tontaní. Ki Tuhan in nohukumdon kon Babel totok in mobogat, bo norimumudon komintan.’ ”

¹⁰ Umat i Tuhan in noguman, “Pinoontongdon i Tuhan kon kita in kon dotábí in inta nobanar. Igai mayá in kita in Yerusalem bo oumanon kon tua in onu inta ain inaidan i Tuhan Allah naton.”

¹¹ Ki Tuhan in nopotabádon kon datu mita in Media, sin moibog in Sia morimumud kon Babel. Natuata in pototuḻínea kon aid in intau mita inta norimumud kon baḷoi-Nea. Porwira mita in tontara in parang nomarenta, “Iḷanitai in piot! Podia kon kaḻeaw!

¹² Ogoiai in tomponuot in monubu kon dinding mita in Babel. Iropotai in poḷoḷukadan. Ogoiai in moḷoḷukad. Posadia in modomok!” Ki Tuhan in nopobayádon kon onu inta sinomayá-Nea kon intau in Babel.

¹³ Butá tatua in nooyúon totok bo nobarong in ongkagnea, táe wakutu in kobiagannea in nodaitdon; imbuit in kobiagannea noidapotdon.

¹⁴ Ki Tuhan Inta Totok in mokawasa nongibot pinodoyon kon i-Nia tontaní kon Sia in mopotabá mangoi kon intau ná kobayong in pangkoḷá sin monubu kon Babel, bo mosia in mopobaḷú in baḷú kountungan.

Dondong dodayow kon i Allah

¹⁵ Ki Tuhan in nomaḻí kon butá pinongin kawasa-nea nomia kon dunia pinongin hikmat-Nea, bo nobukat kon ḷangit pinongin pandoi-Nea.

¹⁶ Tongá pinongin parenta, nogonugurdon in tubig kon toḷungayá. Nongkon popod mita in butá pinoangoi-Nea in goḷom, bo binaḻí-Nea in kilat nonindar kon bonu in uyan, bo pinopoangoi-Nea in tompot nongkon pinotagúan-Nea.

¹⁷ Nokoontongmai kon tua komintan nosadardon in intau kon sia in bodok bo diá in pomomangaḻe. Mononontaḷ mita kon buḷawan kinobuḻian in pogot, sin patong berhala inta pinomianea tua in diá totuu bo diá in nyawa.

¹⁸ Berhala mita tatua diá in boḻinea, patusbí rebegon bo singkuḻeon. Aka moiangoidon in wakutunea, moyopúbí in mosia.

¹⁹ Ki Allah i Yakub in diábí notongkai in berhala mita tatua; Sia in nomaḻí kon bayongan in yagi-yagi. Tangoi-Nea in ki Tuhan Inta totok in mokawasa; Sia in nomiḻídon kon Israel nobaḻí umat-Nea.

Babel nádon onda bo bobibil

²⁰ Ki Tuhan in noguman, “Babel, iko in nádon onda bo bobibil, pakakat-Ku pakéon moparang. Iko in pakéon-Ku sin pobibil kon bangusa mita bo dodatuan mita.

²¹ Iko in pakéon-Ku morimumud kon kabaḷo bo tumotakoinea, takin kereta bo mododianea.

²² Iko in pinaké-Ku moḻimod kon ḷoḷaki bo bobay, nogurang andeka noguodpa, mongodeaga andeka tayowmobiagpa.

²³ Iko in pakéon-Ku moyopú kon gombala bo bobiagonnea, monononggobá bo sapi inta pomajekonea, mongongawasa bo porwira mita moḷantud.”

Hukuman kon Babel

²⁴ Ki Tuhan in noguman, “Indoiaidon tontaní naonda in Akuoi in tanaa motuḻí kon Babel bo intaunea bayongan in aid moraat inta inaidan monia kon Yerusalem.

²⁵ Ei Babel, iko in naonda bo buḷud inta nokorimumud kon sinangkub in dunia. Táe Akuoi, ki Tuhan, in moḷawangbí kon inimu. Iko in uguton-Kubí bo ḻitoion-Ku bo pomayá-Kudon mako mopokak mobaḻí ḷobud.

²⁶ Diábí tobatúmai in batu nongkon kinorumbunanmu in pakéonpa bui mobaḷoi. Iko in mobaḻídon naonda bo padang gurun modapot in mononoi. Akuoi, ki Tuhan, ain nosingog.”

²⁷ “Ei datu nongkon utuan! Ogoiaidon in tomponuot monubu! Irup in torompet sinbá bangusa mita in mokodongog! Potabá in bangusa mita moparang monayow kon Babel! Potabá in dodatuan Ararat, Mini bo Askenas monubu. Duí in panglima tobatú sin mobaḻí itoi kon ponubuan tatua. Oinídon in kabaḷo ná kobayong in paanan in pangkoḷá.

²⁸ Sadia in bangusa mita moparang monayow kon Babel. Oiní in datu mita in Media takin mongongawasa mita bo guhanga mita in ḻipúnea takin tontara mita nongkon bayongan butá inta kinawasa monia.

²⁹ Butá in moḷundan bo modandú popisí in Akuoi koyogot mopobayá in tomayá-Ku sin mopobaḻí kon Babel tampat moḷogat inta diádon inutunan in intau.

³⁰ Tontara in Babel in nogogaidon in noparang bo nogutun kon benteng mita. Mosia in noinggamádon in barani bo diádon kodaya. Bonawang mita in kotá dinangatandon, bo baḷoi mita in sinurub.

³¹ Totabá mita in noḷagui moyo-moyodudui sin mopotaau kon i datu in Babel kon kotánea in sinubudon nongkon bayongan in tampat.

³² Tampat ḷoḷoḷanan iḻitúandon in musung, bo benteng mita poḷoḷukadan in sinurub. Tontara in Babel diádon kotaauan monia onu in aidan.

³³ Diádon moonggot taḷowon in mosia bo ritakan in musung naonda bo gandum kon tampat poḷoḻidokan. Akuoi, ki Tuhan Inta Totok in mokawasa, Allah in Israel, ain nosingog.”

³⁴ Yerusalem in irimumud bo kinaan komintan i datu in Babel; inaotannea in kotá tatua naonda bo inta nongaot kon botoḷ. Naonda bo mahaḷuk inta moḷoben totok, iḻiomnea in Yerusalem bo nomonu kon siannea takin bayongan inta mopia nongkon kotá tatua, bodongka noḷumbú kon ki agatnea.

³⁵ Intau inta nogutun kon Sion, pogumandon, “Igumon mako Babel in kotugatan in ḻingá inta pinopoaidnea kon i naton!” Intau in Yerusalem, pogumandon, “Igumon mako Babel in koantugan in roriga inta pinoantugnea kon i naton!”

Ki Tuhan in notuḷung kon Israel

³⁶ Tuamai in ki Tuhan in noguman kon intau in Yerusalem, “Akuoi in motuḷungbí kon pelekaramu bo motuḻí kon aid mita in musungmu mita kon inimu. Bokaká mita bo ongkag mita in Babel ingkagan-Kubí.

³⁷ Butá tatua in mobaḻíbí bonturungan in goguyaatnea, pogogadopan in ungkú in kayuon. Mokoningkimbí in intau in moindoi kon inia, bo diábí tobatúmai in intau in moibog mogutun kon tua.

³⁸ Intau in Babel in moganggorbí naonda bo singa, bo monginggoi naonda bo ki adí in singa.

³⁹ Bo ibog monia mokaan in moḷobendon totok, Akuoi in mosadiabí kon pongaanan monia, bo poḷoḷanguon-Ku in mosia bo mopusing moidapot in moḷoḷot bo diádon mopobango-bangon bui.

⁴⁰ Mosia in diaan-Kubí sin ratáan naonda bo ki adí in domba, bembé, bo domba koḷakian. Akuoi ki Tuhan, ain noguman.”

Ukur in Babel

⁴¹ Ki Tuhan in noguman, “Babel inta dinayow in sinangkub in dunia ain inagow bo iḻitúan! Totok in mokokoningkim in butá tatua kon bangusa mita.

⁴² Tubig kon dagat moiḻebet modapot in Babel; bokoḷnea mita mondoḷudut moyompat kon butá tatua.

⁴³ Kotánea mita mobaḻí tampat inta mokokoningkim, naonda bo padang gurun inta noḷogat. Diábí in intau in moibog mogutun andeka tumaḻib kon tua.

⁴⁴ Bel, dewa in butá in Babel, in hukumon-Kubí. Baḻíon-Ku in sia mopobui kon onu inta ain inagownea. Bangusa mita in diá bidon mosumba kon inia. Dinding mita in Babel in norumbundon.

⁴⁵ Tuamai in poḷaguidon nongkon tua, ei umat in Israel! Posaḷamatdon in awakmu nongkon torú-Ku inta tumaga-tagab.

⁴⁶ Dikadon moondok andeka moḻia-ḻiaw in gina popisí in habar mita inta dinongog monimu. Pomuḷoi in taong moiwaya in habar inta tongoposi--habar soaḷ aid mokotor kon bonu in butá bo soaḷ datu mita inta mosiparangan.

⁴⁷ Popirisayadon, moiangoibí in wakutunea Akuoi in mohukum kon berhala mita in Babel. Sinangkub in butá tatua in singkuḻeonbí, bo bayongan in intau kon bonunea in ḻimodon.

⁴⁸ Bayongan inta kon ḷangit bo kon butá in morogiowbí pia in gina aka Babel moiḷabú kon bonu in kawasa in bangusa nongkon utuan inta mamangoi sin morimumud kon inia.

⁴⁹ Nobarong in intau kon sinangkub in dunia ain minatoi popisí in Babel, táe tanaa in Babel in moḷabúbí popisí in intau in Israel inta minatoi kinoḻimodan. Akuoi, ki Tuhan, ain nosingog.”

Koyow i Tuhan kon intau in Israel kon Babel

⁵⁰ Ki Tuhan in noguman kon intau in Israel kon Babel, “Moiko in noiḷaguidon kon poḻimodan! Dá bayádon in tanaa! Dika mogoḷat! Umpakabí noyayú in moiko nongkon baḷoi, toropdon in Akuoi, Tuhanmu, bo kon Yerusalem.

⁵¹ Moiko in moguman, ‘Kami in siningkuḻe bo pinokopo oyámai; kami in kinobuḻiandon in pogot popisí in intau mita ango-angoi iḻimitú kon yuang mita motusi kon bonu in Baḷoi i Tuhan.’

⁵² Yo, taridiai in tosingogon-Ku tanaa. Moiangoibí in wakutunea Akuoi mohukum kon berhala mita in Babel. Kon sinangkub in butá tatua in kodongoganbí in amui in intau popisí in kinekeban modaḷom.

⁵³ Umpakabí Babel mokotakod kon ḷangit bo moposindog in tampat poḷoḷukadan inta diá kodapotan, Akuoi in tantúbí mopotabá kon intau sin momoguyaat kon tua. Akuoi, ki Tuhan, in nosingog.”

Ingguput in pomoguyaatan kon Babel

⁵⁴ Ki Tuhan in noguman, “Indongogai! Kon Babel intau in kumarak bo mongombaḷ morobonoḷ in gina popisí in korimumudan inta mobaḻí kon butá tatua.

⁵⁵ Akuoi in koyogotdon morimumud kon Babel bo mopogogai in singog mita in rame monia. Musung in mamangoi naonda bo bokoḷ inta modoḷudut, bo tontaranea in monubu takin kokow mita in parang.

⁵⁶ Mosia in mamangoi sin momoguyaat kon Babel, modomok kon tontaranea mita bo momutoḷ kon pakakat mita in parang monia. Akuoibí in Tuhan inta mohukum kon aid moraat, bo Babel in tuḻían-Kubí podudui in aidnea.

⁵⁷ Akuoi in mopoḷoḷangubí kon pojabat in pomarenta in Babel--intau mita mongopandoi, itoi bo tontara. Mosia in diá bidon mopobango-bangon bui, moḷoḷot modapot in mononoi. Akuoi in nosingogdon; Akuoibí in datu, Akuoi in Tuhan Inta Totok in mokawasa.

⁵⁸ Dinding in Babel inta mongoropot mita in rimumudon-Kubí modapot in motondodaidon in butá. Bonawangnea inta mongoḷantud in turubon-Kubí komintan. Diábí in mangaḻenea in inta ḷongasi in bangusa mita, sin komintan bungai in aid monia in kaanonbí in tuḷú. Akuoi, ki Tuhan Inta Totok in mokawasa, ain nosingog.”

Koyow i Yeremia pinotaau kon Babel

⁵⁹ Moḷoḷukad i Datu Zedekia in ki Zeraya ki adí i Neria ki ompu i Mahseya. Kon taong inggopatnea kon pinomarentaan i Zedekia datu in Yohuda, ki Seraya dinumudui kon i Zedekia minayá in Babel. Dá inogoianku in sia in oaidan tobatú.

⁶⁰ Bayongan in bodito inta moiantug kon Babel bo soaḷ mita ibanea kon butá tatua ain pinaisku kon ḻitodan in buk.

⁶¹ Bo akuoi in noguman kon i Seraya, “Naonda in iko moiyaput in Babel, ḷongasi sinbá bayongan inta pinais kon bonu in buk tanaa in kobacaanmu kon intau mita inta kon tua.

⁶² Mopaḷut mako kon tua posambayang nanaa, ‘Tuhan, Iko in nogumandon kon kotá tanaa in rimumudon-Mu dá pinomayá intau andeka mahaḷuk in moyopúdon komintan, bo tampat tanaa in mobaḻídon naonda bo padang gurun modapot in mononoi.’

⁶³ Yo, naonda in mopaḷut mako bacaan in tombonu in buk tanaa kon intau mita tatua, popotogot in batu kon buk tanaa, bodongka pogambat kon yua-yuak in Ongkag in Eprat,

⁶⁴ poḷat moguman, ‘Nanaa in mobaḻí kon Babel. Butá tanaa in moitaḷomdon bo diá bidon momuká bui popisí in bodito inta pinopoantug i Tuhan kon inia.’ ” Tosingogon mita i Yeremia nopaḷut kon naa.