YEREMIA 42 - Alkitab Singog In Mongondow Masa In Tanaa

Rayat nopoigum sambayangan i Yeremia in mosia

¹ Nopaḷut mako intua bayongan in intau, moḷoben mointok, takin porwira mita, noitakin doman in ki Yohanan ki adí i Kareah bo ki Azarya ki adí i Hosaya namangoi

² kon inakó bo noguman, “Amá, ná inta inontong tontaní i Amá, kami naa dungkuḷmai in nobayong, tanaa in dongkadon topiḻik. Poigumon nami kaasí sambayanganpa i Amá in kami kon i Tuhan Allah inta sinumba i Amá. Sambayangaipa in kami inta ki agatneapa naa,

³ sinbá poontongpa kaasí i Tuhan Allah mongo kon onda in musti bayáan nami bo onu in musti aidan nami.”

⁴ Akuoi in notubag, “Mopia aka natuabí. Tarimaanku onu in pinoigum tua. Mosambayang in akuoi kon i Tuhan Allah naton, bo onukabí in potubag-Nea, potaaukubí komintan; tobatúmai yo diábí bunionku kon inimu.”

^5-6 Mosia in noguman kon inakó, “Poigumon nami ki Amá in mosambayang kon i Tuhan Allah naton, sin kami in moibogdon tumoḷutui kon i-Nia, sinbá kaadaan nami in mobaḻídon motompia. Dá, mopia andeka moraat in koyow i Tuhan tua, duduianbí nami. Pomayádon mako ki Tuhan in mobaḻí sakusi inta mojujur bo mosatia kon inami, aka kami bo diá dumudui kon bayongan in parenta inta ogoi i Tuhan kon inami pongin i Amá.”

Tubag i Tuhan kon sambayang i Yeremia

⁷ Mopuḷú nosinggai noiduduimai kon tua ki Tuhan in nosingog kon inakó.

⁸ Dá inoiníku in ki Yohanan bo porwiranea mita bo bayongan in intau ibanea inta namangoi takinnea.

⁹ Akuoi in noguman kon i monia, “Moiko in nokipoyaputdon kon inakó in oigum monimu kon i Tuhan Allah in Israel. Dá, ki Tuhan in noguman,

¹⁰ ‘Aka umuran in moiko moibog mogutun kon butá tanaa, yo buaton-Ku in moiko, deemanbí poḷabúon; posindogon-Ku in moiko, deemanbí umpagon. Morobonoḷ totok in ginaku popisí in nopoangoidon in bodito kon inimu.

¹¹ Dikadon moondok kon i datu in Babel tatua. Akuoi in naa kon yua-yuakmu sin motuḷung bo moḷuat kon i monimu nongkon kawasanea.

¹² Popisí in Akuoi nonotabi kon inimu, yo baḻíon-Ku in ki datu in Babel motabi doman kon i monimu bo ogoinea in moiko mobui. Akuoi, ki Tuhan, ain nosingog.’ ”

^13-15 Táe moiko inta nogutunpa kon Yohuda dikabí monombuḻitok kon i Tuhan Allahmu bo dika moguman, “Kami in doíbí mogutun kon butá tanaa. Kami in moibogbí mayá in Mesir bo mogutun kon butá tatua. Kon tua kami in diá bidon moparang, diádon mokodongog kon singog in torompet inta mogoiní sin moparang, bo diádon doman monahang kon roriga gogoyon.” Aka moiko tumontogat kon gina sin mayá in Mesir bo mogutun kon tua, naa in koyow i Tuhan Inta Totok in mokawasa, Allah in Israel, kon inimu:

¹⁶ “Parang bo gogoy inta kinoondok monimu tua in momatukbí kon i monimu modapot in Mesir, bo moiko in matoibí kon butá tatua.

¹⁷ Bayongan in intau inta momakisa mayá in Mesir bo mogutun kon tua in matoibí kon bonu in parang, andeka matoi in gogoy andeka yampoi in takit. Diábí tobatúmai in moiḷagui nongkon bodito inta poangoi-Ku kon i monia; komintanbí matoi.

¹⁸ Ná doman in Akuoi, ki Tuhan Allah in Israel nopobutak in torú bo rogi-Ku kon intau inta nogutun kon Yerusalem, yo natua doman in Akuoi mopobutak in rogi-Ku kon i monimu inta mayá in Mesir. Intau in mokoningkimbí in mokoontong kon i monimu; singkuḻeonbí in moiko, bo tangoimu in pakéonbí saḷaku kutukan. Moiko in diá bidon mokoontong bui kon butámu tontaní.”

¹⁹ Bo akuoi in noguman bui, “Ki Tuhan in nomarentadon sinbá moiko inta ki agatneapa kon Yohuda in diá mayá in Mesir. Tuamai in akuoi in mobogoi in toingat kon i monimu in tanaa

²⁰ kon moiko in nogaidon kon taḷá moḷoben. Moiko in nopoigum sinbá akuoi in mosambayang kon i Tuhan Allah naton sin kopontingan monimu, bo moiko in nodandi kon dumuduibí kon bayongan inta pinoguman i Tuhan.

²¹ Tanaa in pinotaaukudon in koyow in Tuhan Allah naton kon inimu, táe moiko in doíbí dinumudui kon koyow tatua.

²² Tuamai, toropdon: kon butá inta koibog monimu bayáan sin mogutun kon tua, yo matoibí in moiko kon parang, andeka matoi in gogoy andeka matoi in yampoi in takit.”