YEREMIA 10 - Alkitab Singog In Mongondow Masa In Tanaa

Mososumba kon berhala

¹ Umat in Israel, indongogaidon in koyow i Tuhan kon inimu.

² Sia in noguman, “Dika duduian in kabiasaan in bangusa mita ibanea, bo dika moondok in mokoontong kon tomponuot mita kon ḷangit inta kinoondok in bangusa mita tatua.

³ Adat kabiasaan in bangusa mita tatua totokbí in diá in mangaḻenea. Mosia in momupuḷ kon kayu kon kayuon, bo mopotabá kon mogogimok mokipomia in patong berhala.

⁴ Onda intua patong berhala tatua ḷambáan in buḷawan bo saḷaka, bodongka inirigonan in pakú sinbá diá moḷabú.

⁵ Patong mita berhala tatua in naonda bo intau yambá kon gobá in melong. Mosia in diábí mokosingog, diá mokoḷampang, bo musti buaton. Dika moondok kon i monia, sin mosia in diábí mokoaid kon inta moraat kon inimu; mogaid kon inta mopiapa yo diábí doman in mosia mokoaid.”

Ibada kon i Tuhan

⁶ Ki Tuhan inta momulia, Iko in diábí in popotongkaian, tangoi-Mu in moḷantud bo nopuḻing in kawasa.

⁷ Ki ine in doí mopirisaya kon ini-Mu, datu in bayongan bangusa? Totuu, Iko in patusbí totok in horomaton. Nongkon bayongan inta mopandoi kon sigad in bangusa mita bo nongkon bayongan in datu mita monia, diábí in tobatúmai in motaau popotongkaian kon ini-Mu o Tuhan.

⁸ Pamandot bo bodok in mosia komintan sin dewa monia in tongábí kayu, diábí motaau motundú kon inta oyúon in mangaḻenea.

⁹ Sia in inaipan in saḷaka bo buḷawan inta dinia nongkon Spanyol bo kotá in Upas, tua komintan aidbí in ḻima in mongongurig bo mononontaḷ kon buḷawan. Pakeangnea in nongkon kaeng nokamumu nogurang bo kaeng nokamumu noguod, pinomia in mogogaboḷ mita kinopia totok.

¹⁰ Táe Iko, Tuhan, Allah inta mobanar, Ki Allah in mobobogoi in kobiagan, datu mononoi. Aka Iko tumorú, modandú in dunia, aka Iko rumogi yo bangusa mita in diábí mokotongod. (

¹¹ Moiko, ei umat, musti mopotaau kon i monia kon dewa mita inta diá nomaḻí kon ḷangit bo butá tua in yopúonbí. Mosia in moinggamábí nongkon tudu in butá naa.)

Dondong dodayow kon i Allah

¹² Ki Tuhan in nomaḻí kon butá pinongin kawasa-Nea, nomia kon dunia pinongin hikmat-Nea, bo nomukat kon ḷangit pinongin pandoi-Nea.

¹³ Pinodoyon kon parenta, nomungkaurdon in tubig kon toḷungayá. Nongkon popod mita in dunia pinoangoi-Nea in goḷom, bo binaḻí-Nea in kilat nonindar kon bonu in uyan, bo pinotabá-Neadon mangoi in tompot nongkon tampat pototagúan-Nea.

¹⁴ Nokoontong kon tua komintan nosadardon in intau, kon sia tua in bodok bo diá kopomomangaḻe. Intau mita mononontaḷ kon buḷawan nooyádon, sin patong berhala inta pinomianea tua in uboḷbí bo diá konyawa.

¹⁵ Berhala mita tatua diá koboḻi, patusbí in singkuḻeon bo poompáanmai. Aka moiangoi in wakutunea mosia in moyopúbí.

¹⁶ Ki Allah i Yakub in diábí notongkai in berhala mita tatua; Sia in momomaḻí kon bayongan in yagi-yagi. Tangoi-Nea in ki Tuhan Inta Totok in mokawasa; Sia in nomiḻídon kon Israel nobaḻí umat-Nea.

Ondok nomuká kon bonu in ḻipú

¹⁷ Intau in Yerusalem, moiko in kinopung! Tuamai in ponoinutdon!

¹⁸ Kon tanaa ki Tuhan in mopogambatdon in bayongan bangusa in Yohuda kon poḷumbúan; moiko komintan in daiton-Neabí rimumudon. Tuata in koyow nongkon i Tuhan.

¹⁹ Intau in Yerusalem nomaḷú, “Kami in sinongkekeban modaḷom bo diádon mopia. Koḻipod in kainamikamai dá roriga tanaa in kobabaanbí nami, naanta yo diábí.

²⁰ Ḷoḷaigan nami nogoguyaat, bo tontogotnea mita in nobontow komintan. Diádon in mokoposindog kon ḷoḷaigan bo mopoḷutud in daingnea mita, popisí in adí mita in minayádon.”

²¹ Akuoi in notubag, “Bodok in itoi mita naton tatua. Mosia in diábí nopoigum in topotundú kon i Tuhan, tuamai in diá in mosia nokodapot kon onu in kinoibog monia, bo kita in noiraritdon magí-mako.

²² Indongogaidon! Oyúon in habar kon bangusa tobatú kon utuan nopomukádon kon doḻiok. Tontaranea in momaḻí kon kotá mita in Yohuda mobaḻí moingongow bo diádon in mogogutun. Ungkú mita in kayuon in mogadopdon kon tua.”

²³ Tuhan, kinotaauanku kon diábí tobatúmai in intau in mokawasa monantú kon ukurnea andeka monantú kon daḷan kobiagannea.

²⁴ Sambokdon in kami o Tuhan, táe dikabí sambokon moiḻiu in konakitnea. Dika doman mohukum kon inami aka Iko koyogot in tumorú, sin notantú bidon kon moyopú in kami komintan.

²⁵ Popotugatdon in torú-Mu kon bangusa mita inta diá mopirisaya kon ini-Mu bo inta doí mosumba kon ini-Mu. Sin mosia in noyopúdon kon umat-Mu komintan bo norimumud kon ḻipú nami.