YEHEZKIEL 32 - Alkitab Singog In Mongondow Masa In Tanaa

Datu in Mesir pinongonginayan kon bangkeḻé

¹ Kon singgai imitánea kon buḷan impuḷú bodoyowá kon taong impuḷú bodoyowá kon pinoḷumbúan kon inami, ki Tuhan in noguman kon inakó,

² “Ei intau ilo-ilow, potoingatdon totok kon i datu in Mesir. Potaau in koyow-Ku tanaa kon inia, ‘Iko in tumon naonda bo singa batánea kon sigad in bangusa mita, táe iko in naonda bo bangkeḻé inta mogutun mako kon tubig. Sioḷmu in mokoḷobog bo mokokotor kon bayongan in ongkag.

³ Kon tungkuḷ in bangusa mita moyosipun, domokon-Ku in iko in landará-Ku, bo pomayá-Kudon mako in bangusa mita tatua mopogambat kon inimu kon toba.

⁴ Pomobak-Ku in iko kon butá bo bayongan in ḷagapan takin bayongan in mahaḷuk kon dunia naa pokikaanan-Kudon kon inimu.

⁵ Bo buḷud mita takin ḷopá mita in puḻingan-Kudon in awakmu inta nobongkogdon tua.

⁶ Dugúmu in potampurangon-Kudon modapot in momuntad kon buḷud mita bo momuḻing kon ongkag mita.

⁷ Kon dodai in yompaton-Ku in iko, koḷoban-Ku in ḷangit bo tundi mita in pokudowon-Ku. Mata in singgai in popoadop-Kudon kon goḷom bo buḷan in diádon monindar.

⁸ Totuu, bayongan in bayag kon ḷangit in piongan-Kubí, bo dunia in baḻíon-Kubí sindip totok. Akuoi, ki Tuhan Inta Totok in moḷantud ain nosingog.

⁹ Kon tungkuḷ in Akuoi nopotaa-taau mako in habar korimumudanmu kon bayongan butá inta diápa kinotaauanmu, mobayong in bangusa in moḻia-ḻiaw in gina.

¹⁰ Totuu, bambingon-Kubí in kedang-Ku bo monaḷow kon inimu. Datu mita bo bangusa mita in mokoontongbí kon onu in pomiaan-Ku kon inimu. Kon dodai intua mourotdon in ondok in mosia bo mogugur sin moondok in matoi.’ ”

¹¹ Ki Tuhan Inta Totok in moḷantud in noguman kon i datu in Mesir, “Kedang i datu in Babel in tonggóon kon inimu.

¹² Tontara mita nongkon bangusa mita inta moḻingá in pokirabutan-Kudon in kedang monia bo monibat kon bayongan in rayatmu. Rayatmu bo bayongan inta kinoibogmu in morimumud komintan.

¹³ Biagmu in sibaton-Ku kon bingkí in ongkag pongonginuman monia. Pinomayá intau andeka bobiagon in diábí moḷobog kon tubig in ongkag tatua.

¹⁴ Dá ongkag mita kon butámu in insilangan-Kudon bo tompiaan-Kudon in koiḻignea. Akuoi, ki Tuhan Inta Totok in moḷantud ain nosingog.

¹⁵ Aka Mesir baḻíon-Kudon padang gurun inta moingongow, bo yompaton-Kudon in bayongan inta nogutun kon tua, yo kotaauandon monia kon Akuoibí in ki Tuhan.

¹⁶ Tompoingat motogat tanaa in mobaḻí dondong kopatoian. Bobay mita nongkon bangusa mita ibanea in mopodondong intua nobaḻí tomponuot nonogumatoi kon Mesir bo bayongan in rayatnea. Akuoi, ki Tuhan Inta Totok moḷantud ain nosingog.”

Dunia in intau minatoi

¹⁷ Kon singgai nogimpuḷú bo ḻima kon buḷan imitánea kon bonu in taong impuḷú bodoyowánea kon sempo in pinoḷumbúan, ki Tuhan in noguman bui kon inakó,

¹⁸ “Ei intau ilo-ilow, ponogumatoidon kon rayat kon Mesir. Pokidiadon in mosia kon dunia in intau minatoi moyotakin in butá mita intau moropot ibanea.

¹⁹ Potaaudon kon i monia, ‘Kainimukamai dá moikobí in moḷuna-ḷunat totok? Moiko in mayábí in dunia in intau minatoi, bo pouḻid kon sigad in intau mita inta diá nonotaau kon i Allah.’

²⁰ Bangusa in Mesir in matoibí moyotakin monia inta minatoi kon bonu in parang. Kedang tobatú ain sinadia moḻimod kon i monia komintan.

²¹ Pahlawan mita inta mongobarani bo intau mita inta noparang dinumotá kon Mesir sinontomu monia kinopia in kinoangoian in intau in Mesir kon dunia in intau minatoi. Norogiow in mosia nanaa, ‘Intau mita inta diá nonotaau kon i Allah tua in minatoidon kon bonu in parang. Tanaa in namangoidon in mosia in naa bo inumuḻid kon naa!’

^22-23 Asyur inumuḻid kon tua, iḻibu in pinoḷobongan kon tontaranea mita. Mosia komintan in minatoidon kon bonu in parang. Pinoḷobongan kon i monia in kon dotá in bonunea totok kon dunia in intau minatoi. Kon tungkuḷ in mosia nobiagpa, nokoondokdon kon dunia.

^24-25 Elam in kon tua doman takin iḻibu in poḷoḷobongan kon tontaranea mita. Diá sinoit, minatoi in mosia komintan kon pinoparangan, bo noponag kon dunia in intau minatoi. Kon tungkuḷ in nobiagpa, mosia in mokoondok, táe tanaa in minatoidon in mosia bo musti mobaba kon oyá moyotakin in intau mita inta ain minatoi kon pinoparangan.

²⁶ Ki Mesekh bo ki Tubal in kon tua, iḻibu in pinoḷobongan kon tontaranea mita monia. Diá sinunat, mosia in minatoi komintan kon pinoparangan. Kon tungkuḷ in mosia nobiagpa, mosia in nokoondok kon dunia.

²⁷ Mosia in nokouḻí kon pinoḷobongan takin ihoromat naonda bo pahlawan dungkuḷmai inta noponag kon dunia in intau minatoi takin kodia-dia in pakakat in parang inta notouḷut. Pahlawan mita tatua in iḷobong takin pinopouḷun kon kedang bo kaḻeaw in kon tudu in dodob. Kon dodai in nobiagpa, pahlawan mita mongotorindog dá nokoondok kon bayongan in intau.

²⁸ Natuata intau in Mesir ḷobongon bo uḻidon kon yuak in intau mita inta diá nonotaau kon i Allah bo minatoi kon pinoparangan.

²⁹ Edom in kon tua takin bayongan in datu bo mongongawasanea. Dungkuḷmai mosia in tontara mita inta mongoropot, táe tanaa mosia in noiboḻingkayang kon dunia in intau minatoi noyotakin in intau mita minatoi ibanea inta diá nonotaau kon i Allah.

³⁰ Bayongan in ki adí ḷoḷaki i datu nongkon utuan in kon tua, natua doman intau mita in Sidon. Dungkuḷmai kawasa monia nokopomuká kon ondok, táe tanaa mosia in pinokopo oyámai bo takin diá sinoit mosia noponag kon dunia in intau minatoi noyotakin in intau mita inta minatoi kon pinoparangan. Kon tua mosia inumuḻid bo nobaba kon dosa takin intau mita inta noponag kon dunia in intau minatoi.

³¹ Aka datu in Mesir takin tontaranea modapotdon kon dunia in intau minatoi bo mokoontong kon bayongan in intau tatua inta ain minatoi kon bonu in parang, mosia in moḻipoidon. Akuoi ki Tuhan Inta Totok in mokawasa ain nosingog.

³² Akuoibí inta nokopopisí kon i datu in Mesir nokopomuká kon ondok kon bayongan in intau inta nobiag, táe sia takin tontaranea in minatoi bo inuḻid noyotakin in intau mita inta diá nonotaau kon i Allah bo minatoi kon bonu in parang. Akuoi ki Tuhan Inta Totok in moḷantud ain nosingog.”