TESALONIKA 1 3 - Alkitab Singog In Mongondow Masa In Tanaa

¹ Kami in diádon mokotahang kon tanob nami kon i monimu, tuamai iraikumai yo maníka umpaka dongkadon akuoi in kon in Atena,

² pogoḷa-goḷatan in potabákupa mangoi kon i monimu in ki utat naton ki Timotius. Sia naa in mogogaid kon oaidan i Allah inta topogaidan nami nopoyaput in Habar Mopia soaḷ ki Kristus. Pinotabá nami in sia mamangoi kon i monimu sinbá motuḷung moginrigon kon gina monimu bo poḷat mononggina bá umuran in moiko mopirisaya kon i Kristus.

³ Bá diá tobatúmai intau in kon sigad monimu in mobaḷui in pirisaya sin mokorasa kon roriga mita naton naa. Kinotaauan bidon monimu kon tua in sinantú bidon i Allah kon i naton.

⁴ Sin kon dodai in kami koyota-yotakinpa monimu, muna bidon pinoguman nami, kon kita in pastibí mokorasa kon roriga. Bo totuu kon nobaḻídon intua komintan; kinotaauan bidon monimu intua.

⁵ Manangka intua pinotabákudon namangoi in ki Timotius sin moibogdon totok in akuoi mokidongog kon habar soaḷ kopopirisaya monimu kon i Kristus. Moḻia-ḻiaw in ginaku sin dikabo kinokawasaandon Ibilis in moiko, sahingga in onu inta siniḷopían nami diádon in baragunanea.

⁶ Táe tanaa, naonda in ki Timotius namangoi nodia in sia kon habar inta mokosanang totok kon gina. Inoumannea kon moiko in totu-totuudon mopirisaya kon i Kristus bo umuran doman mositabian. Inoumannea doman kon umuran kotoropan monimu kon kami naa in intaubí mopia bo moibog doman totok in moiko moyodungkuḷ nami, ná bí doman tua in gina nami kon i monimu.

⁷ Manangka intua utatku mita, umpaka in kami nobiag nosusa bo mororiga, táe nosanangbí totok in gina nami in nokodongog kon habar kon moiko in umuran mopirisaya kon i Kristus,

⁸ habar tatua in nokodugang kon rigon in gina nami, asaḷ bo tantú koroton in sosindog monimu bo umuran motobatú i Tuhan.

⁹ Diádon in poporupaan in sukur nami kon i Allah sin bayongan inta mokosanang kon gina kon tayowon-Nea, lantaran moiko.

¹⁰ Doḷom bo singgai kami in umuran mosambayang sinbá kita in motaaupa moyodungkuḷ moyogintayow mako bo mogintompod kon onu inta paraḷupa pakéon monimu kon mopobayá in pirisaya monimu kon i Kristus.

¹¹ Bo poigumon mako ki Allah, ki Amá naton bo ki Tuhan naton ki Yesus Kristus mobogoi in daḷan kon inami sinbá moyodungkuḷdon bui monimu!

¹² Bo igumon doman mako nami kon i Tuhan bá moiko in umuran mositabian bo oyúon doman in tabi monimu kon tumpaḷa intau, sahingga in tabi monimu in kodugang-kodugangdon ná tabi nami kon i monimu.

¹³ Aka natua yo irigonan i Tuhan in gina monimu, sahingga in modaritdon totok in kobobiag monimu bo diá bidon in inta diá mopia in aidan monimu kon tayowon i Allah, ki Amá naton, kon wakutu in ki Tuhan naton ki Yesus mamangoi bui moyotakin in bayongan intau inta ain nobaḻí umat-Nea.