SURAT I PAULUS KON JAMAAT RUM 6 - Alkitab Singog In Mongondow Masa In Tanaa

Dosa inggamáandon bo mobiagdon motobatú i Kristus

¹ Aka natua, onu in motaau singogon naton? Mustipa doman degá mogaid kon dosa in kita sinbá modugang in tabi i Allah kon i naton?

² Tantú diábí natua! Dosa in diá bidon nongawasa kon i naton, manangka intua kita diá bidon in motaau aka dongka umuran mogaid kon dosa?

³ Bá kotaauan monimu kon wakutu in kita binaptis, kita in notobatú bidon takin i Kristus? Tua in mangaḻenea kon kita in sinobatú domandon takin kinopatoian-Nea.

⁴ Wakutu in kita binaptis, kita in iḷobongdon takin i Kristus bo minatoidon noyotakin-Nea, sinbá ná doman ki Kristus inta ain biniag nongkon kinopatoian-Nea takin kamuliaan i Amá, yo natua doman in kita mokoalami doman kon kobiagan mobagu.

⁵ Aka kita bo ain notobatú i Kristus sin kita ain noyotakin-Nea minatoi, dá kita in motobatúbí doman takin-Nea sin kita in moitakin biagon ná Sia.

⁶ Kinotaauan bidon naton kon tabiat naton saḷaku intau aindon noitakin pinopopakú kon kayu pinoyotaḻempang, sinbá kawasa in awak inta binaradosa naa inggamáandon, sahingga in kita in diádon umuran tonggataan in dosa.

⁷ Sin aka intau bo ain minatoi; yo sia in pilatan bidon kon kawasa in dosa.

⁸ Dá aka kita bo ain minatoi takin i Kristus, yo mopirisayabí in kita kon kita in biagonbí doman moyotakin-Nea.

⁹ Sin kinotaauandon naton kon ki Kristus ain biniag nongkon kinopatoian-Nea bo Sia in diá bidon matoi bui; popatoi in diá bidon mongawasa kon i-Nia.

¹⁰ Sia in minatoi sin popisíbí in dosa intau. Bo tongábí komintan mobaḻí intua. Bo Sia in nobiag in tanaa, nobiagdon sin kopontingan i Allah.

¹¹ Natua doman in moiko, musti monganggap minatoidon kon bonu in dosa bo mobiagdon motompia takin i Allah inta pinongin i Kristus Yesus.

¹² Dika pomayá mako in kobiaganmu inta diá mononoi kon dunia naa in kawasaan dosa, sinbá diádon iko dumudui kon ibognea inta moraat.

¹³ Bo dika domandon posarakan in awakmu kon kawasa in dosa sin pakéonnea mogaid kon inta mongoraat. Táe posarakaidon in awakmu kon i Allah saḷaku intau inta ain pinamping nongkon kawasa in popatoi bo pinobayá in kawasa inta mokobiag. Posarakaidon in awakmu komintan kon i Allah sinbá pakéon mogaid kon onu in kinoibog-Nea.

¹⁴ Dosa in diá bidon mongawasa kon i monimu, sin moiko in diádon nobiag kon bonu in kawasa in hukum agama in Yahudi, táe kon bonu bidon kawasa in totabi Allah.

Aidaidon Onu in kino ibog i Allah

¹⁵ Tanaa, onu degá in simpodnea? Degá motaau in kita in mogaid kon dosa, sin kita in diádon nobiag kon bonu in kawasa in hukum agama Yahudi, táe nobiag bidon kon bonu in kawasa in totabi i Allah? Diábí motaau!

¹⁶ Bá kotaauan monimu, kon aka moiko bo moposarakan in awakmu kon tobatú intau sin mogaid kon onu inta kinoibognea, yo moiko in mobaḻí bidon ata in intau inta dinuduian monimu tatua. Ata in dosa in modia kon i monimu mayá in popatoi, táe aka ata inta motoindudui kon i Allah yo tua in modiabí kon i monimu mayá in kobiagan.

¹⁷ Táe sukurdon kon i Allah! Sin tungkuḷ intua moiko in nobaḻí ki ata in dosa, táe masai naa moiko in motoinduduidon totok kon totundú inta noitutui inta ain inogoi kon i monimu.

¹⁸ Moiko in pinilatandon nongkon kawasa in dosa, bo tanaa ain nobaḻí ata inta mogaid kon onu inta kinoibog i Allah.

¹⁹ Popisí in moiko nobodokpa, dá akuoi in moguman kon contoh tanaa sinbá mogampang komangaḻean monimu. Tungkuḷ intua moiko noposarakan in bayongan awak monimu saḷaku ata in mogaid kon soaḷ mita inta mongoromú bo moraat sin makusud doman moraat. Tuamai in natua doman in masai naa, posarakaidon in bayongan awakmu saḷaku ata mogaid kon inta kinoibog i Allah sin makusud mopia i Allah.

²⁰ Sin wakutu in moiko sinonggata in dosa, yo moiko in diábí kinawasa in ibog i Allah.

²¹ Kon wakutu intua onu in kauntungan nouḻí monimu kon dodai in nogaid kon soaḷ mita inta tanaa mako mooyádon in moiko mogaid? Aid mita tatua in tongábí modia mayá in popatoi!

²² Táe tanaa in moiko ain pinilatan nongkon kawasa in dosa bo nobaḻídon mogogaid mita kon oaidan i Allah. Kauntungannea kon tua moiko in nobiagdon umuran kon i Allah, bo bungainea kon tua in mokouḻí in moiko kon kobiagan inta mopia bo mononoi.

²³ Sin aka bungai in dosa tua in popatoibí, táe kobiagan mopia bo mononoi in moyotakin i Kristus Yesus, Tuhan naton, tua in inogoibí i Allah pinomorosen.