PINOGIAPAN 8 - Alkitab Singog In Mongondow Masa In Tanaa

Pogogukat kon togá

¹ Ki Tuhan noguman kon i Musa,

² “Potaaudon kon i Harun kon dodai in sia mopotudu in togá pitu kon totuduan in togá tatua, musti ukatonnea kopiraan sinbá monimbayag kon dotá in muna in sioḷ in totuduan togá tatua.”

³ Onu in pinoguman i Tuhan inaidan i Harun. Inukatnea in togá mita tatua pinotayow kon sioḷ totuduan in togá.

⁴ Tampat in togá tatua, nodapot kon omonikanea bo bungang mita inta pinoḷambá pinomia nongkon buḷawan inta sinontaḷ, pinodudui kon contoh inta pinoontong i Tuhan kon i Musa.

Intau mita in Lewi binaḻí imang

⁵ Ki Tuhan noguman kon i Musa,

⁶ “Potondídon intau mita in Lewi nongkon sigad in intau mita Israel ibanea bo pogaidaidon kon upacara pondaritan kon i monia,

⁷ nanaa in pogogaid: pisikai in tubig in mosia mobaḻí upacara pondaritan bo pokikarugdon in bayongan bubuḷ kon awak monia bo momatá kon pakeang monia. Tua in aidan monia bá modaritdon in mosia.

⁸ Bo pokigamáaidon in sapi koḷakian tobatú inta batáneapa takin kuruban oḷudon nongkon topong inta binauian in ḷana. Bo iko musti mogamá kon sapi koḷakian tobatú ibanea sin baḻíon kuruban potobut kon dosa.

⁹ Onda intua sipun in bayongan umat Israel bo bayongan intau in Lewi bo simindog kon tayowon in Ḷoḷaigan-Ku.

¹⁰ Umat mita musti mopoukat in ḻima monia kon uḷu in intau mita in Lewi,

¹¹ bo intau mita in Lewi tatua musti posumba i Harun mobaḻí sosumba inta sinantú nongkon intau Israel kon i-Nakó, sinbá mosia in motaau mogaid kon oaidan-Ku.

¹² Bo intau mita in Israel musti mopoukat in ḻima monia kon uḷu in sapi koḷakian doyowa tatua; sapi tobatú in musti posumba mobaḻí kuruban potobut kon dosa, bo sapi inta tobatú in baḻíon kuruban payongon. Upacara tatua in makusudnea in pondaritan kon intau in Lewi.

¹³ Tantúdon kon i-Nakó in intau mita in Lewi bo potabádon in mosia mobantung kon i Harun bo kon i adínea mita.

¹⁴ Upacara tatua in popotondían monimu kon intau mita in Lewi nongkon intau mita in Israel ibanea, sinbá mosia mobaḻí kapunyaan-Ku.

¹⁵ Mopaḷut mako iko momia kon upacara popoabatan kon intau mita in Lewi tatua, yo mosia in motaaudon mogaid kon bonu in Ḷoḷaigan-Ku.

¹⁶ Mosia in binaḻí-Kudon toḻiu in adí guya-guyang Israel; dá mosia tua in sinantúdon kon i-Nakó.

¹⁷ Kon dodai in Akuoi noḻimod kon bayongan adí guya-guyang kon Mesir, yo adí ḷoḷaki guya-guyang kon sigad intau Israel bo bayongan bobiagon inta pinogadí muna tua in binaḻí-Kudon kapunyaan-Ku.

¹⁸ Bo tanaa in nobaḻí toḻiu in bayongan adí guya-guyang in intau Israel, ginamá-Kudon in intau mita in Lewi,

¹⁹ bo intau mita in Lewi tatua ogoi-Kudon kon i Harun bo kon i adínea mita, sinbá motaaudon mogaid mobaḻí toḻiu in intau Israel kon bonu in Ḷoḷaigan-Ku. Bo bá mosia in mopoigum doman kon pongampungan nongkon i-Nakó kon bayongan taḷá in intau Israel sinbá bangusa tatua diá popoumaan in bodito aka mosia mamangoi mokopodiug totok kon tampat inta motusi tatua.”

²⁰ Tuamai ki Musa, ki Harun bo bayongan umat in Israel noposumba in intau in Lewi kon i Tuhan, ná inta ain pinarenta i Tuhan kon i Musa.

²¹ Intau mita in Lewi tatua momia kon upacara pondaritan kon awak bo momatá kon pakeang monia, bo ki Harun moposumba kon i monia mobaḻí oogoi inta ain sinantú kon i Tuhan. Sia in momia doman kon upacara pondaritan kon i monia.

²² Intau in Israel nogaid kon bayongan inta ain pinarenta i Tuhan kon i Musa soaḷ intau in Lewi. Dá intau in Lewi nokouḻídon kon hak mopobayá in oaidan monia kon bonu in Ḷoḷaigan i Tuhan kon bonu in tongganut i Harun bo i adínea mita.

²³ Ki Tuhan noguman kon i Musa,

²⁴ “Bayongan intau in Lewi inta umurdon doyowa nopuḷú boḻima notaong bo namonik, musti mogaid kon oaidan monia kon bonu in Ḷoḷaigan-Ku,

²⁵ bo kon umur ḻima nopuḷúdon notaong sia ḷuatandon kon oaidannea.

²⁶ Mopaḷut mako kon tua sia in motaaudon mobantung kon intau in Lewi ibanea mako inta mogaid kon oaidan monia kon bonu in Ḷoḷaigan-Ku, táe diá bidon in oaidannea inta motantú. Natua in pononantú kon oaidan in intau mita in Lewi.”