PINOGIAPAN 34 - Alkitab Singog In Mongondow Masa In Tanaa

Sigad mita in butá tatua

¹ Ki Tuhan nobogoi kon i Musa in

² parenta mita tanaa kon bangusa Israel, “Topiḻikpa bo moiko tumuot kon butá in Kanaan, butá inta ogoi-Ku kon i monimu mobaḻí tonsilai. Naa in sigad in butá mita tatua.

³ Kon toḷatan, sigadnea pangkoion kon padang gurun Zin tumaḻib mongin Edom. Kon dotá in pomukaan sigadnea pinangkoi kon popod in toḷatan Laut Mati,

⁴ momurow ná toḷatan mopobayá in Daḷan Akrabim bo turus kon Zin nodapot kon Kades-barnea kon toḷatan. Nongkon tua momurow mopobayá in barat laut modapot kon Hazar-Adar, bo turus kon Azmon.

⁵ Kon tua momurow mopobayá ná ḷopá kon pinosigadan in Mesir bo nodapot kon Dagat Toyuak.

⁶ Dagat Toyuak in nobaḻí sigad in butámu kon dotá in toyopan.

⁷ Kon utuan, sigadnea pinangkoi kon Dagat Toyuak mopobayá in Buḷud in Hor

⁸ bo nongkon tua mopobayá in Daḷan Hamat, bo tumurus mayá in Zedad

⁹ bo mopobayá ná Zipron bo modapot kon Hazar-Enan.

¹⁰ Kon pomukaan, sigadnea pinangkoi kon Hazar-Enan mopobayá ná Sepam.

¹¹ Nongkon tua mosiḻig kon Ribla kon dotá in pomukaan kon Ain, bo tumurus kon buḷud mita kon pintad in pomukaan kon Danow in Galilea,

¹² bo mopobayá ná toḷatan kinoouput in Ongkag in Yordan nodapot kon Laut Mati. Tuata in butámu pinodudui kon sigadnea mita inta noiḻibu.”

¹³ Ki Musa noguman kon bangusa Israel, “Tuata in butá inta bain tarimaanmu podudui in undi, butá inta podudui in parenta i Tuhan in musti silaion kon siow bo tobotak in suku bangusa Israel.

¹⁴ Suku mita i Ruben bo i Gad takin tongobotak in suku Manasye ain notarima kon tonsilai monia, bo butá tatua ain doman sinilai kon koluarga mita monia.

¹⁵ Butá tonsilai monia tatua kon dotá in pomukaan kon Ongkag in Yordan, kon diug in kotá in Yerikho.”

Itoi mita inta pinoki silaian in butá tatua

¹⁶ Ki Tuhan noguman kon i Musa,

¹⁷ “Inta musti mosilai kon butá tatua kon sigad monimu nion in ki Imang Eleazar, bo ki Yosua adí i Nun.

¹⁸ Tundúdon doman in itoi tobatú nongkon batúan suku sin mobantung kon i Eleazar bo kon i Yosua sin mosilai kon butá tatua.”

^19-28 Naa in tangoi in intau mita tatua: Suku Itoi Yuda Kaleb adí i Yepune Simeon Samuel adí i Amihud Benyamin Elidad adí i Kislon Dan Buki adí i Yogli Manasye Haniel adí i Epod Epraim Kemuel adí i Siptan Zebulon Elisapan adí i Parnah Isakhar Paltiel adí i Azan Asyer Ahihud adí i Selomi Naptali Pedael adí i Amihud

Suku Itoi

²⁹ Tuata in intau mita inta pinoki silaian i Tuhan in butá tonsilai kon bangusa in Israel kon butá in Kanaan.