OUMAN IN RASUL MITA 3 - Alkitab Singog In Mongondow Masa In Tanaa

Intau inta ḻempeng inundaman

¹ Kon singgai tobatú wakutu in orasdon posambayangan sin aindon jam nogintoḷu ḷoḷabungnea, ki Petrus bo ki Yohanes in minayá sinumuot kon Baḷoi Tuhan.

² Kon tua oyúon in tobatú ḷoḷaki inta ḻempeng nongkon noilahirpamai. Pomuḷoi in singgai umuran in sia buḻigan intau pobayá in diugmai in ngara in Baḷoi Tuhan, ngara tatua sinangoian “Ngara mogaga”. sia in dinia minayá intua sin mopoigum in totabi kon intau mita inta tumuot kon Baḷoi Tuhan tatua.

³ Naonda in intau tatua nokoontong kon i Petrus bo kon i Yohanes tumuot kon Baḷoi Tuhan tua, sia in nokikotabi kon i nayadua tua.

⁴ Dá inindoian nayadua tua bo noguman in ki Petrus kon inia, “Indoiaika in kami!”

⁵ Dá inindoian doman in intau tatua in mosia takin nopoigum in totabi sinbá ogoian monia in onukadon.

⁶ Táe ki Petrus in noguman kon inia, “Aka doit yo diábí in kon inakó naa, táe onu in kon inakó ogoikubí kon inimu: Podoyon kon tangoi i Yesus Kristus intau in Nazaret tatua, mokobayádon in iko!”

⁷ Bo kinadaiannea in ḻima koḷanan in intau ḻempeng tatua bo sinuḷungan pinosindog. Dá kon dodaipa doman in tatua bo norigondon in sioḷ bo gongguyamú in sioḷnea.

⁸ Bo daḻí in sia iḷumanduk sinimindog bo poḷat minayá dinumudui kon i monia sinumuot kon Baḷoi Tuhan tatua. Mayá sindaḷan ḷumansik in sia bo modayow kon i Allah.

⁹ Komintan intau kon tua in nokoontong kon inia nokobayádon bo poḷat nodayow kon i Allah.

¹⁰ Bo kinotaauandon monia kon intau tatua inta biasamai ḻimitú kon ngara in Baḷoi Tuhan bo mopoigumai in totabi kon intau inta tumuot kon Baḷoi Tuhan tatua. Totok nongoherang in mosia bo nongoitongau in nokoontong kon onu inta ain nobaḻí kon inia tua.

Hutuba i Petrus kon bonu in Baḷoi Tuhan

¹¹ Bo intau tatua in umuran dumudu-dudui mako kon i Petrus bo kon i Yohanes. Bo wakutu in ḻimitúdon mako kon tampat inta sinangoi “Tampat Pobobarasanangan i Salomo”. totokdon in taya toḷu tua angoion ḻipungon in bayongan intau sin mopia totok in gina monia.

¹² Naonda in ki Petrus nokoontong kon intau mobayong tatua, sia in nosingog kon i monia nanaa, “Ei intau mita in Israel nongonu sin moiko in moherangbí in mokoontong kon tua komintan? Degá kai monimu kamai dá intau tanaa in nokobayá popisíbí in kawasa bo kotoindudui nami kon i Allah?

¹³ Ki Allah inta sinumba i Abraham, i Ishak, i Yakub bo in mogoguyang naton tua in ki Allahbí inta nopomulia kon simpaḷ-Nea inta ki Yesus Kristus. Ki Yesus tua inta pinosarakan bo inta diá sinarima monimu kon tayowon i Pilatus umpakabí kai Pilatus in buḻiandon in Sia.

¹⁴ Sia tua inta mokudus bo inta mobanar táe moiko in doí notarima kon i-Nia sin intaubí moḷoḻimod in kinoibog monimu buḻian saḷaku tombuinag kon i monimu.

¹⁵ Moiko in noḻimodon kon i-Nia inta pangkoi in kobiagan in bayongan intau, táe bui bo biniag i Allah in Sia nongkon sigad in intau minatoi. Bo kami naa in nokoontong tontaní kon tua komintan.

¹⁶ Bo popisí in intau tanaa nopirisaya kon tangoi i Yesus dá tuata in nokoroton kon intau inta inontong monimu tanaa. Popisí in intau tanaa nopirisaya kon i Yesus dá nosehatdon bui in sia kon tayowon monimu komintan.

¹⁷ Utat mita! Tanaa in kinotaauankudon kon onu inta inaidan monimu bo in itoimu mita kon i Yesus popisíbí in diá kinotaauan monimu in onu inta pinomia monimu tua.

¹⁸ Táe natuabí in aid i Allah mogintompod kon onu inta ain pinotaau-Nea muna pinongin nabi-Nea mita inta kai-Nia, ‘Mopoposaḷamat inta pinotabá-Nea in musti mokorasa kon roriga.’

¹⁹ Tuamai pokoratakdon kon raian bo pogogaidon in mogaid kon dosa mita, sinbá ampungandon in dosamu tatua.

²⁰ Bo bá ogoian i Tuhan in kasanangan in moiko, bo potabá-Nea in ki Yesus mamangoi kon i monimu, sin nongkon pinomangkoianpabímai, Siabí tua inta sinantú i Allah moposaḷamat kon i monimu.

²¹ Sia in mustipabí mogutun kon soroga modapot in ki Allah monoimbagu kon bayongan yagi-yagi ná inta ain pinoguman-Nea kon nabi-Nea mita tungkuḷ intua.

²² Ki Musa nokoimontan doman in noguman nanaa, ‘Ki Tuhan, ki Allahmu in nopotabá kon inimu kon tobatú nabi inta nongkon butá monimu tontaní, naonda bo nopotabá in Sia kon inakó.

²³ Bo intau inta doí mokidongog kon onu in poguman in nabi mita tatua, tokoputúan kon sigad in umat mita i Allah.’

²⁴ Bayongan in nabi inta nokoimontandon in nopoyaput in habar nongkon i Allah, pinangkoipamai nongkon i Samuel bo nabi mita inta namangoi noiduduimai kon inia, komintan doman nongonguman masa in tanaa.

²⁵ Moikodon inta motarima kon onu inta ain pinoguman mita in nabi tungkuḷ intua bo moiko in mokouḻí kon silai inta ain pinodandi i Allah kon mogoguyang naton, ná inta ain pinoguman-Nea kon i Abraham nanaa, ‘Popisí in buímu dá bayongan in intau kon dunia in barakatan.’

²⁶ Tuamai in ki Allah nomiḻí kon simpaḷ-Nea, bo nopotabá kon i-Nia namangoi muna kon i monimu, sinbá Sia in momarakat kon i monimu. Nanaa in pomomarakat-Nea kon i monimu, pogogai-Neadon in moiko komintan in mogaid kon moraat ná inta biasamai aidan monimu.”