MATIUS 20 - Alkitab Singog In Mongondow Masa In Tanaa

Poumpamaan intau sinondanan mogaid kon gobá in anggur

¹ “Pomomarenta i Allah naonda bo poumpamaan tanaa: Oyúon ki togi gobá, subupa sia aindon iḷumuai bo notayak kon intau mita inta pokiaidan kon gobá in anggurnea.

² Naonda in nositantúandon kon tosinggai uboḻianan todinar, pinotabáneadon in mosia tua minayá nogaid kon gobánea.

³ Naonda in degá jam insiowmaidon doḷo-doḷom, sia iḷumuai bui bo nokoontong kon intau ibanea inta tongá maya-mayá mako kon pasar sin diá kooaidan.

⁴ Dá sia in noguman kon i monia, ‘Bayádon in moiko bo pogaid kon gobá in anggurku, bain uboḻianku in moiko, podudui onu in kon ibogku ogoi kon inimu.’ Bo mosia tua in minayá doman bo nogaid.

⁵ Degá noutumaidon in singgai bo kon jam nogintoḷu moḷoḷabung iḷumuai bui in sia bo nogaid kon ná inta muna inaidannea.

⁶ Bo naonda in moḷoḷabungdon totok, sia iḷumuai bui bo noyodungkuḷ doman in intau ibanea. Bo sia in noḻibó kon i monia, ‘Nongonu sin tumongo singgai naa moiko in tongábí modondaḷoi magí-mako?’

⁷ Mosia in notubag kon inia, ‘Kakaa diá onda intau mogoiní kon inami mogaid.’ Dá sia in noguman doman kon i monia, ‘bayádon moiko pogaid kon gobá in anggurku.’

⁸ Naonda in nodoḷomdon, ki togi gobá tatua in noguman kon moḷoḷukad kon gobánea, ‘Oinídon in intau mita inta nogaid tatua sin uboḻiankudon in pinogaidan monia, pangkoidon kon i monia inta nogaid tumi totok nodapot inta nogaid noiuna doman totok.’

⁹ Bo namangoidon in mosia inta nogaid degá mulai jam ḻimamai ḷoḷabungnea, pomuḷoi intau inuboḻian in todinar.

¹⁰ Onda intua namangoidon doman in mosia inta muna sinumuot nogaid. Kai monia kamai dá mosia in mokouḻíbí kon moiḻiu nongkon imonia tua. Táe naonda in sinarima monia yo naanta tumpaḷabí doman tumongo dinar.

¹¹ Naonda in mosia notarima kon tua, mosia nosingo-singogan kon i togi gobá

¹² kai monia: ‘Mosia inta sinumuot pangabisan inta nogaid tongá tojam pinotongkaimu doman kon inami inta nogaid irumoriga tosinggai naa, bo nonahang kon patú in singgai!’

¹³ Ki tuang tatua in notubag kon tobatú intau inta kon sigad monia tua, ‘Utat, akuoi in diábí nonguboḷ kon inimu. Kita in munadon nositantúan kon tosinggai uboḻian todinar?

¹⁴ Gamádon silaimu bo bayádon. Sin akuoi in mobogoi doman kon intau inta nogaid noitontumi potongkaion kon i monimu.

¹⁵ Degá diá motaau in akuoi in mopomaké in kapunyaanku podudui kon onu in koibogku? Andeka moyaat degá in ginamu, aka akuoi mogaid kon inta mopia kon intau ibanea?’ ”

¹⁶ Bo ki Yesus in noguman, “Natuabí in mobaḻí, intau inta noitontumi mobaḻí moiuna bo intau inta noiuna in mobaḻí moitontumi.”

Kon intoḷuneadon ki Yesus nopotaau in kopatoian-Nea

¹⁷ Naonda in ki Yesus nopobayádon in Yerusalem. Sia in nogoiní kon murí-Nea inta mopuḷú bodoyowá bo minayá sinumontaní. Onda intua Sia in noguman kon i monia wakutu in mosia kon binayáanpa,

¹⁸ “Indongogai! Tanaa mako kita mayá in Yerusalem. Kon tua Adí Intau poposarakandon kon imang mita itoi bo kon mototundú mita kon agama. Bo mosia i mopoḷabú in hukuman matoi kon i Adí Intau,

¹⁹ moiduduimai kon tua mosia moposarakan kon i-Nia kon intau mita inta diá nonotaau kon i Allah. Sinbá poyambáan monia in Sia, rorigaan, bodongka popopakú kon kayu pinoyotaḻempang. Táe kon singgai intoḷunea biagondon bui in Sia.”

Oigum i iná i Yakobus bo i Yohanes

²⁰ Bo ki iná in adí mita i Zebedeus takin ki adínea mita tua namangoi kon i Yesus, bo sinumungkud kon tayowon-Nea sin oyúon poigumon monia kon i-Nia.

²¹ Ki Yesus in noḻibó, “Onu iná in koibogmu?” Tubagnea, “Akuoi mopoigum sinbá ki adíku taya dua naa in motaau ḻimitú moyotakin-Mu kon bonu in dodatuan-Mu. Tobatú in kon dotá in koḷanan, bo tobatú in kon dotá in koḷoigi-Mu.”

²² Táe ki Yesus in notubag kon i-Nia, “Diábí kinotaauan monimu, onu in inigum monimu. Degá mokosanggup in moiko in monginum kon palo in roriga inta musti inumon-Ku?” Dá mosia in notubag kon i-Nia, “Mokosanggup in kami”.

²³ Ki Yesus in noguman kon i monia, “Roriga-Ku memang inumonbí monimu, táe aka monantú ḻimitú kon dotá in koḷanan-Ku andeka kon dotá in koḷoigi-Ku, diábí in hak-Ku mobogoi. Sin tua in ogoibí kon intau mita inta aindon pinoposadiaan i Amá-Ku.”

²⁴ Nokodongogmai kon tua murí-Nea mopuḷú sinumorú kon i nayadua mogutat tatua.

²⁵ Táe ki Yesus in nogoiní kon i monia bo noguman, “Indongogaipa in singog-Ku naa aka pomarenta mita in dunia naa inta diá nonotaau kon i Allah nomarenta kon rayatnea takin momakisa totok bo intau mita moḷoben mopobayá in oaidan monia poḷat mondorot doman kon intau mita.

²⁶ Aka moiko yo diábí motaau natua. Ki ine in moibog mobaḻí moḷoben kon sigad monimu, yo sia in musti mobaḻí bobantungmu.

²⁷ Bo ki ine in moibog moiuna totok kon sigad monimu, yo sia in musti mobaḻí doman bobantungmu.

²⁸ Ná ki Adí Intau namangoi deemanbí mokibantung, táe mamangoibí mobantung bo mobogoi in nyawa-Nea potobut kon dosa in intau mobarong.”

Ki Yesus nongundam kon intau bilog doyowa

²⁹ Bo naonda in ki Yesus bo murí-Nea mita iḷumuai nongkon Yerikho, nobarong intau in dinumudui kon i-Nia.

³⁰ Kon daḷan oyúon intau bilog doyowa iḻimitú mako kon bingkí in daḷan. Dinongog monia kon ki Yesus in noitaḻib, dá taya dua nomaḷú, kai monia: “Tuhan, Adí i Daud, kotabipa in kami naa!”

³¹ Táe intau moantó tatua in nongampag kon i monia, sinbá mosia in kibio-biómaidon, táe tongábí mokodugang kon ropot monia momaḷú, “Tuhan, Adí i Daud, kotabipa in kami!”

³² Ki Yesus sinumogon bo nogoiní kon i nayadua, bo noḻibó, “Onu in kon ibog aidan-Ku kon i monimu?”

³³ Tubag monia, “Tuhan, undamaidon in mata nami sinbá mokoindoidon!”

³⁴ Bo noḻiaidon in gina i Yesus sin notabi, dá iyapu-Nea in mata monia. Bo kon dodaipa doman tatua bo nokoindoi bo poḷat in mosia dinumudui kon i Yesus.