MARKUS 6 - Alkitab Singog In Mongondow Masa In Tanaa

Ki Yesus diá sinarima kon Nazaret

¹ Nongkon tampat tatua, ki Yesus bo murí-Nea mita minayádon in ḻipú-Nea.

² Kon singgai in Sabat Sia in nomangkoidon nobogoi in topotundú kon bonu in baḷoi pososambayangan. Nobayong intau kon tua. Kon dodai in mosia nokodongog kon totundú-Nea tua, noherang totok in mosia. Mosia in noguman, “Kon onda in kinouḻían intau tanaa kon bayongan tua? Kabijaksanaan naonda in kon i-Nia nion? Naondabí sin motaaubí in Sia mogaid kon inta mokoherang?

³ Deemanbí Sia naa inta ki Adí i bas bo i Maria, bo ki utatnea in ki Yakobus, ki Yoses, ki Yudas bo ki Simon? Oo, sedang bo ki utat-Nea mita bobay nogutun doman kon naa.” Tuamai diá sinarima monia in Sia.

⁴ Dá ki Yesus in noguman kon i monia, nanaa, “Tobatú nabi in horomatonbí kon ondakabí, koḻikudbí in koḻipúnea tontaní, bo kon yua-yuak in ginaḷum bo koluarganea.”

⁵ Kon tua diá tobatúmai inaidan-Nea in mokoherang, koḻikud in nomarakat kon i monia inta nongotakit bo mosia inta notakit in nongopia.

⁶ Ki Yesus noherang sin mosia in diá mopirisaya. Onda intua ki Yesus nopobayá in ḻipu-ḻipúannea inta nodiug kon tua, bo nobogoi in topotundú.

Ki Yesus nopotabá kon murí-Nea mopuḷú bodoyowá

⁷ Inoiní-Nea in murí mopuḷú bodoyowá bo pinotabá tumododoyawa, bo mosia in inogoian-Nea in kawasa moguntun kon dimukud mita moraat.

⁸ Naa in koyownea kon i monia, “Donaai modia kon onu bo onu in kon bonu in bobayáanmu, koḻikud in tungkud. Donaai modia kon baḷun andeka botutu in sumbangan ande doit.

⁹ Pogisapatubí táe donaai modia kon ḷambung doyowa no par.”

¹⁰ Ki Yesus in noguman doman, “Aka moiko tarimaan kon tobatú baḷoi, yo pogutun kon tua modapot in moiko mobuatdon bui nongkon kotá tatua.

¹¹ Táe aka moiko bo moibayá in tobatú tampat, bo intau mita kon tua doí motarima bo doí mokidongog kon i monimu, yo taḷaaidon in tampat tatua. Bo topiraidon ḷobud nongkon sioḷmu saḷaku tompoingat kon i monia!”

¹² Dá minayádon in murí-Nea mopuḷú bodoyowá tatua. Mosia in minayá nopotaa-taau mako in habar, kon intau in musti mogogaidon in mogaid kon dosa mita.

¹³ Murí mita i Yesus tatua in noguntun kon mobayong in dimukud moraat, mosia nopoḻepo in ḷana Zaitun kon intau motakit bo nopia doman in intau mototakit tua.

Kinopatoian i Yohanes Mobobaptis

¹⁴ Habar mita soaḷ bayongan inta nobaḻí tua noiyaput domandon kon i Datu Herodes, sin tangoi i Yesus kinotaauandon totok in intau kon ondakadon. Oyúon in noguman, “Ki Yohanes Mobobaptis in nobiagdon bui! Tuamai oyúon in kawasa-Nea mogaid kon inta mokoherang.”

¹⁵ Táe oyúon doman intau ibanea in noguman, “Sia nion ki Elia.” Oyúon in noguman, “Sia tua in tobatú nabi naonda bo tobatú nabi mita tungkuḷ intua.”

¹⁶ Wakutu in kinodongogan i Herodes soaḷ tatua, sia in noguman, “Pasti Sia naa in ki Yohanes Mobobaptis inta ain pinoki ingguḷuku. Buidon in sia nobiag!”

¹⁷ Sin kon wakutu in diápa intua, ki Herodes ain nopotabá kon intau modomok kon i Yohanes, bo bonuon kon ponjara. Pinonjara i Herodes in ki Yohanes, sin popisí in nonoboḷow kon inia soaḷ mononibuḷoi kon i Herodias inta ki buḷoi i Pilipus ki utatnea tontaní,

¹⁸ Ki Yohanes in nopobui-buimai noguman kon i Herodes nanaa, “Diábí motaau iko in mononibuḷoi kon i buḷoi i utatmu tua!”

¹⁹ Manangka intua ki Herodias umuran notagú kon yaat in ginanea kon i Yohanes, dapot ibogonnea ki Yohanes in ḻimodon, táe diánea kino aidan sin umuran ḷamboian i Herodes.

²⁰ Sin kinotaauan i Herodes kon ki Yohanes tua in totabá mopia i Allah dá mobangkaḷ in sia. Manangka intua pinoki ḷukadnea totok in ki Yohanes kon bonu in ponjara. Bo aka mosingog in ki Yohanes yo moibogbí in ki Herodes mokidongog kon singognea, umpakabí moḻia-ḻiaw totok in ginanea in mokodongog.

²¹ Pangabisannea ki Herodias nokouḻí kon kasampatan kon dodai in kinotompodan umur i Herodes. Dodai intua ki Herodes nogaid kon rame kon i monia inta nokadai kon jabatan mongoḷantud kon dodatuan, mosia inta porwira bo itoi mita in ḻipú in Galilea.

²² Kon rame tatua ki adí bobay i Herodias nomanari bo manarinea tatua nokosanang totok kon gina i Herodes bo kon mokokiangoinea mita. Dá ki Herodes in noḻibó kon adí bobay tatua, “Onu in kon ibogmu, yo igumdon. Ogoikubí kon inimu!”

²³ Bo ki Herodes nodandi kon adí tatua poḷat nongibot, kainia, “Onukabí in igumonmu yo ogoikubí, modapotkabí in tobotak in dodatuanku tanaa!”

²⁴ Dá adí bobay tatua iḷumuai bo noḻibó kon i inánea, “Iná, onu degá in mopia poigumonku?” Guman i inánea, “Igumdon uḷu i Yohanes Mobobaptis.”

²⁵ Adí bobay tatua baḷú sinumuot bo minayá kon tayowon i Herodes bo noguman, “Igumonku in uḷu i Yohanes Mobobaptis tuduon kon baki, tanaadon mako bo ogoi kon inakó!”

²⁶ Nokodongogmai kon oigum tatua, norobonoḷ in gina i Herodes. Táe musti tarimaannea intua sin nongibotdon in sia kon tayowon in mokokiangoinea.

²⁷ Dá ḷagineadon pinotabá in tobatú pongawalnea minayá nogamá kon uḷu i Yohanes Mobobaptis. Pongawalnea tatua minayá in ponjara bo nongingguḷu kon i Yohanes.

²⁸ Uḷu i Yohanes tatua sinudunea kon baki bo dinia inogoi kon adí bobay tatua, onda intua inogoi i adínea bobay tatua kon i inánea.

²⁹ Naonda in dinongog in murí mita i Yohanes in soaḷ tatua, binayá ginamá monia in awak i Yohanes bo iḷobong.

Ki Yesus nopokaan in ḻima noribu intau

³⁰ Rasul mita inta pinotabá i Yesus in nobuidon mangoi, mosia in noyotakindon bui i Yesus. Bo inouman monia kon i Yesus in bayongan inta inaidan bo sinundú monia.

³¹ Mobayong totok intau inta mamangoi, inta mobui, sahingga in diádon mokopongaan in ki Yesus bo murí-Nea mita. Dá ki Yesus noguman kon murí-Nea mita, “Koḻigai, kita mayá in tampat inta moingongow, tampat inta motaau tontanían naton bo pogogaian monimu motoyong.”

³² Dá sinumakoi kon uangga in mosia bo minayá in tampat inta noingongow.

³³ Táe nobayong intau in nokoontong kon binayáan monia bo kinotaauan doman monia in bayáan. Dá bayongan in intau kon kotá iḻimikat in minayá nongin toba bo inumuna kon i Yesus bo murí-Nea mita tua.

³⁴ Naonda in tubu monia, nobayong totok in intau inontong i Yesus kon tua. Dá totokdon inangoian tabi in Sia kon i monia, sin mosia tua naonda bo domba inta diá kogombala. Bo nomangkoidon in Sia nopoyaput in totundú kon i monia kon mobayong in soaḷ.

³⁵ Naonda in ḷoḷabungneadon, murí-Nea mita in noguman, “Pak Guru, motoyongdon modoḷom in naa bo tampat tanaa noitontaní.

³⁶ Dá mopia-piabí kon potabádon in intau mita tanion mayá sinbá motaaupa in mosia motaḷui kon kaanon kon ḻipú mita inta nodiugmai kon naa.”

³⁷ Táe ki Yesus in noguman, “Mustibí moiko in mopokaan kon i monia.” Dá murí-Nea mita in noguman kon i Yesus, “Musti degá in kami mayá motaḷui kon roti boḻi in doyowa nogatut doit saḷaka sin pokaan kon intau mita tanaa?”

³⁸ Dá ki Yesus in noḻibó kon i monia, “Tongonu in roti nion kon i monimu? Bayáka indoiai.” Naonda inindoian monia, kai monia, “Ḻimapa in roti bo toyá doyowa doman nobungá.”

³⁹ Bo pinoki ḻitúan i Yesus in bayongan intau tatua kon butá inta oyúon bonok. Mosia kinolo-kolompó.

⁴⁰ Dá mosia iḻimitú doman sinumompia kon kolompónea. Oyúon mogatut in tokolompok, bo oyúon doman ḻima nopuḷú.

⁴¹ Onda intua ki Yesus nogamá kon roti ḻima tatua takin toyá doyowa, bo iḷumangag kon ḷangit nopoyaput in sukur kon i Allah. Nopaḷut mako kon tua, binosi-bonsig-Nea in roti tatua bo pinoki silai kon intau mita tatua. Ná doman tua in toyá doyowa tatua sinila-silai doman mako kon i monia komintan.

⁴² Komintan nongaan nobotug in mosia.

⁴³ Onda intua sinipun in murí mita i Yesus in kiagat in kaanon tatua, nosipun magí mopuḷúpa bodoyowá nokompé in nopuḻing.

⁴⁴ Ḷoḷaki inta noitakin nongaan kon roti tatua in degá ḻimamai noribu in kobayongnea.

Ki Yesus minaya-mayá kon tudu in tubig

⁴⁵ Nopaḷut mako kon tua ḷagidon pinotabá i Yesus in murí-Nea mita sinumakoi kon uangga bo umunadon kon i-Nia. Mosia pinotabá minayá in Betsaida inta kon ḷoḷan mako in danow, onda intua pinoki pobuian-Neadon in intau moantó tatua.

⁴⁶ Naonda in mosia minayádon, ki Yesus notakod kon buḷud bo nosambayang.

⁴⁷ Wakutu in nodoḷomdon, uangga inta sinakoian in murí mita i Yesus kon yua-yuakdon in danow, táe ki Yesus in kon tobapabí.

⁴⁸ Indoian-Nea mako moyoyigadon totok monia in mobotoi sin mosia noyogintontomu in tompot. Tuamai degá kon sigadmai in jam nogintoḷu bo jam noginggonom modiug mobayag namangoi in Sia kon i monia, táe minaya-mayábí in Sia kon tudu in tubig. Bo Sia kinumudung minayá naonda bo taḻibannea i mosia.

⁴⁹ Kon dodai in inontong monia in Sia minayá kon tudu in tubig, sinangka monia in dimbuḷóbí,

⁵⁰ dá nomaḷú in mosia sin noondok. Mosia komintan nokoontong kon i-Nia bo totok in noitaḻikokog. Táe baḷú in ki Yesus noguman kon i monia, “Pokoonow! Ki Yesusbí in Akuoi. Donaai moondok!”

⁵¹ Bo sinumakoidon in ki Yesus kon uangga, bo tompot nooḷádon. Noherang totok in murí-Nea mita tatua.

⁵² Inta mokoherang inta nobaḻí kon soaḷ roti ḻima tatua diápa doman kinomangaḻean monia. Moyoyiga totok monia raion.

Ki Yesus nongundam kon intau mita notakit kon Genesaret

⁵³ Naonda in noiyaput kon ḷoḷan in danow, mosia in sinumubu kon pintad in Genesaret.

⁵⁴ Naonda in mosia noponag kon uangga, inontong intau mita kon tua, kon ki Yesusbí intua.

⁵⁵ Dá bayongan in intau kon wilayah tatua noriba-ribatukan tumakin magí-mako, bo modia kon intau mita motakit poangoi kon i Yesus takin boḷad pososiugannea. Aka dongogon monia in ki Yesus kon tobatú tampat, dá diaan doman monia pobayá intua intau motakit.

⁵⁶ Kon ondakabí in bayáan i Yesus, kon ḻipú, kon kotá ande kon desa, intau mita in umuranbí doman mopodondon mangoi in intau mita mongotakit. Intau mita motakit tatua uḻidon monia kon tampat moḷuas. Bo totok in poigumon monia kompé intau mita motakit tatua ogoi moḻiai kon jubah i Yesus, umpakabí tongá ubungnea. Komintan intau inta noḻiai nongopia.