KORINTUS 2 8 - Alkitab Singog In Mongondow Masa In Tanaa

Doit sumbangan nongkon intau mita Keresten

¹ Utat mita, ibogon nami in kotaauan doman monimu naonda in kototabi i Allah kon jamaat mita inta kon Makedonia.

² Umpakabí mosia in kinoantugan in totungkuḷ inta totok in mobogat. Táe gina monia in tantúbí noḷunganga, sin umpaka kon bonu in roriga táe moibogpabí doman in mosia nobogoi in sumbangan pinotuḷung kon intau ibanea umpaka mosia totok doman in nobiag nobogá.

³ Mosia in nobogoi podudui in komampuan monia, sedang bo noiḻiubí totok kon komampuan monia. Tua in ibogbí monia tontaní,

⁴ mosiabí tontaní in nopoigum totok kon inami sinbá ogoian doman in kasampatan in mosia motuḷung kon umat mita i Allah kon Yudea.

⁵ Bo mosia ain nobogoi kon noiḻiu totok kon onu inta sinakuser nami. Muna-munamai mosia in noposarakan in awak monia kon i Allah, onda intua kon i nami, podudui kon inta kinoibog i Allah.

⁶ Tuamai kami in umuran moguman kon i Titus – inta ain nomangkoi kon oaidan tanaa – sinbá ingguputannea in oaidan mopia tanaa kon sigad monimu doman.

⁷ Kon bayongan in yagi-yagi: Moiko nion in noiḻiudon totok kon soaḷ pirisaya, soaḷ pororai, kon soaḷ pongotahuan, kon bayongan in yagi-yagi oaidan, bo kon soaḷ kototabi monimu kon inami. Tuamai poigumonku doman mako sinbá moiko moiḻiu doman kon bayongan oaidan inta mopia tanaa.

⁸ Naa in potaauku kon i monimu deemanbí saḷaku parenta. Táe moponorop kon nobayongdon totok intau moramuji motuḷung kon tumpaḷa intau, tuamai moibog doman in akuoi monotaau mongo nodapot domandon onda in tabi monimu kon tumpaḷa intau.

⁹ Sin moiko in totokdon in nonotaau kon kita in totokbí in kinotabi i Yesus Kristus, Tuhan naton. Sia in nooyúonbí, táe sinumon intau bogá sin lantaranbí moiko, sinbá moiko in mobaḻí mooyúon.

¹⁰ Aka podudui in raianku, yo noitutui bidon totok aka moiko bo moginḷapat kon onu inta ain pinangkoi monimu taong inta nopaḷutmai naa. Sin moikobí inta muna-munamai norai bo nomangkoi kon oaidan tanaa.

¹¹ Dá tanaa, iḷapataidon in onu inta ain pinangkoi monimu tua. Aidai intua podudui in ibog monimu, táe podoyon domandon kon komampuan monimu.

¹² Aka gina monimu bo motuḻidbí in mobogoi, dá tarimaanbí i Allah onu inta inogoi monimu tua, asaḷ bo onu inta inogoi monimu tua, pinodoyon kon onu inta oyúon kon i monimu, deemanbí pinodoyon kon onu inta diá in kon i monimu.

^13-14 Moiko inogoian in tanggung jawab tanaa deemanbí makusudku kon bá intau ibanea moiḷagui kon tanggung jawab monia, táe bá tumpaḷa mokorasa. Tuamai pogumankudon in tanaa, ki ine in kon sigad monimu in noiḻiu, yo sia in motaau mogintompod kon inta nogaatpa. Sinbá aka kon singgai moiduduimai, oyúonka in nogaatpa kon i monimu bo kon i monia in noiḻiu, yo bain mosia in mogintompod kon inta nogaatpa kon i monimu, sinbá motongkai.

¹⁵ Sin kon Buk Motusi ain pinais nanaa, “Intau inta mosipun kon mobarong, diábí doman moiḻiu, bo intau inta mosipun kon topiḻik, diábí doman inta kodaitan.”

Ki Titus bo yobayatnea mita inta pinotabá noyotakinnea

¹⁶ Sukurdon mako kon i Allah, sin ki Titus in pinoporajing-Neapa naonda bo kami inta umuran noibog notuḷung kon i monimu!

¹⁷ Sia in diábí tongá sakadar nomaḷut kon onu inta pinoigum nami, táe totu-totuubí noibog notuḷung kon i monimu noidapot in sia tontaní in namangoi kon i monimu.

¹⁸ Bo kami in nopotabá doman in tobatú utat naton noyotakinnea, utat naton tanaa in totokbí i horomat in bayongan jamaat sin oaidannea nopoyaput in Habar Mopia nongkon i Allah.

¹⁹ Bo deeman doman tongá tua! Intau tatua in piniḻí doman bo sinantú in jamaat sin moyobayat nami kon bonu in bobayáan mopoyaput in sumbangan, sinbá ki Tuhan in umuran dayowon bo bá ontongan doman monimu kon kami in umuranbí totu-totuu moibog motuḷung.

²⁰ Sin ingaton mako nami, dika bo potaḷáan intau in kami mopoyaput in sumbangan moantó tanaa.

²¹ Sin kami in moibogbí mogaid kon inta mopia, deemanbí tongá kon tayowon i Allah táe kon tayowonbí doman in intau.

²² Koḻikud in ki Titus bo ki utat naton tobatú tua, kami in nopotabá doman in tobatú utat naton ibanea mako. Sia tua in inujibí domandon nami, bo noniatadon kon umuranbí in sia moibog motuḷung. Sedang ibogonnea in bá tanaa bidon mako, sin totok moḷoben in harapannea kon i monimu.

²³ Aka ki Titus, yo sia in yobayat topogaidanku inta notuḷung kon i monimu. Bo soaḷ ki utat naton taya dua tua, inta minayá noyotakinnea, mosia tua in intaubí inta piniḻí bo sinantú in jamaat sin kinosanang in gina monia.

²⁴ Tuamai poigumon nami, poniatabí in tabi monimu kon i monia, sinbá bayongan in jamaat monotaaudon kon moiko in motabibí kon i monia, bo onu in dinui-duímai nami soaḷ moiko moniata kon totuubí.