KINOBAḺIAN 40 - Alkitab Singog In Mongondow Masa In Tanaa

Ki Yusup bo togoindop intau doyowa kon ponjara

¹ Naonda in tua mita nobaḻí, bobantung i datu in Mesir doyowa, inta mopoposadia in pongonginuman bo inta mopoposadia in kaanon, nomia kon noitaḷá kon i datu.

² Dá sinumorúdon in ki datu kon bobantungnea doyowa tatua,

³ bo mosia in pinobonuneadon kon ponjara kon bonu in baḷoi moḷoḷukad kon komaḻig, kon tampat pinomonjaraan kon i Yusup.

⁴ Noonggotbí doman in mosia kon ponjara tatua, bo itoi in moḷoḷukad kon komaḻig nobogoi in tugas kon i Yusup moindoi kon i monia.

⁵ Kon doḷom tobatú intau inta mopoposadia in oinumon i datu bo inta mopoposadia in kaanon i datu tumpaḷa sinumogoindop. Táe togoindop nayadua tua in diá notongkai dá mangaḻenea in diábí doman notongkai.

⁶ Naonda in ki Yusup namangoi kon i monia nopoikoḷomai kon singgai, koontongan molamurú mako in taya dua tua.

⁷ Dá ki Yusup in noḻibó, “Nongonu sin tai utat mita totokbí in molamurú mako in singgai naa?”

⁸ Tubag monia, “Kogobíi kami in sinumogoindop, bo diá doman kotaauan nami in mangaḻenea.” Guman i Yusup, “Tongábí ki Allah in motaau mobogoi in mangaḻe in togoindop. Oumanka in togoindop monimu tatua.”

⁹ Mopoposadia in oinumon i datu tatua in noguman, “Kon togoindop tua, akuoi in nokoontong kon oyúon pangkoi in anggur kon tayowonku.

¹⁰ Pangkoi in anggur tatua nonanga toḷu. Bagupa in tanganea mita tatua monondaun, indoianmai mulaidon ḷumuai doman in bungainea, bo indoianmai bungainea in noḷutúdon.

¹¹ Kon dodai intua akuoi kokada-kadai in galas pongonginuman i datu, dá ginamáku in bungai in anggur tatua bo pinugutku kon bonu in galas i datu, bodongka binayáku inogoi sin inumon i datu.”

¹² Ki Yusup in noguman, “Naa in mangaḻenea: Tanga toḷu tatua mangaḻenea toḷu nosinggai.

¹³ Kon bonu in toḷu nosinggai moiduduimai ki datu mopoḷuaidon kon inimu, ampunganneadon in iko bo popobuineadon in iko kon oaidanmu inta koḻipod. Iko in bui bidon moposadia in oinumon i datu ná koḻipod.

¹⁴ Táe kotoropaipa in akuoi aka iko motompiadon in kobobiagmu. Tuḷungai bo pogumandon kon i datu onu inta nobaḻí tanaa, sinbá akuoi poḷuaiondon kon ponjara tanaa.

¹⁵ Sin, sabanarnea koḻipod akuoi sinakow nongkon butá intau Ibrani bo kon naa, kon Mesir, akuoi in diábí kon dodai in onda in nogaid kon inta moraat nodapot in akuoi pinotuot kon bonu in ponjara tanaa.”

¹⁶ Naonda intau inta mopoposadia in roti tatua nokotaau kon mangaḻe in togoindop in mopoposadia kon oinumon i datu tatua mopia, dá sia in noguman doman kon i Yusup, “Akuoi in sinumogoindop doman, akuoi noguntu kon karansi toḷu kon bonu in roti.

¹⁷ Kon bonu in karansi inta totok in koḻimonik noyagi-yagimai in kukis sin diaan ogoi kon i datu, táe ḷagapan mita namangoibí bo nokaan kon kukis mita tatua.”

¹⁸ Tubag i Yusup, “Naa in mangaḻe in togoindopmu tatua: Karansi toḷu tatua mangaḻenea toḷu nosinggai.

¹⁹ Toḷupa nosinggai naa ki datu mopotabádon kon intau momongkó kon uḷumu bodongka bambéonnea in mayatmu kon oigi tobatú, bo ḷagapan mita mamangoi mokaan kon tapúmu.”

²⁰ Toḷu nosinggai noiduduimai kon tua in singgai kinotompodan umur i datu, bo sia nogaid kon rame moḷoben sin pogoiníannea kon bayongan pogawainea. Sia nomarenta sinbá mopoposadia in oinumonnea bo intau inta mopoposadia in kaanonnea poḷuaidon kon bonu in ponjara bo diaan kon tayowon in bayongan pogawai in komaḻig.

²¹ Itoi in mopoposadia kon oinumon pinopobuineadon kon oaidannea koḻipod.

²² Táe inta mopoposadia kon kaanonnea ihukum dapot in minatoi. Tua komintan in nobaḻí notongkai ná inta ain pinoguman i Yusup.

²³ Táe mopoposadia kon oinumon i datu tatua in diá bidon kinotoropannea in ki Yusup. Totok bidon in kinoḻiongannea in ki Yusup.